¿Imallatapis Jehová Diosman quyta atisunmanchu?
1 ¿Imatá Diosman quyta atisunman? Abelqa, Jehovapaq uywasninmanta aswan sumaqninta qʼulachipurqa; Noé, Job ima kikillantataq ruwarqanku (Gén. 4:4; 8:20; Job 1:5). Chay ruwasqankuqa, mana Diosninchikpa qhapaq kayninman yapaykurqachu, imaptinchus tukuy ima kaqpis Ruwawaqninchikpata. Chay ruwasqankuwanqa, payta munakusqankuta rikuchirqanku. Ñuqanchikpis, Jehová Diosman, “alabanza sacrificiota”, quyta atisunman, tiemponchikwan, kallpanchikwan, kapuyninchikwan ima (Heb. 13:15, MOSOJ TESTAMENTON [MT]).
2 Tiemponchikwan. Ruwanasninchikmanta, astawan Diosmanta willamunapaq ‘tiempota aprovechayqa’, may allinpuni (Efe. 5:15, 16, MT). Ichapis tiempochakusunman, precursor auxiliarjina watapi juk killata chayri astawan killasta llamkʼananchikpaq. Chayri willaq lluqsispa 30 minutostawan willanapaq qhipakusunman, jinamanta killapi willayninchikqa, iskay horatawan yapakunqa.
3 Kallpanchikwan. Jehovap munayninta mana saykʼuspa ruwanapaq, llamkʼayninchik, wak ruwaykuna ima, mana anchata kallpanchikta qhichunawanchikchu tiyan. Chantapis imallamantapis anchata llakikuyqa, kallpanchikta pisiyachinman, nitaq Diosninchikpaq astawan ruwayta atisunmanchu (Pro. 12:25). Llakiyninchik kaptinpis, Jehová Diosman saqina, pay yanapanawanchikpaq (Sal. 55:22; Fili. 4:6, 7).
4 Kapuyninchikwan. Willayninchik ñawpaqman rinallanpaqpuni kapuyninchikmanta churallasunmantaq. Kaymanta parlaspa Pabloqa, kayjinata hermanosta yuyaycharqa: “tʼaqaychej mashkhallatapis”, pikunachus necesitaqkunata yanapanaykichikpaq (1 Cor. 16:1, 2). Ñuqanchikpis qullqita tʼaqasunman, qutuchakuypi necesitakusqanpaq, jinallataq Jallpʼantinpi Bibliamanta yachachikunanpaqpis. Jehová Diosninchikqa, sunqumantapacha pisitapis quptinchik may jatunpaq qhawan (Luc. 21:1-4).
5 Jehovaqa, tukuy imata quwanchik (Sant. 1:17). Chay quwasqanchikmanta, mayta pachis nisunman, tiemponchikta, kallpanchikta, kapuyninchikta ima, paypa munayninta ruwanapaq churaspa. Jinata ruwaspaqa, payta kusichinchik, “imaraykuchus Diosqa munakun pichus kusiywan qojta” (2 Cor. 9:7).