Yachachinapaq wakichiykuna

JEHOVAMANTA SUTʼINCHAQKUNAQA, Bibliamanta yachachiyta astawan jatunpaq qhawasqankurayku, ichá wakin runasqa yachaywasipi yachakuyta mana allinpaqchu qhawasqankuta yuyanku. Chay yuyasqankutaq mana chiqachu. Imaraykuchus yachachiqqa, wakkunaman yachachinanpaq allintaraq wakichikunan tiyan. Chayrayku Jehovamanta sutʼinchaqkunaqa, yachaywasiman yachakuq yaykuspapis, Diospa llaqtanpi yachachikusqanmanta astawan yachakullankutaq, allin wakichisqa kanankupaq. Kaytaq Jehovamanta sutʼinchaqkunata, wak runasta ima, allinta yuyanankupaq, allinta ruwanankupaq, Diosman astawan qayllaykunankupaq ima yanapan.

Chantá Jehovamanta sutʼinchaqkunaqa, suyunkupi runaman ñawiriyta, qillqayta ima yachachinankupaq, mayta kallpachakurqanku. Chaypaqtaq yachachinapaq yachachiykunata wakichirqanku.

Nigeriapiqa 1949 watapi ñawiriyta, qillqayta ima yachachiyta qallarirqanku. Ajinamanta chay llaqtapi achkha runas ñawiriyta, qillqayta yachakusqanku. Yachakusqanmanjina chay llaqtapiqa, pachakmanta, jisqʼun chunka Jehovamanta sutʼinchaqkuna, ñawiriyta, qillqayta ima yachakusqanku, mana Jehovamanta sutʼinchaqkunataq pachakmanta phichqa chunkalla ñawiriyta, qillqayta ima yachakusqanku. México suyupipis, 1946 watamantapacha Jehovamanta sutʼinchaqkunaqa, ñawiriyta, qillqayta ima runasman yachachisqanku. Uj watallapi 6.500 runas ñawiriyta, qillqayta ima yachakurqanku. Arí, 100.000 runasmanta astawan ñawiriyta, qillqayta ima yachakunankupaq yanapata japʼirqanku. Watas pasasqanmanjina Boliviapi, Camerunpi, Nepalpi, Zambiapi ima, runasman ñawiriyta, qillqayta ima yachachinankupaq yachachiykunata wakichillankutaq. Jehovamanta sutʼinchaqkunaqa Ñawiriyman qillqayman qukuy nisqa folletota 7 millosnesmanta astawan urqhurqanku, 100 kuraq qalluspi. 

Achkha suyusmanta, yachaywasipi kamachiqkunaqa, ñawiriyta, qillqayta ima yachachiy, may allin kasqanta reparanku. Chayrayku Mexicopi, yachaywasipi kamachiq, Jehovamanta sutʼinchaqkunata nin: “Kay llaqtap allinninpaq, runasman ñawiriyta, qillqayta ima yachachisqaykichikmanta, kay suyuta kamachiq, ñuqaniqta, mayta agradecesunkichik [...;] chantá yachachiyniykichikpi allillanpuni risunaykichikta nisunkichik”.

Tantakuyniykupi astawan yachakuyku

Jehovamanta sutʼinchaqkunaqa, Bibliamanta wak runasman yachachiyta may allinpaq qhawanku, chayrayku Bibliamanta yachachinankupaqqa, sapa kuti sumaqta wakichikunku. Jallpʼantinpi 119 mil kuraj qutuchakuykuna tiyan, sapa qutuchakuypitaq yachakuqkunata allinta ñawarinankupaq, allinta umallirichinankupaj ima wakichikun. Chantá wawas ñawiriyta yachakusqankutawan, sutinkuta qillqachikuyta atillankumantaq, runap ñawpaqinpi allinta parlayta yachakunankupaq, kay yachakusqankutaq kawsayninkupi, yachaywasipi yachakunankupaqpis yanapallantaq. Chayrayku achkha yachachiqkunaqa, Jehovamanta sutʼinchaqkuna waynas, sipaskuna ima, allinta parlasqankuta ninku.

Chantá, tukuy qutuchakuykunapi Jehovamanta sutʼinchaqkunapta Tantakunanku Wasipi juk biblioteca tiyan, chaypitaq achkha libros, diccionarios, wak libros ima kan. Kay bibliotecamanta librostataq, qutuchakuyman riqkuna, chay Tantakuna Wasipi ñawiriyta atinku. Qutuchakuypiqa, ñawiriyta yachananku may allin kasqanta nikun, chantá wawas astawan Diosmanta yachakunankupaq, sapa familiapta wasinkupi juk biblioteca kapunanta nikullantaq.

Wak yachachiykuna

Chantapis Jehovamanta sutʼinchaqkunaqa, paykunamanta wakinkuna misioneros kanankupaq yachachiykunasta wakichinku, chantá qharispaq, qutuchakuypi siervos ministerialesjina chayri ancianosjina astawan allinta yanapanankupaq, wak yachachiykunata wakichillankutaq. Kaykunataq Jehovamanta sutʼinchaqkuna yachakuyta allinpaq qhawasqankuta rikuchin.