Carlosa nin: “Señoraywan casi 40 watasta casarasqa karqayku. Chayllapi unayta onqoykuspa wañuporqa. Llakiyniyta pasachinaypajqa tukuy imata ruwaj kani. Amigosniypis sonqochawarqanku. Jinapis watatapuni sinchʼita llakikorqani. Wakin días allillan kaj kani. Wakin diastaj mayta phutikoj kani. Warmisitay wañupusqanmanta kinsa watasña pasajtinpis, wakin kuteqa sinchʼita llakikunirajpuni”, nispa.

Ichá pillapis familiaykimanta wañuporqa. Qanpis Carlos jinallatajchá may llakisqa kashanki. Familianchejmanta pillapis wañupojtin chayri ujnin amigonchej wañupojtin, sonqonchej mayta nanawanchej. Uj libro nin: “Runasqa wañupojta niña ujtawan rikunankuta yuyaspa, sinchʼita llakikunku”, nispa. Chayrayku pininchejpis wañupojtin, ichá nisunman: “¿Mashkha unaytataj ajina llakisqa kasajri? ¿Watejmanta kusisqa kaymanchu? ¿Pitaj sonqochawanmanri?”, nispa.

Kay ¡Rijchʼariy! revistaqa chay tapuykunaman kutichin. Ñaupajtaqa wañusqayoj kajkuna imaynatachus llakikusqankumanta parlan. Chaymantataj chay jina llakiypi kajkunata imachus yanapananmanta parlan.

Familiaykimanta pillapis wañupun chayqa, munayku kay revista sonqochasunanta, yanapasunantataj.

Wakin yachayniyoj runasqa, wañupojpa familiaresnin imaynatachus llakikusqankumanta parlanku. Jinapis mana tukuy runaschu kikinta llakikunku. Chaywantaj mana nishanchejchu, wakin pisillata llakikusqankuta chayri llakiyninkuta aguantakullasqankuta. Wakin runasqa llakiyninkuta waqaspa orqhonku. Chaywanpis waqarikoyqa mana tukuytachu yanapan. Runasqa mana kikinchu kanchej. Sapa ujninchej uj jina uywasqa kanchej, kausayninchejpis mana kikinchu, nitaj familianchejpis kikintachu wañupunku.

KAY IMASPI RIKUKUWAJ

Ni pipis yachanchejchu, familiarninchej wañupojtin imaynachus kausayninchej kananta. Wakin runas imaspichus rikukusqankumanta parlarinachej.

Llakiywan ni imanakuyta atinkuchu. Wañupojpa familiaresnenqa, waqarikunku, wañusqata faltachanku, allillan kashaspa sinchʼita llakikunku chayri phiñakunku. Astawantaj llakikunkuman wañusqa familiarninkuta yuyarikuspa chayri mosqokuspa. Wakenqa familiarninku wañupusqanta yachaspa, ni imanakuyta atinkuchu. Wakintaj mana creeytapis munankuchu. Taniaj qosanqa jinallamanta wañuporqa. Pay nin: “Qosay wañupojtin tʼuku japʼiwarqa, ni waqaytapis aterqanichu. Sonqoyqa anchatapuni nanawarqa, mana samaytapis aterqanichu. Nipuni qosay wañupusqanta creeyta munarqanichu”, nispa.

Phutikunku, phiñakunku, juchachakunkutaj. Iván nin: “Wawayku Ericqa, 24 watasniyoj kashaspa wañuporqa. Señoraypis noqapis manchayta phiñakorqayku. Noqaykoqa mana jaykʼajpis jinata phiñakuyta yachajchu kayku. Waway mana wañupunanpaj, ‘ichá kayta chayri jaqayta ruwaykuman karqa’, nispa ninakoj kayku”. Alejandroj señoranqa, unayta onqospa wañuporqa. Pay nin: “Señoray wañupunanpaj noqa juchayoj kasqayta yuyaj kani. Nej kani: ‘Ancha sajrachá kani, chayraykuchá Diosqa kay jinata sufrichishawan’, nispa. Chantataj Diosta juchachasqaymanta, manallataj allinchu kaj kani”, nispa. Carlosmanta ñaupajta parlarerqanchejña. Pay jinata nin: “Wakin kutisqa señoraypaj phiñakoj kani. Wañupunanpaj paypis juchayoj kanman jina. Chay jinata yuyasqaymanta, sonqoy juchachallawajtaj”, nispa.

Yuyayninku chinkan. Wakenqa familianku wañupusqantawan, yuyay chinkasqalla kanku. Wakintajrí wañusqa familiarninkuta uyarisqankuta, rikusqankuta yuyanku. Chayrí chay familianku ladonkupi kashasqanta piensanku. Wakin runasrí imatapis qonqakapullanku, yuyayninkupis waj ladopi kanman. Tania nin: “Wakin kutisqa piwanpis parlarishajtiy, ujllata yuyayniy chinkawaj. Qosay wañuporqa chay diasllapi piensaj kani. Qʼala uma muyusqa karqani. Chaytaj mayta llakichiwaj”, nispa.

Sapallanku kayta munanku. Wakin kutis, wañupojpa familiaresninkoqa ni piwan parlayta munankuchu. Carlos nin: “Ni casadoswanpis, ni solteroswanpis kayta atejchu kani”, nispa. Ivanpa señoranqa Yolanda sutikun, paytaj nin: “Pipis problemasninta cuentawajtiyku, sonqoypi nej kani: ‘¿Chaysitumantachu llakikushan? Llakiyniykumanta nisqaqa, llakiynenqa ni imapischu’, nispa. Wakintajrí wawasninku allin kashasqankumanta willariwaj kayku. Kusikuspapis, ‘amallapis willariwankumanchu’ nej kani. Wawayku wañupojtinpis, wajkunawan parlarinaykupuni karqa. Jinapis mana pitapis uyarinaykupajchu kasharqayku”, nispa.

Onqoykunku. Wakin kutis, wañupojpa familiaresninkoqa mana yarqhachikunkuchu, tulluyapunku, nitaj puñuytapis atinkuchu. Aarón nin: “Tatay wañupusqanmanta watanman, mana puñuyta atejchu kani. Tatay wañupusqallanpi yuyaspa, sapa chʼisi kikin horata rijchʼarej kani”, nispa.

Alejandroqa mana imallamanta onqoykorqa. Pay nin: “Ashkha kutispi doctorpaman rerqani, doctortaj sanolla kasqayta niwaj. Llakiyllamanta onqoykuspa jinarqani”, nispa. Alejandroqa tiemponman sanoyaporqa. Jinapis doctorpaman risqanqa walej karqa. Sinchʼita llakikuspaqa onqoykusunman, onqoyninchej sinchʼiyanman chayri waj onqoy japʼiwasunman.

Wakin imasta mana ruwayta atinkuchu. Iván nin: “Wawayku wañupusqantawan, willanayku karqa familiaresniykuman, amigosniykuman, wawaypaj patronninman, tiyakorqa chay wasej dueñonmanpis. Ashkha papelestataj ruwanayku karqa. Chantapis cosasninwan imatachus ruwanaykuta piensanayku karqa. Tukuy chaykunata ruwanaykupaj, manchay saykʼusqas, llakisqastaj kasharqayku”, nispa.

Chaywanpis wakenqa, familiarninku wañupusqanmanta qhepataraj astawan llakikunku. Imaraykuchus wañupoj imastachus ruwaj, chayta ruwananku tiyan. Tania ajinapi rikukorqa. Pay nin: “Qosallaypuni bancowan entiendenakoj, paylla qolqemanta yachaj. Wañupojtinrí noqallaña chaykunata ruwanay karqa. Chaytaj astawan llakichiwarqa. Mana atinayta yuyarqani”, nispa.

Chay tukuy llakiykunapi piensaspa, ichapis yuyasunman llakiyninchej ni jaykʼaj tukukunanta. Familiarninchej wañupojtenqa, sonqonchej sinchʼitapuni nanawanchej. Jinapis imaspichus rikukunanchejta yachayqa, mayta yanapawasunman. Mana tukuychu kikinta llakikunchej chaypis, tukuypuni llakikunchej. Chayta yachaytaj sonqochawanchej.

MANA WIÑAYPAJCHU LLAKIKUNKI

Ajina kanqa: Familiaykimanta pipis wañupojtin, mana wiñaypajchu llakisqa kanki. Tiempo pasasqanman jina llakiyniyki pisiyanqa. Jinapis wakin kutisqa llakikullankipuni, nitaj wañusqa familiaykimanta qonqakunkichu. Ichá wañusqa familiaykimanta yuyarikojtiyki chayri wakin fechas chayamojtin llakikunkiraj. Chaywanpis tiempo pasasqanman jina, manaña anchatachu llakikunki. Ashkha runaswan ajina karqa, ruwanasninkutapis ñaupajta jina ruwallankupuni. Chaypajtaj familiaresninku, amigosninku, wakin imasta ruwasqanku ima yanapan.

¿Mashkha unaytataj llakikunki? Wakenqa killas pasasqantawan niña sinchʼitachu llakikunku. Wakintaj wata chayri iskay watas pasasqantawanraj llakiyninkuta qonqarinku. Wakintajrí astawan tiempota necesitanku.a Alejandro nin: “Noqaqa kinsa watatapuni sinchʼita llakikorqani”, nispa.

Pacienciakuy. Sapa día kausakuy, qʼayantinmanta mana llakikuspalla. Mana wiñaypajchu sinchʼi phutisqa kanki. Wakin imasta ruwaspataj, llakiyniykita pisiyachiwaj, manataj unaytachu llakikuwaj.

Familiaykimanta pillapis wañupun chayqa, sinchʼi llakisqachá kashanki. Chay llakiyniykita atipanaykipaj, may chhika yuyaychaykunata tariwaj. Wakin yanapasunkiman, wakintaj mana. Imajtinchus sapa runa mana kikintachu llakikunchej. Uj runata yanapaj yuyaychayqa, ichá qanta mana yanapasonqachu.

Jinapis wakin yuyaychaykunaqa ashkhasta yanaparqa. Chay yuyaychaykunaqa, Biblia nisqanman jina kashan. Yachayniyoj runaspis chayllatataj yuyaychanku. Kunantaj chaymanta parlarisun.

1 YANAPASUNANKUTA SAQEY

• 

  Familiaykiwan amigosniykiwan yanapachikoyqa, mayta sonqochasunkiman. Llakisqasta yanapaj runaspis chayta ninku. Jinapis ichá wakin ratos sapallayki kayta munanki. Yanaparisuyta munajkunawanpis phiñakuwaj. Chay kajtin, ama llakikuychu.

• Mana tukuy tiempochu wajkuna ladoykipi kanqanku. Jinapis ama sapallayki kayta maskʼaychu. Ichapis aswan qhepaman wajkuna yanaparisunankuta necesitanki. Chayrayku paykunaman kʼachallamanta niy, imastachus necesitasqaykita, imastatajchus mana.

• Sapallayki kaspa aswan allin kanki chaypis, ama wajkunamanta karunchakuychu.

BIBLIA NIWANCHEJ: “Aswan walej iskay ukhu kayqa”. “Sichus ujnin urman chayqa, ujnin kaj aysarin” (Eclesiastés 4:9, 10).

2 SUMAJTA MIKHUY, EJERCICIOSTATAJ RUWAY

• Llakiywan mana llauchʼilla kanaykipaj, sumajta mikhunayki tiyan. Chayrayku frutasta, verdurasta, mana wirayoj mikhunasta ima mikhuy.

• Ashkha yakuta ujyay.

• Mana yarqhachikunkichu chayqa, sapa rato uj chhikitamanta uj chhika mikhuwaj. Chantapis doctorman rispa, vitaminasta chayri waj alimentosta qochikuwaj.a

• Puriykachay, waj ejerciciosta ruwaypis llakiyniykita qonqarinaykipaj yanapasonqa. Ejerciciosta ruwayqa wakinta kausayninkupi piensarinankupaj yanapan, wakintataj wañupojpi mana anchata piensanankupaj yanapan.

BIBLIA NIWANCHEJ: “Manapuni pipis kikin cuerpontaqa chejnikunchu. Astawanpis cuerponta mikhunawan kallpachan” (Efesios 5:29).

3 SUMAJTA PUÑUY

• 

  Tukuypis sumajta puñunanchej tiyan. Wañusqayojkunataj astawanraj samarikunanku tiyan. Ajina llakiypi kajkunaqa, qʼala saykʼusqalla kanku.

• Cafeta, alcoholtapis anchata tomaspaqa, mana puñuyta atinkichu.

BIBLIA NIWANCHEJ: “Uj chhikan samarinaqa aswan allimpuni kasqanta, iskay laya llakiywan kanamanta nisqaqa, chayqa wayra japʼikuy jinalla” (Eclesiastés 4:6, Qheshwa Biblia).

4 AMA KIKINCHAKUYCHU

• 

  Sapa ujninchej llakiyninchejta uj jinamanta rikuchinchej. Qantaj imachus yanapasusqanta yachanayki tiyan.

• Wakenqa llakiyninkuta pisiyachinankupaj, waqarikunku chayri wajkunawan parlarinku. Wakintajrí mana chayta ruwaspalla sonqochakunku. Yachayniyoj runaspis, imachus llakisqata yanapasqanmanta mana uj yuyayllachu kanku. Ichapis llakiyniykimanta wajwan parlariyta munanki, manchachikunkitaj. Jina kajtin, sumaj amigoykiwan parlariwaj.

• Wakenqa waqarikuspapuni sonqochakunku, wakintajrí mana waqarikunkupunichu.

BIBLIA NIWANCHEJ: “Sonqoqa llakiykunasninta rejsin” (Proverbios 14:10, Qheshwa Biblia).

5 AMA MACHAYMAN QOKUYCHU

• 

  Wakin runasqa llakiyninkuta qonqanankupaj, machayman qokunku, drogakunkutaj. Ama chayta ruwaychu. Chay runasqa uj ratollata llakiyninkuta qonqanku, ashkha problemaspitaj rikhurinku. Chayrayku cuerpoykita mana chʼichichaspalla sonqoykita jampiy.

BIBLIA NIWANCHEJ: “Tukuy chʼichi kajmanta llimphuchakuna” (2 Corintios 7:1).

6 WAJ IMASTA RUWAY

• Waqaspalla kanaykimantaqa, llakiyniykita qonqarinaykipaj waj imasta ruwaj churakuy. Chayqa ashkhasta yanaparqa.

• Amigosniykiman astawan kʼaskakuy chayri mosoj amigosta ruwakuy. Kusichisusqan imasta ruway chayri waj imasta ruwayta yachakuy. Chayta ruwaspaqa manaña anchata llakikunkichu.

• Tiempo pasasqanman jina, niña sinchʼitachu phutikunki. Reparankitaj waj imasta astawan ruwasqaykita. Sonqoykeqa pisimanta pisi sanoyaponqa.

BIBLIA NIWANCHEJ: “Kay pachapeqa tukuy imapis tiempoyojlla”. “Uj tiempoqa tiyan waqanapaj, uj tiempotaj asinapaj. Uj tiempoqa tiyan llakikunapaj, uj tiempotaj tusunapaj” (Eclesiastés 3:1, 4).

7 TIEMPOYKITA SUMAJTA TʼAQAY

• 

  Ñaupajta ruwaj kanki chay imasta watejmanta ruway.

• Puñunaykipaj, trabajanaykipaj, waj imasta ruwanaykipajwan horata churakuy. Ajinamanta pisimanta pisi ruwanasniykita watejmanta ruwanki.

• Ocupasqa kanki chayqa, mana llakikunaykipaj tiempo kanqachu.

BIBLIA NIWANCHEJ: “Dios chay jinatapuni kusichisqanrayku runaqa mana anchata kawsayninmanta” llakikunchu (Eclesiastés 5:20).

8 IMATAPIS RUWANAYKIPAJ ALLINTARAJ TʼUKURIY

• Ashkha runasqa familianku wañupusqantawan, mana allinta tʼukurispalla imatapis ruwankupacha.

• Wakenqa wañupojpa cosasninta chay rato qorirapunku chayri ruphachipunku. Wakintaj wasimanta cambiakunku chayri waj trabajoman yaykunku. Niraj chay imasta ruwashaspa, uj tiempota suyariy.

BIBLIA NIWANCHEJ: “Imatapis ruwanampaj kʼuchi runaj wakichisqanqa allimpuni llojsin; patan uranta wakichisqarí wajchayayman chayachin” (Proverbios 21:5).

9 WAÑUPOJMANTA YUYARIKUY

• 

  Ashkha runasqa wañupojmanta yuyarikuspa sonqochakunku.

• Wañupojpa fotonta chayri waj imasninta sutʼiman churakuy. Manachayrí imastachus paywan khuska ruwarqanki, chayta uj cuadernitopi anotakuy. Chayqa llakiyniykita atipanaykipaj yanapasonqa.

• Wañupojta yuyarichisoj imasta jallchʼakuy. Allinña kashajtiykitaj qhawaykuriy.

BIBLIA NIWANCHEJ: “Unay tiemposmanta yuyarikuychej” (Deuteronomio 32:7).

10 VIAJARIY

• Waj lugarman viajariy.

• Mana viajayta atinkichu chayqa, parquellamanpis puriykacharej riwaj chayri amigosniykiwan mayllamanpis riwaj.

• Mana kikin imasllatapuni ruwaypis yanapasunkiman.

BIBLIA NIWANCHEJ: “Jakuchej chʼinnejman, uj chhikallantapis samarikunaykichejpaj” (Marcos 6:31).

11 WAJKUNATA YANAPARIY

• 

  Wajkunata yanaparispaqa llakiyniykita qonqarinki.

• Familiaykimanta kajkunata chayri amigosniykita sonqochariwaj. Paykunapis qan jinallataj llakisqa kashanku, kallpacharinatataj necesitanku.

• Wajkunata yanaparispa, sonqocharispa ima kusikunki, nitaj qhasillapajña kausasqaykita yuyankichu.

BIBLIA NIWANCHEJ: “Aswan kusiy wajman qoriy, qorichikunamanta nisqaqa” (Hechos 20:35).

12 KAUSAYNIYKIPI PIENSARIY

• Llakiypi kashaspaqa, imachus kausayninchejpi ñaupajpi kashasqanta reparanchej.

• Imatachus kausayniykiwan ruwashasqaykipi piensariy.

• Kausayniykipi imatapis allinchanayki kajtenqa, allinchay.

BIBLIA NIWANCHEJ: ‘Wañuy wasiman riyqa aswan allin fiesta wasiman rinamanta nisqaqa. Imaraykuchus tukuy runaspa tukukuyninkoqa wañuymin. Pichus kausajqa chaymanta yachakuchunʼ (Eclesiastés 7:2).

Familiayki wañupojtenqa llakikunkipuni. Chay llakiytaj mana qʼalitu chinkanqachu. Jinapis kay revistapi nikusqanqa, mayta yanapasunkiman. Mana tukuynin yuyaychaykunamantachu parlajtinpis, chay yuyaychaykunaqa ashkhasta yanaparqa.

PASAJ WATASLLAPI, WAÑUSQAYOJKUNAJ LLAKIYNINKUMANTA ASHKHATA PARLAKUN. Rikunchej jina, yachayniyoj runaspa wakin nisqankoqa, Biblia nisqanman jina kashan. Chayqa rikuchiwanchej, Bibliaj nisqasnin kay tiempopipis yanapawasqanchejta. Jinapis Bibliaqa waj jinasmantawan sonqochawanchej. Chay jina sonqochaytataj Bibliallapi tarisunman.

• Bibliaqa wañusqas mana sufrishasqankuta nin

  Eclesiastés 9:5 nin: “Wañusqasrí mana imatapis yachankuchu”, nispa. Biblia nillantaj, wañupojtinchej yuyayninchej chinkapusqanta (Salmo 146:4). Chayrayku Bibliapi wañuyta puñuywan kikinchakun (Juan 11:11).

• Bibliaqa Diosninchej munakuwasqanchejta nin

  Biblia nin: “Jehováa Diospa ñawisnenqa cheqan runasta qhawashan, ninrisninpis paykunaj mañakusqankuta uyarishan”, nispa (1 Pedro 3:12). Wakin runasqa ninku: “Diosmanta mañakoyqa waj runaswan parlariy jinalla”, nispa. Wakintaj ninku: “Orakoyqa imatachus ruwananchejta yachanallapaj yanapawanchej”, nispa. Jinapis Dioswan parlareyqa, mana chayllapichu yanapawanchej. Astawanqa Diosman chimpaykunanchejpaj yanapawanchej. Paytaj atiyninwan sonqochawasunman.

• Bibliaqa wañupoj familiaresninchejwan tinkukapunanchejta nin

  ¿Munawajchu wañusqa familiasniykita watejmanta rikukapuyta? Bibliaqa wañusqas kausarimunankumanta ashkhata parlan. Willawanchejtaj imaynachus chay tiempopi kausay kananta. Biblia nin: Diosqa “ñawisninkumanta tukuy waqayta pichanqa, manañataj wañuy kanqachu, nitaj llakiypis, nitaj qhapariypis, nitaj nanaypis. Chay ñaupaj kaj imasqa chinkapunña”, nispa (Apocalipsis 21:3, 4).

Jehová Diospi creej runasqa, yachanku wañusqa familiaresninkuwan tinkukapunankuta. Chaytaj paykunata mayta sonqochan. Anaj qosanqa, 65 watasta casarasqa kasqankutawan wañuporqa. Pay nin: “Bibliapi yachakuni, wañusqas mana ñakʼarishasqankuta, Diosninchejtaj paykunata kausarichimunanta. Qosaymanta sapa yuyarikojtiy, chaypi piensarispa sonqochakuni. Ajinamanta sinchʼi llakiyniyta aguantani”, nispa.

Taniamanta parlarerqanchejña. Pay nin: “Qosay wañupusqan diamantapacha, Jehová Dios yanapawasqanta yachani. Llakisqa kashajtiy pay sonqochawarqa. Qosay kausarimunanqa noqapaj sutʼi. Chaytaj kallpata qowan, qosaywan tinkukapunaykama aguantanaypaj”, nispa.

Chay iskay warmis jinallataj, may chhika runas Bibliaj nisqanpi creenku. Jinapis ichá nishanki: “Bibliaj nisqanqa cuentollachá”, nispa. Allin kanman Bibliamanta astawan yachakunayki. Ajinamanta reparanki, yuyaychaykunasnin sirvisqantapuni, nisqasninpis juntʼakusqantapuni. Chantá reparallankitaj, Biblia wañupojpa familiaresninta mayta sonqochasqanta.

¿ASTAWAN YACHAKUYTA MUNAWAJCHU?

Internetpi jw.org nisqapi, wañusqas kausarimunankumanta parlaj videosta tarinki.

¿WAÑUSQAS IMATAPIS SIENTENKUCHU?

¿Maymantaj wañupuspa rinchej? Bibliaj nisqanqa sonqochawanchej.

Kay videota PUBLICACIONES > VIDEOS nisqapi tariwaj (chaypajqa yaykuy: Biblia nisqaman)

¿SUMAJ WILLAYKUNATA UYARIYTA MUNAWAJCHU?

Kay tiempopi llakiy willaykunalla tiyan. ¿Sumaj willaykuna kanmanchu?

Astawan yachakunaykipajqa ENSEÑANZAS BÍBLICAS > FELICIDAD Y PAZ INTERIOR nisqaman yaykuy