3 yachachiy

Runap qallariynin

¿IMATAQ musuq kay dibujitupi? Ari, runa rikhurin. Paykunaqa ñawpa qhari, ñawpa warmi kanku. ¿Pitaq paykunata ruwarqa? Diosninchik. ¿Diospa sutinta yachankichu? Paypa sutinqa Jehová. Chantapis qharita Adán nispa suticharqa, warmitataq Eva nispa.

Diosninchikqa Adanta ñutʼu jallpʼamanta ruwarqa. Sumaqta ruwaytawan, Diosninchik sinqanman samayta phukuykuspa, Adanman kawsayta qurqa.

Diosqa juk llamkʼayta Adanman qurqa, animalkunata sutichananta nirqa. Adanqa maytacha animalkunata qhawarqa allinta sutichananpaq. Animalkunata sutichachkaspa, imatacha rikurqa, ¿imatataq rikunman karqari?

Animalkunaqa mana chʼullitallachu karqanku, chinataq, urqutaq karqanku, china allqu, urqu allqu, china misi, urqu misi ima. Adantaq sapitan kachkarqa. Chayrayku Diosninchikqa Adanta sumaqta puñuykuchiytawan waqtitanta urqhuspa, juk warmita Adanpaq ruwapurqa.

¡Adanqa warminta rikuspa maytachá kusikurqa! Evapis chay kʼachitu huertapi kasqanrayku maytacha kusikullarqataq. Kunanqa wawitasniyuq kayta atinkuman karqa, kusisqataq tiyakunkuman karqa.

Jehovaqa Adán Evawan wiñaypaq tiyakunankuta munarqa. Tukuy Jallpʼata Edén huertamanjina tukuchinankuta munarqa. ¡Adanwan Evawan chayta uyarispa maytacha kusikurqanku! ¿Adanjina kay Jallpʼata paraisoman tukuchiyta munawaqchu karqa? Chaywanpis, qhariwarmip kusiyninqa tukukurqa, ¿imaraykutaq? Qhawarina imaraykuchus.

Salmo 83:18; Génesis 1:26-31; 2:7-25.