Samuel, Teresa, Magdalena ima nisqankoqa rikuchin runasqa tukuy imapaj mañakusqankuta, wakenqa allin, wakintaj mana. Wakenqa sonqomantapacha mañakunku, wakintaj kutipakuspa jinalla. Jinapis runasqa ichá uj examenpi allin rinanpaj, equipon atipananpaj, familianpi allin rinanpaj chayri waj imaspaj, mañakunankupuni kasqanta reparanku. Chantapis yachakusqanman jina mana religionniyoj kajkunapis Diosmanta mañakunkupuni.

Qanrí, Diosmanta mañakuspa, ¿imatá mañakunki? Diosmanta mañakuyta yachaspapis manapis ichá tapukunki: “¿Yanapawasunmanchu? ¿Dios uyariwasunmanchu?”, nispa. Uj qhelqaj runa nerqa mañakoyqa sonqota tiyaykuchinallapaj kasqanta. Wakin doctorespis kikillantataj yuyanku, mañakoyqa jampi jina kasqanta. ¿Qanrí imatá yuyanki? ¿Costumbreraykullachu runas Diosmanta mañakunku, chayri uj nanaymanta sanoyayta munaspallachu?

Bibliaqa yachachin Diosmanta mañakuy mana sonqota tiyaykuchinallapajchu kasqanta. Astawanpis nin Diospa munayninman jina, imaspichus yanapata necesitasqanchejman jina mañakojtinchej, Pay uyariwasqanchejta. ¿Chay jinapunichu kanman? Chayta qhawarina.

Ashkha runasqa yuyanku Diosmanta mañakuspa tiempollata usuchisqankuta. Wakintaj mana uyarisqanta yuyanku. Uj runa pichus Diospi mana creejchu, imaynachus Dios kasqanpi tʼukurispa mañakorqa: “Imallatapis parlarimuy”, nispa. Jinapis Diosqa ni imata nisqachu.

Chaywanpis Bibliapi niwanchej, Diosqa mañakusqanchejta uyarisqanta. Chantapis nin ñaupa tiempomanta parlaspa: “Señorqa waqasqaykichejta uyarispa, sonqochajta mañakusqaykichejta uyarispataj kutichisonqachejpacha”, nispa (Isaías 30:19). Waj versiculopitaj nin: “Cheqan runaspa mañakusqankutarí tukuy sonqo uyarin” (Proverbios 15:8).

Bibliaqa parlallantaj wakin runasta Dios uyarisqanmanta. Hebreos 5:7 nin: “Jesusqa [...] qhapariywan, waqaywan mañakorqapuni Diosmanta, pichus atiyniyoj karqa wañuymanta salvanampaj, chaymanta. Jinataj [...] Diosqa mañakusqanta uyarerqa”. Kay Daniel 9:20, 21 chantá 2 Crónicas 7:1 kikillantataj nin.

Chantá, ¿imaraykú wakin runas yuyanku Diosmanta mañakojtinku mana uyarisqanta? Jehová,a Dios uyarinawanchejta munanchej chayqa, payllamanta mañakunanchej tiyan. Mana waj diosmanta mañakusunmanchu, nitaj wañusqa familiaresninchejmantapis. Chantapis Diosqa munan mañakusqanchej “munayninman” jina kananta, imastachus allinpaj qhawasqanman jina. Ajinamantaqa “pay uyarinawanchejta” niwanchej (1 Juan 5:14). Chayrayku Dios uyarinawanchejta munaspaqa, Payta rejsina, kasukunataj.

Ashkhasqa yuyanku Diosmanta mañakuy mana uj costumbrellachu kasqanta. Manaqa Dios uyarisqantapuni. Kenia suyumanta Isaac nin: “Bibliata entiendenaypaj Diosmanta mañakorqani. Chantataj uj runa yanaparinawanta niwarqa Bibliata entiendenaypaj”, nispa. Filipinasmanta Hilda, cigarro pitayta saqepuyta munarqa. Mayta kallpachakuspapis mana aterqachu. Chayrayku qosan nerqa Diosmanta yanapata mañakunanta. Diosmanta mañakuytawan Hilda nerqa: “Yanapawasqanmanta tʼukushaj qhepakorqani. Niñataj pitayta munarqanichu. Chay viciotaqa saqeporqani”, nispa.

¿Yanapasunkimanchu Dios, imachus llakichisusqan munayninman jina kajtin?

Diosqa munan paywan amigos kananchejta.

Amigospura parlarikuspa astawan masichakunchej. Diospis munan paywan parlarinanchejta amigosnin kananchejpaj. Pay nin: “Qankuna sutiyta oqharinkichej Diosniykichejpaj rejsikapuwasqaykichejrayku, mañakoj jamuwankichej, noqataj uyarisqaykichej” (Jeremías 29:12). Dioswan masichakusqanchejman jina payman qayllaykusunchej, Paypis qayllaykamuwasun (Santiago 4:8). Biblia nin: “Tata Diosqa payta wajyakojkunaj qayllampi kashan” (Salmo 145:18). Astawan mañakuspaqa astawan Paywan masichakusun.

Diosqa yanapayta munawanchej.

Jesús nerqa: “Pi runataj qankunamanta kanman, wawan tʼantata mañakojtin, rumita qojri? Challwata mañakojtimpis, kataritachu qonman? Sichus qankuna, [...] allin imasta wawasniykichejman qoyta yachankichej chayqa, imaraykutaj janaj pachapi kashaj Tataykichej aswan allin imastaraj mana qonmanchu paymanta mañakojkunaman?” (Mateo 7:9-11). Arí, Diosqa mañakunanchejta munan, noqanchejmanta interesakusqanrayku, yanapaytataj munawanchej (1 Pedro 5:7). Chʼampaykunapi rikukuspataj mañakunanchejta niwanchej. Biblia nin: “Ama imamantapis phutikuychejchu, astawanqa Diosmanta mañakuspaqa, imatachus munasqaykichejta mañakuychej, tukuy imamanta graciasta qospallapuni”, nispa (Filipenses 4:6).

Diosta necesitanchej.

Yachayniyoj runasqa, runaj kausayninta estudiasqankuman jina, reparanku ashkhas Diosmanta mañakuyta necesitasqankuta. Diospi mana creejkunapis Diosmanta mañakunku.a Chayqa rikuchin Diosman qayllaykunapaj jina ruwasqa kasqanchejta. Jesús nerqa: “Kusikuyniyojmin kanku wajcha sonqoyoj kasqankuta reparakojkunaqa”, nispa (Mateo 5:3). Mana wajcha sonqoyoj kanapajqa Diosmanta mañakuna.

¿Imaynataj kanman Diospa amigon kajtinchej?

Imallatapis qallarishaspaqa, ichá tapukunki: “¿Imaynatá yanapawanqa?”, nispa. Ajinallatataj Diosmanta mañakuspaqa tapukusunman. ¿Imaraykú? Imaraykuchus yachayta munanchej yanapanawanchejtachus manachus. Cheqa sonqo Jobpis jinata tapukorqa: “Payta wajyakuyman chay, ¿pay uyariwanmanchu?”, nispa (Job 9:16, NM).

Kinsa kaj yachaqanapi yachakorqanchej jina, Diosmanta mañakoyqa mana uj costumbrellachu chayri jampi jinallachu kasqanta. Astawanpis munayninman jina mañakojtinchej Diosqa uyarin. Chantapis Jehová Diosqa Payman qayllaykunata munan (Santiago 4:8). Sapa kuti mañakojtinchej imaynatachus yanapawasqanchejta qhawarina.

Sonqo tiyaykuy

Chʼampaykunasniyoj kanki chay, ¿anchatachu llakikunki? Bibliaqa yuyaychawanchej: “Mana saykʼuspa, Diosmanta mañakullaychejpuni”, “imatachus munasqaykichejta mañakuychej”, nispa (1 Tesalonicenses 5:17; Filipenses 4:6). Pikunachus Diosmanta mañakunku chaykunamanta, Biblia nin: “Diosqa chay mana unanchay atina sonqo tiyaykuyninta sonqosniykichejman churanqa, chaytaj sonqoykichejta, yuyayniykichejtawan waqaychanqa” (Filipenses 4:7). Jehová Diosmanta mañakuspa llakiyninchejtataj payman willaspaqa sonqo juntʼasqas kasun. Bibliataj chayta ruwanata niwanchej: “Llakiyniykita Tata Diosman saqey. Payqa sinchʼita sayachisonqa”, nispa (Salmo 55:22).

Diosmanta mañakojkunaqa ajina sientekunku. Corea del Sur suyumanta uj warmi Hee Ran sutiyoj, nin: “Chʼampaykunasneyqa llasa qʼepi jina, Diosmanta mañakojtiytaj manaña llasachu, kallpachasqataj kani”, nispa. Filipinas suyupi tiyakoj Cecilia, nin: “Warmi wawasniymanta mayta llakikuni. Chantapis mamayta qhawanay tiyan payqa manaña rejsiwanpischu. Diosmanta mañakuspataj, mana sinchʼita llakikunichu. Yachani Jehová yanapanawanta”.

Llakiypi kashaspa sonqochasqa, kallpachasqataj kanchej

Llakisqa kaspaqa chayri wañuy patapi kaspa chayri chʼampayniyoj kaspapis “sonqochaj Dios[manta]” mañakuy, payqa yanapasonqa. Bibliaqa niwanchej: “Payqa sonqochawanchej tukuy llakiyninchejpi” (2 Corintios 1:3, 4). Sutʼincharinapaj, uj kuti Jesusqa may llakisqa kasharqa chayrayku “qonqoriykukuspa[...], Diosmanta mañakorqa”. Chaymantataj “janaj pachamanta rikhurimorqa uj ángel Jesusta kallpachanampaj” (Lucas 22:41-43). Nehemiaspis cheqa sonqo karqa. Sajra runastaj Diosmanta mana willananta nerqanku. Paytaj Diosmanta mañakorqa. “Kallpachaway, Diosniy” nispa. Chaymanta imachus kasqanqa rikuchin Nehemiasta Dios yanapasqanta llankʼayninta juntʼananpaj (Nehemías 6:9-16). Ghana suyumanta Reginald, nin: “Llakiykunapi rikukuspaqa Diosmanta mañakuni, reparanitaj chay chʼampaykunata atipanaypaj yanapawasqanta, nitaj ni imamanta llakikuniñachu”, nispa. Arí, Diosmanta mañakojtinchejqa, pay sonqochawanchej.

Diospa yachaynin

Wakin imasta ajllasqanchejqa noqanchejpaj, familianchejpajpis allin chayri mana allin kanman. ¿Imatá ruwasunman allinta ajllanapaj? Biblia nin: “Sichus mayqellampis qankunamanta pisi yachayniyoj kanman chayqa, Diosmanta mañakuchun. Diostaj chay yachayta payman qonqa, imaraykuchus Diosqa tukuyman qon mana michʼakuspa” (Santiago 1:5). Yachayta mañakojtinchejqa, Dios espíritu santonnejta allinta ajllanapaj yanapawasunchej. Jesús nerqa: “Janaj pachapi kaj Tataykichejqa Santo Espirituta qonqa mañakojkunaman”, nispa (Lucas 11:13).

Jesuspis Tatanmanta yanapata mañakorqa wakin imasta ruwananpaj. Chunka iskayniyoj apostolesninta ajllananpajpis “sutʼiyanankama [Diosmanta] mañakorqa” (Lucas 6:12).

Jesús jinallataj ashkha runas sonqo juntʼasqa kanku Dios yanapasqanta reparasqankumanta, allinta ajllanankupaj. Filipinas suyupi tiyakoj Regina ashkha chʼampaykunasniyoj karqa. Familianta uywanan karqa qosan wañupojtin, mana llankʼayniyoj qhepakorqa, payllañataj warmi wawasninta qhawanan karqa. ¿Imataj yanaparqa allinta ajllananpaj? Regina nin: “Diosmanta mañakuni chayqa, paypi atienekusqayta rikuchini”, nispa. Kwabena pichus Ghana suyupi tiyakun nin imaraykuchus Diosmanta mañakusqanta. “Albañil jina sumajta llankʼashaspa mana llankʼayniyoj qhepakorqani. Diosmanta mañakoj kani allin kaj llankʼayta ajllanaypaj. Reparanitaj Jehová yanapawasqanta. Imajtinchus chay llankʼayqa kausakunaypaj jina, Diostapis sirviyta atillani”. Diosmanta mañakunki chayqa qantapis yanapasonqa, yupaychaytataj atillanki.

Diosmanta mañakuspa imaynasmantachus yanapawasqanchejmanta wakillanmanta parlarerqanchej. (Wajkunatawan yachanaykipaj “¿Imaynatá Diosmanta mañakuy yanapawanchej?” nisqa recuadrota qhaway.) Diosmanta mañakuy yanapasunanpajqa, paytaraj rejsinayki tiyan, imatachus nisqantawan. Jehovaj testigosninta tapuriwaj, paykunaqa Bibliamanta yachachisonqanku.a Jinamanta qayllaykushankiña mañakuyta uyarej Diosman (Salmo 65:2).