¿Qanrí imatá yuyanki? ¿Allillanpajchu Dios guerrasta qhawan? Allillanpaj qhawajtin, ¿mayqen tropatataj yanapan? Chaykunata yachaspaqa imatachus guerrasmanta yuyasqaykitapis yachallawajtaj. Chantapis Dios guerrasta allillanpaj qhawasqanta, tropayki atipananpajtaj yanapasqanta yachaspaqa, ichá niwaj chay maqanakuy allillan kasqanta, tropayki atipanantataj. Chaywanpis, enemigoykita Dios yanapasqanta yachaspa, ¿kikillantapunichu guerrasmanta yuyawaj?

Chantapis, imaynatachus Dios guerrasta qhawasqanta yachaspaqa, Diosmantapis manaña kikintachu yuyanki. Imajtinchus may chhika runas jinallataj guerras kasqanrayku ñakʼarinki chayqa, ichá tapukunki: “¿Dioschu juchayoj guerras kananpaj? Chayri, ¿ñakʼarejkunamanta Dios llakikunmanchu?”, nispa.

Bibliaj yachachisqanqa mana runaj yuyasqanman jinachu. Astawanpis Diosqa unaymantapacha kunankama mana allinpajchu guerrasta qhawan. Chayrayku kunanqa ukhuncharisun ñaupa tiempopi chantá Jesuspa tiempopi imaynatachus Dios guerrasta qhawasqanmanta. Jinamanta yachasun kay tiempopi imaynatachus Dios guerrasta qhawasqanta. Chantapis aswan qhepaman guerras kanallantapunichus manachus chayta.

Diosqa, egipcioswan maqanakuspa rikucherqa mana tukuy guerrastachu juchachasqanta. Chantapis wakin kuteqa Israel llajta waj llajtaswan maqanakunanta saqerqa. Uj kutipi Diosqa, israelitasta cananeoswan maqanakojta kacharqa, pikunachus sinchʼi sajras karqanku (Deuteronomio 9:5; 20:17, 18). Rey Davidtapis Diosqa nerqa filisteoswan maqanakamunanta, atipananpajtaj imatachus ruwananta (2 Samuel 5:17-25).

Bibliapi nin jina, Diosqa Israel llajta ñakʼarichisqa kashajtin, maqanakunankuta kamacherqa, israelitasta jarkʼananpaj, cheqa yupaychay kanallanpajpunitaj. Jinapis, ¿pitataj Dios guerraman kachaj, maykʼajtaj? ¿Munanchu runa wañunanta? Kunanqa chayta qhawarisun.

1. DIOSLLA KAMACHIYTA ATERQA PICHUS GUERRAMAN RINANTA. Uj kuti, Dios nerqa israelitasman: “Manamin qankunachu maqanakunkichej”, nispa. Imajtinchus Dios paykunarayku maqanakunan karqa (2 Crónicas 20:17; 32:7, 8). Diosqa, ashkha kutispi llajtanrayku maqanakorqa, kay yachaqanaj qallariyninpi rikorqanchej jina. Chantapis Diosqa llajtanta kacharqa maqanakojta Sumaj Jallpʼata japʼikapunankupaj, jarkʼanankupajtaj (Deuteronomio 7:1, 2; Josué 10:40).

2. DIOSLLA KAMACHIYTA ATERQA MAYKʼAJCHUS GUERRA QALLARINANTA. Diospa kamachisnenqa enemigosninkuwan maqanakunankupaj Dios kamachinanta suyakunanku karqa. Dios mana kamachejtenqa mana maqanakoj riyta aterqankuchu. Rejtinkoqa Dios mana yanapajchu. Chantapis Biblia nisqanman jinaqa paykunallamanta maqanakoj rispa atipachikoj kanku.a

3. 

   DIOSQA MANA PI WAÑUNANTA MUNANCHU. Jehová Dios kausayta qoj, tukuy runastataj pay ruwarqa (Salmo 36:9). Diosqa ni pi wañunanta munanchu. Chaywanpis wakin runasqa wakichikunku, wajkunata ñakʼarichinankupaj, wañuchinankupaj ima (Salmo 37:12, 14). Diosqa, wakin kuti guerras kananta saqerqa sajra kausayta chinkachinanpaj. Jinapis chay jina maqanakuykunapi Diosqa, israelitaspa enemigosninkuwan pacienciakoj, paykunatataj khuyakoj (Salmo 86:15). Chayrayku Israel llajtaqa, Dios kamachisqanman jina, niraj uj llajtawan maqanakushaspa, “uj tratota” ruwanan karqa. ¿Imapaj? Chay llajtamanta runas sajra kausayninkuta saqenankupaj, ajinamanta manaña maqanakuy kananpaj (Deuteronomio 20:10-13). Chayrayku Diosqa jinata nerqa: “Mana munanichu juchasapa runa wañunanta, astawanqa munani sajra ruwanasninmanta kutirikamuspa kawsananta”, nispa (Ezequiel 33:11, 14-16).b

Yachakusqanchejman jina, Diosqa ñaupa tiempopi maqanakuykuna kananta saqellaj, sajra kausayta, ñakʼariyta ima chinkachinanpaj. Chaywanpis Dioslla niyta atej maykʼajchus guerraman rinankuta, pitajchus rinanta. Chantapis Diosqa mana sinchʼitachu ñakʼarichej. Kunanpis Diosqa sajra ruwayta chejnikun (Salmo 11:5). Jinapis, ¿imaynatataj Dios guerrasta qhawarqa Jesuspa tiemponpi?

Diosqa mana maqanakorqachu ñaupa tiempopi jina judiosrayku. Nitaj maqanakunankuta saqerqachu. Diosqa ñaupa tiempopi jinallapuni guerrasta qhawasharqa. Judiostaj manaña allintachu Diosta yupaychasharqanku, imajtinchus Jesucristota Mesiasta jina qhesacharqanku (Hechos 2:36). Chayrayku Diosqa manaña paykunata allinpajchu qhawarqa, niñataj ajllasqan llajtachu karqa (Mateo 23:37, 38).

Diosqa, judiosta, Sumaj Jallpʼata ima, manaña allinpajchu qhawarqa. Chayrayku judiosqa niña jaykʼaj maqanakunkumanchu karqa Dios yanapashasqanta nispa. Jesús nerqa jinataj, Israel llajtataqa manaña Dios allinpajchu qhawarqa, nitaj bendicerqañachu. Astawanpis waj llajtatañataj ajllakunan karqa. Biblia nisqanman jina, chay llajtaqa sutikun “Diospa nacionnin Israel” (Gálatas 6:16; Mateo 21:43). Diospa nacionnin Israelqa ajllasqa cristianosmanta kanku. Chayrayku ñaupa cristianospa tiemponpi paykunata nikorqa: “Kunanrí Diospa ayllunña kankichej”, nispa (1 Pedro 2:9, 10).

Chay cristianos Diospa llajtan kajtinkupis, Diosqa mana paykunarayku maqanakorqachu Romanosmanta kacharichinanpaj. Nitaj jarkʼakunankupaj maqanakojta saqerqachu. Imaraykuchus iskay kaj yachaqanapi yachakorqanchej jina, Dioslla niyta atin maykʼajchus maqanakuyman rina kasqanta. Arí, Diosqa ñaupa cristianospa tiemponkupi, mana paykunarayku maqanakorqachu, nitaj kay pacha guerraspi maqanakunankuta kamacherqachu. Chaytaj rikucherqa, sajra ruwayta, ñakʼariyta ima Dios chinkachinanpaj niraj tiempochu kasqanta.

Cristianosqa, ñaupa tiempomanta Diospa kamachisnin jina, sajra kausayta, ñakʼariyta ima Dios chinkachinankama suyakunallanku karqa. Dios chayta ruwanankamataj mana enemigosninkuwan maqanakunankuchu karqa. Jesucristopis yachachisqasninman sutʼita nerqa mana guerrasman rinankuta. Chayrayku nerqa: “Enemigosniykichejta munakuychej, chejnispa qankunata qhatiykachajkunapajtaj Diosmanta mañapuychej”, nispa (Mateo 5:44). Chantapis Jesusqa Romamanta soldados Jerusalenta thuñej yaykunankuta nerqa. Chayta rikuspataj judiosqa Jesús kamachisqanman jina, mana maqanakorqankuchu ayqekorqankutaj (Lucas 21:20-22).

Apóstol Pablopis qhelqarqa: “Ama ima sajramantapis pagachikuychejchu [...]. Diosmanta Qhelqasqapi nin: Noqa pagachikusaj jasutʼispa, nin Señorqa”, nispa (Romanos 12:19). Pabloqa, Levítico 19:18; Deuteronomio 32:35 versiculospi nisqanmanta parlasharqa. Iskay kaj yachaqanapi yachakorqanchej jina, Diosqa llajtanta yanapaj enemigosninkuwan maqanakushajtinku. ¿Imatá apóstol Pabloj nisqan rikuchin? Dios kamachisninta jarkʼananpaj, sajra ruwayta, ñakʼariyta ima chinkachinanpaj maqanakusqanta. Chantapis ñaupa tiempopi jinallataj, maykʼajchus kananta, pitajchus maqanakoj rinanta Jehovalla niyta atinman karqa.

Arí, Diosqa ñaupa cristianosta guerraman maqanakoj rinankuta mana kamacherqachu. Kay tiempopirí, ¿pillatapis bendecinmanchu guerrapi maqanakoj rinanpaj? ¿Chayamunñachu Dios kamachisninrayku maqanakunan tiempo? ¿Imaynatá kay tiempopi Dios guerrasta qhawan? Chayta qhepan yachaqanapi qhawarisun.

Diosqa kay pachapi ñakʼariy kasqanta rikushan, chaytataj chinkachenqa (Salmo 72:13, 14). Bibliaqa nin “ñakʼarichisqa kajkunata” Dios samarichinanta. Chaytataj ruwanqa “janaj pachamanta Señor Jesús atiyniyoj angelesninwan jamojtin. [...] Juchachaspataj castiganqa sonqonkupi Diosta qhesachajkunata, pikunachus Señorninchej Jesucristoj evangeliontapis mana kasojkunata” (2 Tesalonicenses 1:7, 8). Chaytaj kanqa aswan qhepaman, “wañuchinaku maqanaku[pi], Tukuy Atiyniyoj Diospa chay jatun pʼunchayni[npi]”, chayqa sutikun Armagedón (Apocalipsis 16:14, 16).

Chay pʼunchay chayamojtin, Diosqa Wawan Jesucristota, angelesninta ima sajra runasta chinkachinanpaj kachamonqa. Paykunaqa ñakʼariykunata chinkachenqanku (Isaías 11:4; Apocalipsis 19:11-16).

Chayrayku Diosqa kay tiempopipis nillataj allinpajchu guerrasta qhawan. Chantapis sajra ruwayta, ñakʼariyta ima chinkachinanpaj kasqanta nin. Ñaupa tiempopi jinataj, Dioslla niyta atin maykʼajchus qallarinanta, pitajchus maqanakunanta. Diosqa sajra kausayta chinkachenqapuni, chaytataj ruwanqa Wawan Jesucristonejta. Chayrayku Diosqa kay tiempopi mana allinpajchu guerrasta qhawan, allillanman rijchʼakojtinpis.

Kaypi tʼukurina: iskay hermanos tatanku mana wasipi kanankama maqanaykukunku. Chantá telefononejta tatankuta wajyanku. Ujnenqa willakun ujnin qallarisqanta, ujnintaj kikillantataj willakun. Sapa ujtaj munan tatan payman kutikunanta. Tatankutaj iskayninkuta uyarispa manaña maqanakunankuta nin, wasiman kutinantataj suyanankuta. Paykunaqa kasukunku, jinapis watejmanta maqanakuyta qallarillankutaj. Tatataj wasiman chayaspa iskayninpaj phiñakun, mana kasukusqankuraykutaj castigan.

Runasqa kay tiempopipis guerrapi kashaspa Diosmantapuni yanapata mañakunku. Chaywanpis Diosqa ni mayqen tropaman kutikunchu. Chantapis Bibliaqa nin: “Ama pimampis sajramanta sajrallatataj kutichiychejchu” chantá “ama ima sajramantapis pagachikuychejchu”, nispa (Romanos 12:17, 19). Astawanpis, Diosqa runasta nin pacienciawan suyakunankuta Armagedón nisqapi maqanakunankama (Salmo 37:7). Diosqa mana munanchu llajtas guerrapi kanankuta. Chayrayku Diosqa Armagedón maqanakuypi phiñakonqa, Jallpʼantinpi kaj maqanakuykunatataj chinkachenqa (Salmo 46:9; Isaías 34:2). Arí, Armagedón maqanakuypeqa tukuy guerrasta chinkachenqa.

Diospa Reinon guerrasta chinkachisqanqa may sumajpuni kanqa. Jesuspis mañakuyta yachachishaspa chay reinomanta parlarqa. Nerqataj: “Reinoyki jamuchun, munayniykitaj ruwasqa kachun, imaynachus janaj pachapi, ajinallatataj kay pachapipis”, nispa (Mateo 6:10). Sajra ruwaytapis chinkachillanqataj (Salmo 37:9, 10, 14, 15).a Chayrayku cristianosqa Diospa Reinon imastachus ruwananta nisqanta juntʼakunallantaña munanchej (2 Pedro 3:13).

Diospa Reinonqa, ñakʼariyta, sajra ruwayta ima tumpitamantawan chinkachenqa. Bibliaj profeciasnin juntʼakushasqanqa rikuchin qhepa pʼunchaykunapi kashasqanchejta (2 Timoteo 3:1-5).b Diospa Reinonqa tumpamantawan Armagedón pasayta Jallpʼata kamachenqa.

Rikunchej jina, ‘Señorninchej Jesucristoj evangelionta mana kasojkuna’ chay maqanakuypi wañonqanku (2 Tesalonicenses 1:8). Jinapis Diosqa mana munanchu runas wañunankuta, ni sajra kajkunapis (Ezequiel 33:11). Nillataj “munanchu pipis juchanrayku chinkayman rinanta” Armagedón maqanakuypi. Chayrayku Diosqa munan sumaj willaykuna “tukuynejpi willasqa kan[anta], tukuy runas yachanankupaj” niraj tukukuy tiempo chayamushajtin (2 Pedro 3:8, 9; Mateo 24:14; 1 Timoteo 2:3, 4). Runasqa, Jehovaj testigosnin Jallpʼantinpi willasqankurayku Diosta rejsiyta atinku, Señorninchej Jesucristoj evangelionta kasukuytataj. Chantapis maqanakuykunata chinkachikusqanta rikuyta atenqanku.