Diospa Llaqtanta Kamachiqkunap cartan
Munasqa hermanos:
Apóstol Pabloqa, iñiypi hermanosninman, tukuy imaymanamanta, paykunata munakusqanta, allinpaq qhawasqanta ima rikuchirqa. Qhawarinapaq, Romamanta hermanosninman jinata qillqarqa: “Jesucristonejta graciasta qoni Diosniyman tukuyniykichejmanta, imaraykuchus creesqaykichej uyarikushan tukuynejpi” (Rom. 1:8). Romapi kaq hermanosqa, tukuy chay jatun suyuntinpi, iñiyninkurayku, sunqu kʼajaywan willasqankurayku ima, may riqsisqas karqanku (1 Tes. 1:8). Chayraykuchá apóstol Pablo mayta paykunata munakurqa.
Pablojina, ñuqaykupis qamkunamanta yuyarikuspa Jehovaman graciasta quyku. Chantapis, qamkunata mayta munakusqaykuta yuyarichiyta munayku. Manallataq qunqakunachu Jehová sapa jukta munakuwasqanchikta. Chaywanpis yachayku, runa qamkunawan churanakuptinkupis, manapuni Diosmanta willayta saqisqaykichikta. ¡Maytachá Jehová kusikun, mana manchachikuspa, chiqa sunqu willamullasqaykichikmantapuni! (Pro. 27:11.)
Kay 2008 watamanta Anuario, rikuchin imaynatachus willayninkuta cristianos pachantinpi ruwachkasqankuta. Chaypitaq rikuchiwanchik imaynatachus Señor Jesucristo “atipaspa llojserqa, atipanallampajtaj”, kay anuariopitaq paypa qhipanta puriqkunata mana ni ima atipasqanta rikuchin (Apo. 6:2; Isa. 54:17).
Pablo Filipos llaqtamanta cristianosman jinata qillqarqa: “Sapa kuti qankunamanta yuyarikuspa, Diosniyman graciasta qonipuni [...] evangeliota willanaypaj yanapawasqaykichejmanta”, nispa (Fili. 1:3-5). Diospa Llaqtanta Kamachiqkunaqa, jinallatataq qamkunamanta niyku. Septiembre killa 2006 watamantapacha, 2007 watamanta agosto killakama, 236 suyuspi wak lugarespiwan, 6.691.790 Diosmanta willaqkuna, 1.431.761.554 horasta Diospa Reinonmanta runaman willamunku. Qamkunaqa, ¡mayta Diospa Reinonmanta willaypi yanapachkankichik! Kaypi tʼukuriychik, tukuyninchik mayta kallpachakusqanchikrayku, achkha runasta Jehovata riqsinankupaq yanapanchik, kaytaq Jehová Diosta mayta jatunchachkan.
Pablo Tesalonicamanta hermanosman qillqachkaptin, paykunamanta llakikuspa jinata nirqa: “Dios Tantachejpa ñawpaqempi mana saykʼuspa yuyarikuykupuni [...], Señorninchej Jesucristopi pacienciawan suyakusqaykichejmanta” (1 Tes. 1:2, 3). Kawsayninchikpiqa, chʼampaykuna kanpuni, chaywanpis sinchita sayanallapuni. ¿Qampata ima chʼampaykunataq kapusunki? ¿Unquyniykichu, Diospa nisqanta ruwanaykipaq mana atinatajina qhawachichkasunki? Ichapis, qusayki chayri warmiyki wañupun (Pro. 30:15, 16). Señorllapi casarakuna kamachiyta uyarisqaykirayku, ichapis Diospa llaqtan ukhupi casarakunaykipaq mana pitapis tariyta atinkichu (1 Cor. 7:39). Qullqi pisi kasqanrayku, ¿wawasniykita allinta uywanaykipaqchu mayta kallpachakuchkanki? Munasqa hermanos, mayqillanpis llakiyniykichik kachun, yuyariychik Diospa Reinonta ñawpaqman churaptiykichikqa, Jehová “mana qonqaponqachu ruwasqasniykichejmanta, jinallataj Diospa sutinta munakusqaykichejmantapis”. Chayrayku, ama saykʼuychikchu “allin kajta ruwaspa” (Heb. 6:10; Gál. 6:9).
¿Imataq mana urmanaykichikpaq yanapasunqachik? Tesalonicamanta hermanostajina, ‘Señor Jesucristopi pacienciawan suyakuy’ yanapasunqachik. Chayraykuchá, aswan qhipaman Pablo, ‘salvasqa kayta suyakuyta’ juk monterawan kikincharqa, mayqinchus mana allin yuyaymanta, iskayrayaymanta ima, jarkʼawanchik (1 Tes. 5:8).
Satanasqa, Dios kamachiq kasqanwan churanakurqa, ñuqanchik kusiywan llakiykunata muchuptinchiktaq, Satanás llulla kasqanta rikuchinchik. Supayqa nin: “runaqa, kasqanmantapacha munayninta maskʼaspalla, Diosta yupaychan. Diosta yupaychaspapis, ima llakiypis jamuptin, mana kay pachap tukukuynin chamuptin ima, Diosta manaña yupaychanqankuchu”, nispa. ¡Qamkunapis, Supay llulla kasqanta rikuchiyta atiwaqchik! Chantapis suyakuyniykichikqa, mana karupichu kachkan, manaqa astawan qayllaykamuchkan.
Pabloqa, hermanosninta sinchita sayasqankumanta, mana iñiyninkuta saqisqankumanta, mana michʼakuspa Diosmanta willamusqankumanta ima, allin ruwasqankuta nirqa. Kikillantataq ñuqaykupis allinta ruwasqaykichikta niyta munayku, chantapis qamkunata munakusqaykuta yuyarichiyta munayku. ¡Jinallatapuni llamkʼaychik!
Kay musuq watapi, Diospa munayninta ruwaypi may achkha tʼinkakunata japʼinaykichikta munayku. Munakuyniykuqa qamkunawan kachkan.
Hermanosniykichik,
Diospa Llaqtanta Kamachiqkuna.
[5, 6 paginaspi sutʼinchaynin]
Qillqanapaq