Tukukuynin

1, 2. ¿Imaraykú creeyninchejta usqhayllata wiñachinanchej tiyan? Uj kikinchaywan sutʼinchay.

CREEYQA, uj sumaj kʼacha kay may valorniyojtaj. Chay kʼacha kaymanta parlaspataj imallatapis usqhayllata ruwaymanta parlarillasunmantaj. ¿Imaraykú? Imaraykuchus niraj creeyniyojchu kanchej chayqa, usqhayllata creeyninchejta wiñachinanchej tiyan; creeyniyojña kaspatajrí, usqhayllata creeyninchejta jarkʼananchej, kallpachananchej ima tiyan. ¿Imaraykú?

² Chʼin pampata rishasqaykipi tʼukuriy. Yakumantataj mayta chʼakishasunki, yakuta tariytawantaj inti mana chʼakichinanpaj tukuy imata ruwanki. Chayanaykiman chayanaykikama kanallanpajpunitaj, imaynallamantapis yapaykuriyta munanki. Creeyninchejqa yaku jinallataj, kay pachataj chʼin pampa jina. Chayrayku creeyninchej mana chinkapunanpaj usqhayllata jarkʼananchej, kallpachananchej ima tiyan. Imaynatachus yakuta mana ujyaspa wañupusunman, jinallataj Dioswan allinpi kasqanchejpis, mana creeywanqa wañupunman (Rom. 1:17).

3. ¿Imastá Jehová creeyninchejta wiñachinallapajpuni qowanchej, chantá imastá ruwana tiyan?

³ Jehovaqa, creeyniyoj kayta necesitasqanchejta, kay tiempopi creeyninchejta wiñachiyta, creeyniyojllapuni kayta mana atillasqanchejta ima yachan. Chayraykutaj creeyniyoj kamachisninmanta Palabranpi qhelqacherqa paykuna jina ruwanapaj. Apóstol Pablonejtataj “creespa, pacienciawan Dios qonanta nisqanman jina herenciata japʼinku, chaykunaj ruwasqasninkuta jina qankunapis ruwallaychejtaj”, nispa yuyaychawanchej (Heb. 6:12). Chayrayku Diospa llajtanqa, ñaupa tiempomanta Diospa kamachisninpa creeyninkumanta yachakunata yuyaychawanchej, pikunamantachus kay libropi yachakorqanchej chaykunamanta jina. ¿Imatá kunan ruwananchej tiyan? Creeyninchejta kallpachanallanchejpuni tiyan, imatachus suyakushasqanchejpipis yuyanallanchejpuni tiyan.

4. ¿Imatá Satanás creeyninchejta chinkachinanpaj ruwashan, chantá imaraykutaj contranpi sayayta atinchej?

⁴ Creeyninchejta kallpachanallapuni. Creeyninchejpa enemigonqa Satanás, pichus kay pachata chʼin pampaman jina tukuchin, maypichus creeyqa chinkapun, creeyniyojllapuni kaytaj mana atikullanchu. Satanás noqanchejmanta aswan atiyniyoj kajtinpis, creeyninchejta wiñachiyta, kallpachayta ima atinchej. Jehovataj, cheqa creeyniyoj kayta maskʼajkunaj amigon. Yanapayninwantaj Kuraj Supaypa contranpi sayayta atisun, Kuraj Supaytaj noqanchejmanta ayqenqa (Sant. 4:7). Chaypajtaj sapa pʼunchay Jehovapi atienekusqanchejta kallpachananchej tiyan. ¿Imaynamantá?

5. ¿Imaynatá ñaupa tiempomanta Diospa kamachisnin creeyninkuta wiñacherqanku?

⁵ Qhawarqanchej jina, ñaupa tiempomanta Diospa kamachisnenqa mana creeyniyojchu nacekorqanku. Astawanqa espíritu santoj yanapaynillanwan creeyninkuta wiñacherqanku (Gál. 5:22, 23). Paykunaqa Diosmanta yanapata mañakoj kanku, Diostaj creeyninkuta kallpachaspa kutichej. Noqanchejpis paykuna jinallataj Diosmanta mañakuna, Diostaj munayninman jina mañakojtinchej, mañakusqanchejman jina ruwajtinchej ima, espíritu santota qowasunchej (Luc. 11:13). ¿Imatawan ruwasunman?

6. Diospa kamachisninmanta allinta yachakunapaj, ¿imatá ruwasunman?

⁶ Kay libropeqa Diospa wakin kamachisninpa creeynillankumanta yachakorqanchej, chaywanpis may ashkharaj tiyan (Hebreos 11:32 leey). May allin kanman sapallanchejpi Bibliata ukhunchashaspa sapa ujninkumanta sumajta yachakunanchej. Usqhay usqhayllata leesunchej chayqa, mana creeyninchejta kallpachasunchu. Paykunamanta allinta yachakunapajqa, imaynatachus kausakusqankumanta, ima chʼampaykunachus jaqay tiempopi kasqanmanta ima astawan ukhunchana tiyan. Chantapis paykuna kausashallankumanpunipis jina kananpajqa, mana qonqanachu tiyan paykuna “noqanchej jina runalla” kasqankuta (Sant. 5:17). Paykunapis kasunman jina yuyasun chayqa, chʼampaykunasninchejpi jina rikukuspa imaynatachus llakikusqankuta entiendeyta atisun.

7-9. 1) ¿Imaynataj ñaupa tiempomanta Diospa kamachisnin sientekunkuman karqa, kunan Diosta yupaychanchej jinata Diosta yupaychankuman karqa chay? 2) ¿Imaraykú ruwasqanchejwan creeyninchejta kallpachana tiyan?

⁷ Chantapis creeyninchejta kallpachallasunmantaj Jehová imatachus kamachiwasqanchejta juntʼaspa, imaraykuchus ‘mana ruwasqasniyoj creeyqa wañusqa kashan’ (Sant. 2:26). Ñaupa tiempomanta Diospa kamachisnenqa, Jehová llankʼayta qowasqanchejta may kusiywanchá japʼikunkuman karqa.

⁸ Sutʼincharinapaj, ¿imayná Abraham sientekunman karqa, Jehovata Tantakuna Wasispi, jatun tantakuykunapi yupaychanman karqa chay, manataj chʼin cheqaspi rumimanta altarespichu? Payqa, maytachá kusikunman karqa “karullamanta” rikusqan imasta sumajta sutʼinchakojta uyarispa (Hebreos 11:13 leey). Eliaspi tʼukurinallataj, Baalpa profetasninta wañuchinanpaj kamachisqa kananmanta, chayri lantita yupaychajpa kamachiyninpi Diosta yupaychananmanta nisqaqa, wasimanta wasi willamunallanpaj kamachisqa kanman karqa chay, ¿imayná sientekunman karqa? Cheqamantapuni paykunaqa, Dios qowasqanchej llankʼayta tukuy sonqo japʼikunkuman karqa.

⁹ Chayrayku ruwasqasninchejwan Jehovapi creeyninchejta kallpachanallapuni. Jinamanta Diospa kamachisninmanta yachakusqanchejman jina ruwasunchej. Chantá kay libroj qallariyninpi nerqanchej jina, paykunaqa sumaj amigosninchejman tukonqanku. Imaraykuchus pisi tiempomantawan paykunata rejsiyta atisunchej.

10. ¿Imamantá paraisopi mayta kusikusunchej?

¹⁰ Imatachus suyakushasqanchejpi yuyana. Ñaupa tiempomanta Diospa kamachisnenqa, Jehová suyakuyta qosqanwan kallpachakoj kanku. ¿Jinallatatajchu ruwanchej? Cheqan runas kausarimushajtinku, Diospa kamachisninwan tinkuy may kusiychá kanqa (Hechos 24:15 leey). ¿Paykunata imastachus tapurinaykipi tʼukurerqankiñachu?

11, 12. ¿Imatá tapuriyta munawaj mosoj pachapi 1) Abelta? 2) Noeta? 3) Abrahamta? 4) Rutta? 5) Abigailta? 6) Esterta?

¹¹ Abelta ichapis tapuriyta munawaj imaynachus tatasnin kasqankuta, chayri Edén huertata qhawanankupaj churasqa querubineswan maykʼajllapis parlarisqantachus manachus. Noeta ichapis tapuriyta munawaj jatunkaray runasta manchachikusqantachus manachus chayri imaynatachus uj watata arcapi animalesta qhawasqanta. Abrahamtataj ichá tapuriyta munawaj Ur llajtata saqeyta atillasqantachus manachus, chantá Jehovamanta Sempunichus yachachisqanta chayri wajchus.

¹² Ichá cheqa sonqo warmistapis tapuriyta munallawajtaj. Sutʼincharinapaj, ichá yachayta munawaj, imachus Rutta, Jehovata yupaychananpaj tanqasqanta. Chayri ichá yachayta munawaj Abigail, Davidta yanapasqanmanta qosan Nabalman willayta manchachikusqantachus manachus. Mana chayri ichá yachayta munallawajtaj Esterpa, Mardoqueojpa kausayninku imaynachus kasqanta Persia suyupi salvakusqankumanta astawan qhepaman.

13. 1) Cheqan runas kausarimojtinku, ¿imatá ichá tapuriwasun? 2) Ñaupa tiempomanta Diospa kamachisninwan tinkunaykita yachaspa, ¿imayná sientekunki?

¹³ Chantapis ñaupa tiempomanta Diospa kamachisnenqa maytachá tapurillawasuntaj. May sumajtaj kanqa paykunaman willay kay qhepa pʼunchaykunamanta, imaynatachus Jehová llajtanta chʼampaykunapi rikukojtin yanapasqanmanta. Paykunaqa imaynatachus Jehová munayninta juntʼasqanta rikuspa maytachá kusikonqanku. Noqanchejpis mayta kusikullasuntaj, imaraykuchus paykunawan parlariyta atisunchej, manañataj yuyaynillanchejpichu kanqanku. Chay pʼunchay chayamunankamataj, paykunamanta leeshaspa paykunata rikushasunmanpis jina tʼukurina. Paykuna jina creeyninchejta rikuchisun chayqa, paykunawan khuska wiñay wiñaypaj Jehová Diosta yupaychasunchej.