Jesuspa ñaupaj milagron

Natanael Jesusta rejsisqanmanta kinsa dianman, Jesusqa yachachisqasninwan khuska Galilea jallpʼaman rerqa. Paykunaqa uj casamientoman invitasqa karqanku. Chay matrimonioqa Caná ranchopi karqa, mayqenchus Natanaelpa llajtan karqa, chaypi. Chay ranchoqa Jesuspa llajtan Nazaretmanta pata ladonpi karqa, lomarara lugarpitaj.

Jesuspa maman Mariapis chay casamientoman rillarqataj. Casarakojkunaqa Mariaj allin rejsisqasnin karqanku. Chayrayku Mariaqa casamientopi mayta yanapakusharqa. Jinapi vino tukukapusqanta reparaspa, Jesusman nerqa: “Vinonku mana kanñachu”, nispa (Juan 2:3).

Mariaqa ichapis Jesusman chayta nerqa, casarakojkunata imaynallamantapis yanaparinanpaj. Jesustajrí payman nerqa: “Mamáy, ¿ima ruwananchej tiyan chaywanri?”, nispa (Juan 2:4). Jesusqa ichá chayta nerqa, Diospa ajllasqan Rey kasqanrayku. Payqa manaña familiasninpa chayri rejsisqasninpa nisqankutachu ruwanan karqa, manachayqa cielopi Tatanpa munayninta. Chayraykuchá Mariaqa manaña imatapis Jesusman nerqachu. Jinapis casamientopi yanapakojkunaman nerqa: “Paypa tukuy nisqanta ruwaychej”, nispa (Juan 2:5).

Casamiento wasipeqa sojta rumi pʼuñus karqa. Sapa pʼuñumantaj 40 litrosmanta astawan yaykoj. Jesusqa yanapakojkunaman nerqa: “Kay pʼuñusman yakuta juntʼarachiychej”, nispa. Chantá nillarqataj: “Kunanqa uj chhikata wiserqospa, casamiento cargoyojman apaychej”, nispa (Juan 2:7, 8).

Casamientomanta encargadotajrí chay vinota llamiriytawan, casarakojta wajyacherqa. Paymantaj nerqa: “Runasqa sumaj vinotaraj ñaupajta jaywakuyta yachanku, runas macharisqaña kajtinkutaj as mana walej vinollataña jaywakunku. Qanrí kay qhepakama sumaj vinota waqaychasqanki”, nispa (Juan 2:10). Payqa mana yacharqachu, chay sumaj vinotaqa Jesús milagronejta rikhurichisqanta.

Chaytaj Jesuspa ñaupaj milagron karqa. Yachachisqasnenqa chay milagrota rikuspa, astawan paypi creerqanku. Chay qhepata, Jesusqa mamanwan hermanosninwan ima Capernaum llajtaman rerqanku. Chay llajtaqa Galilea qocha kantupi kasharqa.