Uj imillitata kausarichin

Yachakorqanchej jina, Jesusqa yawar apaywan onqosqa warmita sanoyacherqa. Jairotaj chayta rikorqa. Chayrayku yacharqa, Jesús wawanta sanoyachiyta atisqanta. Jinapis Jairoqa yuyarqa ‘imillitan wañupusqantaña’ (Mateo 9:18). Jesusrí, ¿Jairoj wawanta yanaparqachu? Chayta yachakuna.

Yawar apayniyoj warmiwan Jesús parlashajtillanraj, Jairoj wasinmanta wakin runas chayamorqanku. Jairomantaj nerqanku: “Imillitayki wañupunña. Amaña Yachachejta imatapis niychu”, nispa (Marcos 5:35).

Jairoqa chayta uyarispa ni imanakuyta aterqachu. Payqa wajkunata yanapayta yachaj, jinapis ni imaynamanta wawanta yanapariyta aterqachu. Imajtinchus kʼata wawitanqa wañupusqa. Jesusqa imatachus Jairoman willasqankuta uyarerqorqa. Chayrayku Jairota nerqa: “Ama llakikuychu, creellaypuni”, nispa (Marcos 5:36).

Chantá Jesusqa Jairowan khuska rerqa. Jairoj wasinman chayaspataj, payqa rikorqa runasta jikʼun jikʼunta sinchʼita waqashajta. Chayrayku Jesusqa chay runasman nerqa: “Imillitaqa mana wañupunchu, puñushallan”, nispa (Marcos 5:39). Runastajrí chayta nisqanmanta Jesusta asipayarqanku. Imaraykuchus paykunaqa yacharqanku imillita wañupusqantapuni. Chanta, ¿imajtintaj Jesús nerqa “imillitaqa mana wañupunchu” nispa? Imajtinchus payqa Diospa atiyninwan runasta kausarichiyta aterqa. Imaynatachus uj puñushaj runata rijchʼarichinchej, ajinata.

Jesusqa Jairoj wasinmanta tukuyta jawaman llojsicherqa. Chantá imillitaj tatanta, mamanta, Pedrota, Santiagota, Juantawan pusaykorqa maypichus imillita kasharqa, chayman. Jesusqa imillitata makinmanta japʼiykuspa nerqa: “‘Tál·i·tha cú·mi’, nispa, chaytaj niyta munan: ‘Sipasita, qanta niyki: Jatarikuy’” (Marcos 5:41). Sipasitataj chay ratopacha sayarispa purirerqa. Chayrayku tatanwan mamanwanqa maytapuni kusikorqanku. Chantá Jesusqa paykunaman kamacherqa imillitaman mikhunata jaywanankuta.

Jesusqa pikunatachus sanoyacherqa, chay runasman kamacherqa: “Amapuni pimanpis kaytaqa willankichu”, nispa. Jairomanwan, señoranmanwanpis ajinallatataj kamacherqa. Jinapis Jesús imillitata kausarichisqanqa, tukuy “qaylla llajtaspi yachakorqa” (Mateo 9:26). Arí, familianchejmanta pillapis kausarichisqa kajtenqa, tukuy runasmanchá chayta willarisunman. Jesusqa Jairoj imillitanta kausarichispa iskay runastaña wañuymanta kausarichisharqa.