¿Ima suyakuytaj wañusqaspaj tiyan?

¿Wañusqas kausarimunkumanchu?

BIBLIA NIN: “Hora chayamonqa, chaypachataj tukuy pʼampasqa kajkunaqa Runaj Churimpa parlasqanta uyarenqanku. [...] Jatarimonqanku[taj]” (Juan 5:28, 29).

Jesucristoqa aswan qhepaman pay kamachishajtin, wañusqasta kausarichimunanta nerqa. Fernando, pimantachus ñaupaj yachaqanapi parlarerqanchej nin: “Juan 5:28, 29 versiculosta leeytawan tʼukushaj qhepakorqani. Chaypi nisqanqa sutʼi karqa, aswan qhepaman imachus kananmantataj manaña manchachikorqanichu”.

Diospa kamachin Jobqa, Dios kausarichinanta yacharqa. Job taporqa: “Sichus uj runa wañun chayqa, ujtawan kausanmanchu?”. Payllataj nerqa: “Tukuy kausayniypi [pʼampasqa kashaspa] suyasaj, kay tukuy llakiyniymanta sonqo tiyakuy jamunawankama. Qan wajyawanki, noqataj uyarisqayki” (Job 14:14, 15, Qheshwa Biblia, [QB]).

Lazaroj hermanan Martapis yacharqa wañusqas kausarimunankuta. Lázaro wañupusqantawan Jesús, Martaman nerqa: “[Hermanoyki] kawsarimonqa”. Martataj nerqa: “Arí, noqa yachani kawsarimunanta qhepa pʼunchaypi, wañusqas kawsarimonqanku chaypacha”. Jesustajrí payman nerqa: “Noqa kani kawsarimuy, kawsaytaj; pichus noqapi creejqa, wañuchumpis kawsanqa” (Juan 11:23-25). Chaymantataj Jesusqa Lazarota kausaricherqa. Chaytaj, imachus aswan qhepaman kananta yachanapaj yanapawanchej. Jallpʼantinpi may chhika runas kausarimusqankuta rikoyqa, ¡may sumajpuni kanqa!

¿Pikunataj janaj pachaman rinankupaj kausarimonqanku?

BIBLIA NIN: Diospa Palabranqa nin, Jesucristoj kausarimuynin mana waj runaspa kausarimuyninkuwan kikinchu kasqanta. Imaraykuchus chay pusaj runasqa Jallpʼapi kausanankupaj kausarimorqanku. Chaywanpis, Bibliapi ajinata nin Jesuspa kausarimuyninmanta: “Jesucristotaj janaj pachaman riporqa, chaypitaj Diospa pañampi tiyasqa kashan” (1 Pedro 3:21, 22). ¿Jesucristollachu janaj pachaman ripunanpaj kausarimunan karqa? Jesusqa aswan ñaupajta discipulosninman nerqa: “Ripuspaqa, qankunapaj uj cheqata wakichimusaj; chantá kutimuspa, pusasqaykichej maypichus noqa kasaj, chaypi qankunapis kanaykichejpaj” (Juan 14:3).

Jesucristoqa, janaj pachaman rerqa wakin discipulosninpaj uj cheqata wakichej. Biblia nisqanman jinataj 144.000 runas janaj pachaman renqanku (Apocalipsis 14:1, 3). ¿Imamantaj renqanku?

Paykunaqa ashkha imasta ruwanqanku. Biblia nin: “Kusikuyniyojmin, Diospaj tʼaqasqataj kanku pikunachus ñawpaj kaj kawsarimpuypi kawsarimpojkunaqa. Qhepan kaj wañoyqa manaña paykunata imanayta atinchu, astawampis, paykunaqa Diospata Cristojtawan sacerdotesninku kanqanku, paywantaj waranqa watasta kamachenqanku” (Apocalipsis 20:6). Tukuyninku reyestaj sacerdotestaj kanqanku, Jesuswantaj Jallpʼata kamachimonqanku.

¿Pikunataj Jallpʼapi tiyanankupaj kausarimonqanku?

BIBLIA NIN: Apóstol Pabloqa jinata nerqa: “Diospi suyakullanitaj tukuy runas wañuymanta kawsarimpunankuta, cheqan kajta ruwajkuna, sajrata ruwajkunapis” (Hechos 24:15).

Pablo nisqanman jina, ¿pikunataj kanku “cheqan kajta ruwajkuna”? Danielmanta parlarina. Payqa Diospa cheqa sonqo profetan karqa. Diosqa, Danielta niraj wañupushajtin nerqa: “Samarikunki. Qhepa pʼunchaykunapitaj jatarikunki tʼinkaykita japʼikapunaykipaj” (Daniel 12:13). ¿Maypitaj Daniel kausarimonqa? Biblia nin: “Cheqan runasqa kay pachata herenciankupaj japʼenqanku, chaypitaj wiñaypaj kawsanqanku” (Salmo 37:29). Jesuspis nillarqataj: “Kusikuyniyojmin kanku llampʼu sonqoyojkunaqa, imaraykuchus paykuna kay pachata herenciankupaj japʼenqanku” (Mateo 5:5). Daniel, chantá Diospa waj cheqa sonqo kamachisninpis Jallpʼapi tiyakunankupaj kausarimonqanku, wiñaypajtaj kusisqa kausakonqanku.

Pablo nisqanman jina, ¿pikunataj kanku ‘sajrata ruwajkuna’? Paykunaqa kanku Bibliaj yachachisqanta mana rejsispa, nitaj chayman jina kausaspa wañupojkuna. Kausarimuspaqa Jehovamantaa, Jesusmanta yachakonqanku, paykunatataj jatunpaj qhawanqanku (Juan 17:3). Diosta sirviyta ajllajkunaqa wiñaypaj kausanqanku.

¿Imaynataj Jallpʼapi kausay kanqa?

BIBLIA NIN: Diosqa “tukuy waqayta ñawisninkumanta pichanqa, manañataj wañuy kanqachu, nitaj waqaypis, nitaj qhapariypis, nitaj nanaypis” (Apocalipsis 21:4). “Chaypi wasista ruwakuspa, tiyakonqanku. Uva huertasta churanqanku, poqoynintataj mikhonqanku” (Isaías 65:21).

Familiaresniykiwan kusisqa kausakunaykipi tʼukuriy. Jinapis, ¿imaynatá yachanchej chay kanantapuni?