Sajra pʼunchaykunapi Jehovata yupaychana

ERNESTO nin: “Wañunayashaniña kay nanaykunawanqa”, nispa. Payqa 70 watasniyojmanta astawanña kashan.a Qanpis, ¿ajinallatatajchu nishanki? Machuyapushasqaykita, uj onqoyrayku mana kallpayoj kashasqaykita reparanki chayqa, imatachus Eclesiastés 12 capítulo nisqanta kausayniykipi rikushanki. Chay capituloj ñaupaj versiculonpi, machuyapojtinchej sajra pʼunchaykunapi rikukusqanchejta nin. Chaywanpis machuyapushasqaykimanta ama anchata llakikuychu, Jehovata sirvispa kusisqa kausakuyta atinki.

CREEYNIYKICHEJTA SINCHʼIYACHIYCHEJ

Qankunaqa mana sapaykichejchu kashankichej. Ñaupa tiempomanta Diospa kamachisninpis qankuna jinallataj machuyapusqankurayku llakiykunapi rikukorqanku. Sutʼincharinapaj, Isaac, Jacob, Ahías ima ciegoyaporqanku (Gén. 27:1; 48:10; 1 Rey. 14:4). Sarapis payayapusqanrayku llauchʼiyarqa (Gén. 18:11, 12). Rey Davidpis niña qʼoñikuyta atejchu (1 Rey. 1:1). Barzilaipis niña yachayta aterqachu mikhuy miskʼichus, qʼaymachus kasqanta, niñataj uyariyta aterqachu takejkunaj takisqankutapis (2 Sam. 19:32-35). Abrahampatapis warmin wañuporqa, jinallataj Noemij qosanpis (Gén. 23:1, 2; Rut 1:3, 12).

¿Imataj paykunata Diosman cheqa sonqollapuni, kusisqallapuni kanankupaj yanaparqa? Abrahamqa ‘creeypi kallpachakorqa’ Diospa nisqasnin juntʼakunanpi creesqankurayku (Rom. 4:19, 20). Qankunapis sinchʼi creeyniyoj kanaykichej tiyan, creeyninchejqa mana mashkha watayoj kasqanchejmantachu, nitaj yachayniyoj kasqanchejmantachu, nitaj waj imasmantachu kashan. Jacobpis Diospa nisqasninpi creellarqapuni ciegoyapuspapis, ñakʼayllataña puñunanmanta tiyaykamuspapis (Gén. 48:1-4, 10; Heb. 11:21). Kunanpis wakin hermanosninchej ajinapi rikukullankutaj. Sutʼincharinapaj, hermananchej Inesqa 93 watayojña, uj onqoyraykutaj cuerponqa llauchʼipacha kashan. Jinapis pay nin: “Jehovaqa sapa pʼunchay mayta bendeciwan. Sapa pʼunchay paraisopi tʼukurini, chaytaj mayta sonqochawan”, nispa. Ajinata chay hermana yuyasqanqa, ¡may sumajpuni!

Creeyniykichej wiñananpajqa, Diosmanta mañakuychej, Bibliata ukhunchaychej, tantakuykunaman riychej. Profeta Danielqa sapa pʼunchay kinsa kutita Diosmanta mañakoj, Diospa Palabrantapis ukhunchallajpuni (Dan. 6:10; 9:2). Payayasqa viuda Anapis ‘temploman’ rejpuni (Luc. 2:36, 37). Tantakuykunaman rinkichej, tapuykunamanpis kutichinkichej chayqa, may kallpachasqa kankichej, wajkunatapis kallpachankichej. Ama qonqaychejchu Jehová mañakuyniykichejta jatunpaj qhawasqanta, manaña ñaupajpi jinachu paypaj llankʼajtiykichejpis (Pro. 15:8).

Leeyta chayri tantakuykunaman riyta mana atinkichejchu chayqa, imatachus ruwayta atisqaykichejpi tʼukuriychej. Tantakuykunaman mana riyta atispaqa, tantakuyta telefononejta uyariwajchej. Isabelqa 79 watasniyojña, chharputa qhawasqanrayku, tantakuykunapaj wakichikunanpaj uj hermano Torremanta Qhawaj revistata jatun letrasniyojta imprimipun.

Ichapis qankunaqa wajkunamanta nisqaqa astawan tiempoyoj kankichej. Chayraykutaj Bibliamanta, publicacionesmanta, audiodramasmanta, umallirichiykunamanta ima, grabacionesta uyariyta atiwajchej. Chantapis hermanosta wajyariwajchej Bibliaj mayqen yachachiynillanmantapis parlarinaykichejpaj. Ajinamantataj purajmanta kallpachanakunkichej (Rom. 1:11, 12).

WILLALLAYCHEJPUNI

Cristinaqa 80 watasniyojmanta astawanña, nintaj: “Payayapuspaqa manaña ñaupajta jinachu imatapis ruwanchej”, nispa. ¿Imatataj ruwawajchej mana anchata llakikunaykichejpaj? Qanchis chunka phishqa watasniyoj Peter nin: “Ama yuyaychu imatachus mana ruwayta atisqaykipi, astawanqa imatachus ruwayta atisqaykipi yuyay”, nispa.

¿Imatá ruwawaj willamunallaykipajpuni? Heidiqa niña wasimanta wasi willayta atinchu, 90 watayoj jinaña kaspapis, computadorapi cartasta qhelqayta yachakun. Wakin machitusqa parquespi, auto sayanaspi ima willanku. Wakintaj machitusta qhawanapaj wasipi tiyakunku, chaypitaj llankʼajkunaman, waj machitusmanpis willanku.

Rey Davidqa machituña kaspapis cheqa yupaychay ñauparinanpaj tukuy sonqo yanaparqa. Templo ruwakunanpaj qolqeta qorqa, tukuy imatataj wakicherqa (1 Cró. 28:11–29:5). Qankunapis atisqaykichejman jina Jallpʼantinpi willakunallanpajpuni yanapakuwajchej. Chaypajtaj sonqo kʼajaywan Diospaj llankʼaj hermanosta, precursoresta ima kallpachariwajchej. Ichá uj regalitota qowajchej, wasiykichejman mikhurinaykichejpaj wajyariwajchej, chayri kʼacha palabraswan sonqochariwajchej. Jehovamantapis mañapuwajchej waynaspaj, familiaspaj, Diospa llajtanpi mayta llankʼajkunapaj, onqosqaspaj ima.

Jehovapajqa may valorniyoj kankichej, amataj yuyaychejchu machuyapusqaykichejrayku Jehová qhesachasunaykichejta (Sal. 71:9). Payqa mayta munakusunkichej. Tumpamantawanqa tukuypis ashkha watasta juntʼasunchej, nitaj machuyapusunñachu. Astawanqa waynas jina kallpayoj kasunchej, niñataj onqosunchu, Jehovatataj wiñaypaj yupaychasunchej.