CRISTIANO KAUSAYNINCHEJ

“Hermanoykiwan ñaupajta allinyakamuy”

Uj israelita altarpa ñaupaqenpi jaywananta saqespa, hermanonwan allinyakamoj rishan

Jesuspa tiemponpi uj israelitamanta parlarina. Payqa Galilea jallpʼamanta karqa. Chay israelitaqa Jerusalenman risqa, Chʼujllas nisqa fiestaman. Jinapis mana payllachu Jerusalenpi kasharqa. May chhika israelitaspis chayman rillasqankutaj. Chay israelitaqa Jehová Diosman jaywananpaj uj cabritata apakusqa. Chayrayku temploman cabritan aysarisqa risqa. Jerusalén llajtaj callesninpeqa runasqa kʼiskilla purisharqanku. Ajina juntʼa kajtinpis, chay israelitaqa temploman chayarqa. Chaypitaj runasqa juntʼallataj kashasqanku, jaywanasninkuta Jehovaman qoyta munaspa. Chantá sacerdoteman cabritanta jaywananpaj turnun chayamusqa. Jinallapi ujnin israelita masin paypaj phiñasqa kasqanta yuyarikorqa. Chay phiñasqa israelitarí mana chaypichu kasharqa, llajtataj manchay jatun karqa. ¿Imatá cabritanta apaj israelita ruwanan kanman? Jesusqa yuyaycharqa, Diosman jaywanata qojkunaqa mana piwanpis phiñasqa kanankuchu kasqanta (Mateo 5:24 leey). Noqanchej chaypi kasunman chay, ¿imatá ruwasunman? Kay urapi iskay listas rikhurin. Chay listasmanta mayqentachus ruwananchej kasqanta ajllay.

PITAPIS SONQONTA NANACHEJTINCHEJ

Chay hermanowan parlarimuna tiyan, noqanchejpuni sonqonta nanachisqanchejta reparakojtillanchej.
Hermanoman nina: “Imarayku ajina kankiri. Chay rato imitamantapis sienterpakunki, qanpis juchayoj kankeqa”, nispa.
Tratawajtinchejpis hermanota pacienciawan uyarina. Mana juchayojchu kanchej chaypis, sonqomantapacha perdonta mañakuna.

SONQONCHEJTA NANACHIWAJTINCHEJ

Congregacionmanta waj hermanosman cuentakamuna, kutikunawanchejpaj.
Uyanpi nina paypuni juchayoj kasqanta, imatachus ruwawasqanchejtataj ujsitumanta ujsitu yuyarichina.
Hermanonchejta tukuy sonqo perdonana tiyan. Imajtinchus noqanchejwan parlarej jamunanpajqa, llampʼu sonqo karqa, maytataj kallpachakorqa.

Kay tiempopeqa, manaña ñaupa tiempopi jinachu Jehová Diospaj uywasta qʼolachipunchej. Jinapis Jesús yachachisqanman jina, ¿Diosninchej allinpajchu qhawanqa payta yupaychasqanchejta, uj hermanowan phiñanasqa kashanchej chay?