17 Yachaqana
Compañerosniywan amigosta ruwakunay, ¿allinchu kanman?
“Wakin kuti juk qutu waynasta rikuspa yuyani: ‘¡Paykunaqa sumaq amigos kanku! Ñuqapis ajina amigosniyuq kayta munani’, nispa.” (José)
“Ñuqaqa usqhayllata amigosta ruwakuni. Chaytaq mana allinchu.” (María)
TUKUYPIS amigosniyuq kayta munanchik, paykunawan llakikunanchikpaq, kusikunanchikpaq ima. Diospa Churin Jesuspis amigosniyuq karqa, paykunawantaq kusikurqa (Juan 15:15). Kurkupi warkhusqa kachkaptin ‘munasqa discipulon’ Juanqa, payllawanpuni kachkarqa (Juan 19:26-27; 21:20). Ichá qampis chiqa amigosniyuq kayta munanki, llakiyniykipi chayri kusiyniykipi, qamwan khuska kanankupaq.
Ichá juk chayri iskay companerosniykiwan allinta apanakusqaykirayku, sumaq amigosta tarisqaykita yuyawaq. Qamjina yuyasqankuraykutaq, paykunawan parlaspa mayta kusikunki. Ni jaykʼaq niwaqchu saqra runas kasqankuta (1 Corintios 15:33). Ana nin: “Compañerasniywan sapa pʼunchay tinkuni paykunawan kachkaspataq mayta kusikuni; qutuchakuymanta hermanoswan kachkaspaqa, imata ruwanaypaqpis allintaraq qhawarikunay tiyan, compañerasniywan kachkasparí imayna runachus kasqayta rikuchiyta atini”. Chantapis ichá Luisajina yuyawaq, pay nin: “Compañerasniyman Jehovamanta sutʼinchaqkuna mana jukjina runaschu kasqanchikta rikuchiyta munarqani”, nispa. Qamrí, ¿imatá niwaq? ¿Allinchu kanman kay iskay sipaskunajina yachaywasipi compañerosniykiwan amigosta ruwakunayki?
Allinta qhawarikuy
Mariap kawsayninpi imachus kasqanmanta qhawarina. Tukuywan parlayta atisqanrayku pillawanpis amigosta ruwakullaq. Ajinata ruwasqanraykutaq, kay pachamanta runasjina yuyayta qallarirqa, nintaq: “Tukuy waynaswan, sipaskunawan ima, allinpaq qhawachikuyta munasqayrayku, pisimanta pisi Diosmanta karunchakurqani”, nispa. Luisaqa, kikin chʼampayllapitaq rikukurqa, nintaq: “Compañerasniyjina yuyayta qallarisqayrayku, paykunajina ruwayta qallarirqani”, nispa.
Chiqamanta, piwanpis amigollapuni kanapaqqa, payjina yuyana, ruwana ima kasqanta nisunman. Chayrayku, Diosta mana yupaychaqkunawan amigosta ruwakuspaqa, paykunajina ruwayta, yuyayta ima qallarinki (Proverbios 13:20). Chayrayku apóstol Pabloqa, Diosta mana yupaychaq runaswan amigosta mana ruwakunamanta parlaspa, nirqa: “Ama yugopijina tantakuychejchu [...] Diospi mana creejkunawan”, nispa (2 Corintios 6:14, Qheshwa Biblia).
Chayrayku, ¿imatá ruwawaq?
Apóstol Pablop nisqan, ¿ninayanchu colegioykimanta waynasta chayri sipaskunata manaña parlapayanaykita, paykunamanta karunchakunaykita ima? Mana. Imaraykuchus ‘tukuy laya runasta Jesuspa yachachisqasninman tukuchimunapaqqa’, tukuy laya runaswan parlarinanchik tiyan (Mateo 28:19, 20, Qheshwa Biblia).
Apóstol Pablo ajinata ruwarqa. Payqa ‘tukuy’ laya runaswan allinta parlaq, mana payjina creeptinkupis (1 Corintios 9:22, 23). ¿Payjina ruwayta atiwaqchu? Chaypaqqa compañerosniykiwan kʼacha kay. Chantá paykunata entiendenaykipaq, qamtapis entiendesunankupaq kallpachakuy. Chaywanpis ama paykunajina parlayta, ruwayta ima qallariychu. Atispaqa, imaraykuchus Bibliap kamachisqanmanjina kawsayta akllasqaykita llampʼu sunquwan sutʼinchay (2 Timoteo 2:25).
Chiqamanta mana compañerosniykijina yuyanaykipaqqa, mayta kallpachakunayki kanqa (Juan 15:19). Chaywanpis kaypi tʼukuriy: Juk barquitopi kachkaspa, pillatapis quchapi wañunayachkaqta rikunki chayqa, ¿imaynatá yanapawaq? ¿Quchaman yaykuspachu, chayri barquitoman wicharimunanpaq yanapaspachu?
Compañerosniykiqa, kikillanpitaq rikukunku. Imaraykuchus paykunaqa, mana Jehovap amigosninjinachu yanapayninta tarinku (Salmo 121:2-8). Chaywanpis compañerosniykita yanapayta munaspa, Diospa kamachiykunasninta pʼakinki chayqa, manaña kusisqachu kawsanki, nitaq Jehovapis allinpaqchu qhawasunqa (Efesios 4:14, 15; Santiago 4:4). Chayrayku, aswan allin kanman compañerosniykitaqa boteykiman wicharichinayki, nisunman Jehová Diosta yupaychanankupaq yanapanayki. Ajinata ruwaspaqa, chiqamanta juk sumaq amigo kasqaykita rikuchinki
BIBLIAMANTA
“Chay tukuyta ruwani evangeliorayku, chayllawampis yanapakoj kanaypaj.” (1 Corintios 9:23, Qheshwa Biblia)
JUK YUYAYCHAY
Ichá compañerosniyki religionniykimanta astawan yachayta munanqanku. Imatachus nisusqankuta allinta uyariy, parlanayki kaptintaq, “llampʼu sonqowan, paykunata sumajpaj qhawaspa” ima, parlay (1 Pedro 3:15).
¿YACHARQANKICHU?
Diospa achkha kamachisninqa, yachaywasimanta juk compañeronku mana manchachikuspa Diosmanta willasqanrayku, Bibliamanta yachakurqanku.
¡RUAYTA QALLARIY!
Yachaywasimanta juk compañeroywan sumaq amigota ruwakuni chayqa, kayta ruwasaq... ․․․․․
Yachaywasimanta mayqin compañerollaypis, Bibliapi creesqaymanta asipayawaptin, kayta ruwasaq... ․․․․․
Kay yachaqanamanta, ¿imatá tatayta chayri mamayta tapuyta munani? ․․․․․
QHAWASQAYMANJINA
● Chiqa cristianoswan amigosta ruwakunamanta nisqaqa, ¿imaraykutaq compañerosniykiwan amigosta ruwakuy atinapaqjinalla kasqanta niwaq?
● Diosta mana yupaychaq compañeroykiwan anchata purispa, ¿ima chʼampaykunapitaq rikukuwaq?
● Compañerosniykiman, Jehovamanta sutʼinchaq kasqaykita willasqayki, ¿imaspí yanapasunkiman?
[143 paginapi sutʼinchaynin]
“Wak waynasjina ruwasqayrayku, piwanpis amigosta ruwakuyta atillaq kani. Chʼampaypi rikukusparaq, ajinata ruwasqay mana allinchu kasqanta yacharqani. Kunanqa chiqa cristianosllawan amigosta ruwakuni pikunapichus atienekuyta atini.” (Daniel)
[146 paginapi dibujo/foto]
Pillatapis quchapi wañunayachkaqta rikuspa, ¿imaynatá yanapawaq? ¿Quchaman yaykuspachu, chayri imallatapis chuqaykuspachu chaymanta japʼikuspa lluqsimunanpaq?