22 yachachiy
Joseta wisqʼaykunku
JOSEQA 17 watayuq karqa Egiptoman apachkaptinku. Chaypiqa Potifar nisqa runaman ranqhaykurqanku. Potifarqa Egiptomanta reypaq llamkʼaq, Faraón nisqapaq.
Joseqa Potifarpaq sumaqta llamkʼaq. Chayrayku Potifarqa, Joseta wasinpi kamachinanpaq churarqa. Jina kaptinqa, ¿imaraykutaq José wisqʼasqa kachkan? Potifarpa warminrayku.
José runayaspa kʼachitu waynaman tukun, Potifarpa warmintaq Josewan puñuykuyta munarqa. Joseqa chay ruway mana allin kasqanta yacharqa, chayrayku mana chay warmiwan puñuykuyta munarqachu. Chay warmiqa mayta phiñakurqa. Chayrayku qusanman llullakuspa nirqa: ‘¡Chay Joseqa ñuqawan puñuykuyta munarqa!’, nispa. Potifarqa warminta uyarispa mayta Josewan phiñakurqa. Chayrayku Joseta wisqʼaykuchirqa.
Carcelta qhawaq runaqa, José chiqan runa kasqanta rikun. Chayrayku Joseta presosta qhawananpaq churan. Chaypacha Faraonqa coperonwan, tʼantata ruwaqninwan ima phiñakuspa wisqʼaykuchillarqataq. Juk chʼisi paykuna musquykukurqanku, manataq musquyninku niyta munasqanta yacharqankuchu. Qʼayantin José paykunata nirqa: ‘Willawaychik musqukusqaykichikta’, nispa. Josetaq Diospa yanapayninwan imachus musquyninku kasqanta willarqa.
José coperota nirqa: ‘Kimsa pʼunchaymantawan carcelmanta lluqsinki, juktawan Faraonman vinota jaywanki’. Chayrayku José nirqa: ‘Lluqsiptiyki, ñuqamanta Faraonman willariy, jinamanta ñuqapis lluqsipunaypaq’, nispa. Tʼantata ruwaqmanri nirqa: ‘Kimsa pʼunchaymanta Faraón umaykita qhuluchisunqa’, nispa.
Kimsa pʼunchayninman José nisqanqa juntʼakurqa. Faraonqa tʼantata ruwaqta wañuchirqa. Coperotataq carcelmanta kacharichiytawan llamkʼayninta kutichipurqa. ¡Coperoqa Josemanta qunqapurqa! Mana Faraonman Josemanta parlarqachu. Joseqa wisqʼasqallapuni qhipakurqa.