[258 paginapi recuadro, dibujos/fotos]

Wak laya takiykunawanpis gustachikuy

Wiñasqaykimanjina wak mikhunasta mikhuywan gustachikusqaykirayku, ichá kunanqa 5 watayuqllaraq kasqaykimanta nisqaqa, imaymana mikhunasta mikhuy gustasunki. Jinallatataq wak laya takiykunata uyariywan gustachikuy. Arí, juk laya takiyllata uyarinaykimantaqa, wak laya takiykunatapis uyariy.

Chaypaqqa, ichá ima tocanallatapis tocayta yachakuwaq. Tocayta yachakuchkaspataq kusiyta tarinki, mana ancha riqsisqa takiykunatapis riqsinki. Chaywanpis ichá tapukunki: “Chayta ruwanaypaq, ¿maymanta tiempota urqhukuymanrí?”, nispa. Chaypaqqa, ichá manaña anchata teleta qhawanaykichu kanqa, nitaq videojuegospi pukllanaykichu kanqa. Qhawariy imatachus wakin waynas, sipaskuna ima, nisqankuta.

“Ima tocanallatapis tocayqa mayta kusichikun; imaraykuchus ajinamanta imaynachus sientekusqanchikta rikuchiyta atinchik. Mana riqsisqay takiykunasta takiyta yachasqayrayku, kunanqa, wak laya takiykunata uyariy gustawan.” (Brian, 18 watayuq, payqa guitarrata, pianota ima tocayta yachan, bateriatapis tocayta yachallantaq.)

“Juk tocanata allinta tocayta yachanaykipaqqa, kutin kutita tocanayki tiyan. Ichá kayta ruwachkaspa mana kusiyta tarinkichu. Chaywanpis sumaqta tocayta yachakuytawanqa, mayta kusikunki.” (Jimena, 13 watayuq, payqa violinta tocayta yachan.)

“Saykʼusqa chayri llakisqa kachkaspa, guitarrata tocay, allin sientekunaypaq yanapawan. Kʼachitu takiykunata takiyqa may sumaq.” (Vanesa, 20 watayuq, payqa guitarrata, pianota, clarineteta ima, tocayta yachan.)

“‘Mana jaykʼaq wakkunajina guitarrata tocayta atisaqchu’, nispa niq kani. Chaywanpis yachakuchkallarqanipuni. Kunantaq, allinta tocayta yachasqaymanta mayta kusikuni, wakkuna tocayta yachasqankutapis jatunpaq qhawani.” (Jacob, 20 watayuq, payqa guitarrata tocayta yachan.)

Paykunajina ruwanaykipaq: David

Davidtaqa, takiykunata uyariy mayta gustarqa, chantá sumaqta takiriyta, takiykunata qillqayta ima yacharqa. Tocanastapis ruwayta yachallarqataq (2 Crónicas 7:6). Sumaqta takiyta yachasqanrayku, Israelmanta reyqa, kamachina wasipi arpata tocananpaq waqyarqa (1 Samuel 16:15-23). Davidtaq, waqyarisqanta uyarikuspapis mana waqyasqanmanta runaykacharqachu, nitaq takiykunata uyariyta kawsayninpi ñawpaqman churarqachu. Astawanpis takiyta yachasqanwan Jehovata jatuncharqa.

¿Qamtari? ¿Takiykunata uyariy gustasunkichu? Ichá mana Davidjinachu sumaqta takiyta yachanki, chaywanpis payjina ruwayta atinki. Takiykunata uyariyta, ama kawsayniykipi ñawpaqman churaychu, nitaq saqiychu saqra ruwayman tanqasunanta, Diospa sutinta mana chʼichichanaykipaq. Kawsayniykipi kusirikunallaykipaq takiykunata uyariy. Takiykunata qillqayta yachay, uyarispa kusirikuy imaqa, Diospa regalon (Santiago 1:17). Davidqa, takiyta yachasqanwan Jehovata jatuncharqa, ¿qampis kikillantataqchu ruwanki?