Ichá noqanchejpis ajinata tapurikuyta yachanchej. May chhika runas kay tapuykunaj kutichiykunasninta yachaytapuni munanku. ¿Tariyta atisunmanchu?

Ashkha runasqa, tapuykunasninkuman kutichiykunata Bibliapi tarisqankuta ninku. ¿Nichu qanpis Bibliamanta yachakuyta munawaj? Mana imata pagaspalla Jehovaj testigosninwan Bibliamanta yachakuwaj.a

Wakin runasqa mana munallankuchu Bibliamanta yachakuyta. Paykunaqa ninku mana tiempoyoj kasqankuta, Bibliaqa mana entiendenapaj jinachu kasqanta chayrí aswan qhepallaman yachakunankuta. Wakintajrí may sumaj kasqanta ninku.

• Gillqa Inglaterra suyumanta, pay nin: “Catolicospa, evangelicospa, budistaspa, sijkunajpa iglesiankumanpis rerqani. Diosmanta yachakuyta munaspa Teología nisqata universidadpi estudiarqani. Nitaj tapuykunasniyman kutichiykunata tarerqanichu. Chayllapi uj Jehovaj testigon visitawarqa. Payqa Bibliawan sutʼinchawarqa, yachakuytataj qallarerqani”, nispa.

• Koffiqa Benín suyumanta, pay nin: “Tukuy imata tapukoj kani, iglesiaymanta pastortaj mana sutʼinchayta atiwajchu. Uj Jehovaj testigontaj, Bibliawan sumajta sutʼinchawarqa. ‘¿Astawan yachakuyta munawajchu?’ niwajtintaj, ‘arí’ nerqani”, nispa.

• Joseqa Brasilmanta, pay nin: “Wañusqasqa sajra imasta ruwawasqanchejta yuyaj kani. Imatachus Biblia yachachisqanta yachayta munaj kani. Uj amigoy Jehovaj testigon karqa, paytaj Bibliamanta yachachiwarqa”, nispa.

• Dennizeqa Mexicomanta, pay nin: “Bibliata leeyta qallarerqani, nitaj entiendejchu kani. Uj kuti Jehovaj testigosnin wasiyman jamuspa Bibliaj profeciasninta sutʼinchawarqanku. Astawan yachakuyta munarqani”, nispa.

• Anjuqa Nepal suyumanta, pay nin: “‘¿Dios munakuwanmanchu?’, nispa mayta tapukoj kani. Uj kuti Diosmanta mañakorqani. Qʼayantintaj Jehovaj testigosnin visitawarqanku, paykunawantaj Bibliamanta yachakorqani”, nispa.

Paykunaj nisqankoqa Jesuspa nisqanman rijchʼakun, pay nerqa: “May cusiskas cancu sonkoncupi Diosmanta pisiskas caskancuta khawacojcunaka”, nispa (Mateo 5:3 Dios Parlapawanchej). Tukuypis Diosmanta yachakuyta necesitanchej. Diostaj chaypajpuni Bibliata qowanchej.

¿Imaynatá Bibliamanta yachachiyku? ¿Imaynatá chay yanapasunkiman? Chaymanta parlarina.

Jehovaj testigosnenqa Diosmanta runasman willamuyku. Chantapis tukuynejpi Bibliamanta yachachiyku.

Kay 2014 watapi Jehovaj testigosnenqa 8 millones kurajniyoj karqayku, 240 suyuspitaj sapa killa 9.500.000 runasman jina Bibliamanta yachacherqayku.a Chantapis Jallpʼantinpeqa uj 140 suyuspi jina, aswan pisi runas tiyan Bibliamanta yachakojkunamanta nisqaqa.

Jallpʼantinpi Bibliamanta yachachikunanpajqa, sapa wata 1.500 millonesta jina Bibliasta, librosta, revistasta, folletostawan ruwakun. Chaykunataj 700 parlaykunapi tijrachisqa tiyan. Chaytaj mayqen parlayllapipis runasman Bibliamanta yachachinapaj yanapakun.

¿IMAYNATÁ BIBLIAMANTA YACHACHIYKU?

¿Imaynatá Bibliamanta yachachiyku?

Ashkha yachachiykunata Biblia nisqanman jina yachachiyku, versiculosta maskʼaspataj sutʼinchayku. Diosmanta yachachinayku kajtenqa, Bibliapi rikuchiyku Diospa sutinta, imaynachus chayri pichus pay kasqanta, maypichus kashasqanta, chantá imaynatachus payman qayllaykuna kasqantapis. Bibliamanta yachakojkunataqa tapuykunasninkuman kutichiykunata Bibliapi maskʼayta yachachiyku.

Chaypajtaj ¿Imatapunitaq Biblia yachachin? librowan yanapachikuyku, mayqenchus 224 paginasniyoj.b Kay libroqa Bibliaj cheqa yachachiykunasninta runas yachakunankupaj ruwasqa kashan. Sutʼinchashantaj Diosmanta, Jesusmanta, wañusqas kausarinpunankumanta, imaraykuchus ñakʼarisqanchejmanta, imaynatachus Diosmanta mañakunamanta, waj imasmantawan.

¿Maypitaj chantá maykʼajtaj Bibliamanta yachachiyku?

Qan niwaykuman maypichus, maykʼajchus yachakuyta munasqaykita.

¿Mashkha unaytataj yachachiyku?

Runas munasqankuman jina yachachiyku. Wakenqa sapa semana uj horata jina yachakuyta munanku, wakintaj 10 chayri 15 minutosllata.

¿Paganawaykuchu tiyan?

Mana. Yachachisqaykumanta jinallataj librosmantapis mana cobraykuchu. Jesús nerqa: “Qankunaqa kayta mana pagaspalla japʼerqankichej, amallataj pagachikuychejchu”, nispa (Mateo 10:8).

¿Mashkha tiempotataj yachachiyku?

Chayqa sapa ujmanta kashan. ¿Imatapunitaq Biblia yachachin? libroqa 19 yachaqanasniyoj, qantaj mashkha unaypichus chay yachaqanasta tukunaykita qhawarikuwaj.

¿Jehovaj testigonmanpunichu tukuna tiyan?

Mana. Noqaykoqa ni pitapis Jehovaj testigonpuni kananta niykuchu. Bibliamanta yachakusqaykiman jina imachus aswan allin rijchʼasusqanta ruwayta atinki.

Bibliamanta yachachiykunata, ¿maypitaj tariwaj?

Internetpi jw.org nisqaman yaykuwaj. Chaypeqa imapichus creesqaykuta chayri ruwasqaykuta sutʼinchashan.

Bibliamanta yachakuyta munaspa, ¿imatá ruwawaj?

• 

  Kay jw.org nisqaman yaykuspa formulariota juntʼachiy.

• Kay revistaj 2 kaj paginanpi direccionniykuman uj cartata apachimuwaj.

• Wasiyki chaynejpi uj Jehovaj testigon tiyakojtenqa, paywan parlariy.