Jesuspa sepulturanman rerqanku chay warmisqa, sepulturata chʼusajllata rikuspa tʼukorqanku. María Magdalenataj chay rato “correspa rerqa Simón Pedroman, chay waj yachachisqamanwan, pitachus Jesús munakorqa chayman”, nisunman apóstol Juanman (Juan 20:2). Sepultura chaynejllapi qhepakoj warmistajrí uj angelta rikorqanku. Sepultura ukhupipis waj angelta “yuraj ropayojta” rikullarqankutaj (Marcos 16:5).

Ujnin angelqa chay warmista nerqa: “Ama manchachikuychejchu. Noqa yachani Jesusta maskʼashasqaykichejta, pitachus kʼaspipi wañucherqanku, chayta. Payqa mana kaypiñachu. Nisqanman jina kausarinpun. Jamuychej, qhawaykuychej maypichus kasharqa, chayta. Chayrayku, usqhayllata rispa yachachisqasninman willamuychej: ‘Wañusqas ukhumanta kausarinpun. Payqa ñaupaqeykichejta Galileaman rishan’”, nispa (Mateo 28:5-7). Chantá “chay warmisqa sepulturamanta usqhayllata llojsispa, mancha manchalla”, kusisqataj kachaykukorqanku Jesuspa yachachisqasninman willamoj (Mateo 28:8).

Chaykamataj Mariaqa Pedrota, Juanta ima tariparqaña. Payqa may saykʼusqa nerqa: “Señorta sepulturamanta apakapusqanku, manataj yachaykuchu maymanchus churasqankuta”, nispa (Juan 20:2). Pedrowan Juanwantaj sepulturaman correrqanku. Juantajrí aswan usqhayta correspa ñaupajta chayarqa. Sepulturata qhawaykuspataj lino telasllata churarayashajta rikorqa, manataj yaykorqachu.

Simón Pedrotajrí qhepanta chayaspa sepulturaman cheqanta yaykorqa. Chay ukhupitaj rikorqa lino telasta, Jesuspa umanpi karqa chay pañota ima. Chantá Juanpis yaykullarqataj. Payqa chay imasta rikusparaj Mariaj nisqanta creerqa. Jinapis Jesusqa nerqaña kausarimunanta. Paykunatajrí mana entienderqankuchu (Mateo 16:21). Chayrayku tʼukuspa kutiporqanku. Mariatajrí sepulturanman kuterqa, chayllapitaj quedakorqa.

Chaykamataj chay ujkuna warmisqa, Jesús kausarinpusqanta yachachisqasninman willaj corresharqanku. Ñanpitaj Jesusqa paykunawan tinkuspa nerqa: “Imaynalla”, nispa. “Paykunataj Jesusman chimpaykuytawan kʼumuykukorqanku”. Jesustaj nerqa: “Ama manchachikuychejchu. Rispa hermanosniyman willamuychej, Galileaman rinankuta. Chaypi noqawan tinkukonqanku”, nispa (Mateo 28:9, 10).

Chay día niraj sutʼiyamushajtenqa, Jesuspa sepulturan chaynejpi uj terremoto pasarqa, wakin angelestaj Jesuspa sepultaranpi rikhurerqanku. Soldadostaj chayta “rikuspa mancharikuywan kharkatitisqanku, pachanpitaj titiyarpasqanku”. Chantá “soldadosqa llajtaman rispa, kuraj sacerdotesman willamorqanku chay tukuy imasta”. Kuraj sacerdotestaj judiospa kurajkunanwan tantakorqanku. Paykunaqa nerqanku soldadosman pagaykunankuta chʼinlla kanankupaj. Chantá soldadosta nerqanku: “Qankunaqa ninaykichej tiyan: ‘Yachachisqasnin tuta jamuspa ayanta suwasqanku, puñunaykukama’, nispa” (Mateo 28:4, 11, 13).

Jinapis chayta nejtinkoqa wañuchisqa kankuman karqa. Chayrayku sacerdotesqa nerqanku: “Pilato chayta yachajtenqa noqayku paywan parlasqayku, manataj chaymanta llakikunaykichejchu kanqa”, nispa (Mateo 28:14). Soldadostaj chay qolqeta japʼispa, yachachisqa kasqankuman jina parlarqanku. Chay llullakusqankutaj tukuy judiosman chayarqa.

Chaykamataj María Magdalenaqa sepultura chaynejllapiraj waqaspa kasharqa. Chantá sepulturata qhawaykorqa, rikorqataj yuraj ropasniyoj iskay angelesta. Chay angelesqa tiyasqa kasharqanku, Jesuspa ayan churasqa karqa chaypi, ujnenqa cabeceranpi ujnintaj jaytʼananpi. Paykunataj María Magdalenata taporqanku: “¿Imaraykutaj waqashankiri?”, nispa. Paytaj nerqa: “Señorniyta apakapusqanku, manataj yachanichu maymanchus churasqankuta”, nispa. Chayta niytawan qhepaman kutirispa, uj runata sayashajta rikorqa. Chay runapis tapullarqataj: “¿Pitataj maskʼashankiri?”, nispa. Mariataj huertata qhawaj runa kasqanta yuyaspa nerqa: “Wiraqochíy, qanchus apakaporqanki chayqa willaway maymanchus churasqaykita, noqataj apakapusaj”, nispa (Juan 20:13-15).

Mariaqa Jesuswan parlasharqa, nitaj repararqachu pay kasqanta. Jinapis “¡María!” nejtinraj repararqa Jesús kasqanta. Chantá manchay kusisqa nerqa: “¡Rabboni!”, nispa. Chaytaj niyta munan: “¡Yachachejníy!”. Chantá ichapis cieloman ripunanta yuyaspa Jesusta japʼiykorqa. Jesustaj nerqa: “Amaña japʼiwaychu. Imaraykuchus manaraj Tataypaman wicharishanichu. Astawanpis hermanosniyman willamuy Tatayman Tataykichejman, Diosniyman Diosniykichejman wicharipushasqayta”, nispa (Juan 20:16, 17).

Mariataj, apostolesman waj yachachisqasman ima, imastachus rikusqanta willaj correrqa. Chayaytawantaj nerqa: “¡Señorta rikuni!”, nispa. Chantá Jesuspa nisqanta paykunaman willarqa (Juan 20:18). Apostolestajrí uyarerqankuña Jesús kausarinpusqanta. Imaraykuchus angelesta rikorqanku chay warmis, chayta paykunaman willasqankuña. Jinapis cuentolla kasqanta yuyarqanku. Chayraykutaj mana Mariata creerqankuchu (Lucas 24:11).

Jesuspa yachachisqasnenqa domingo 16 de nisanpi, Jesuspa sepulturan chʼusajlla rikhurisqanmanta llakisqalla kasharqanku (Mateo 28:9, 10; Lucas 24:11). Chay día tarde ladota jina, Cleopaswan waj yachachisqapiwan, Emaús ranchoman risharqanku. Chaytaj Jerusalenmanta 11 kilometrospi jina kasharqa.

Paykunaqa ñanta rishaspa, imaschus chay día pasasqanmanta parlasharqanku. Chayllapitaj uj forastero paykunaman qayllaykuspa taporqa: “¿Imamantapunitaj chay jinata parlaykushankichej purej jinari?”, nispa. Cleopastaj nerqa: “Kaypi tiyakuspapis, ¿nichu yachanki imachus Jerusalenpi kunallanraj kasqanta? ¿Forasterochu kanki?”, nispa. Chay runataj nerqa: “Chantá, ¿imataj karqari?”, nispa (Lucas 24:17-19).

Paykunataj kuticherqanku: “¿Nichu yachanki Nazareno Jesusta imatachus ruwasqankuta? [...] Noqaykoqa suyasharqayku paypuni Israel nacionta librananta”, nispa (Lucas 24:19-21).

Chantá chay forasteroman willarerqanku imachus chay día pasasqanta. Paykuna nerqanku wakin warmis Jesuspa sepulturanta chʼusajllata taripasqankuta, angelestataj rikusqankuta. Chantapis chay forasteroman nerqanku: “Chay angelesqa paykunaman nisqanku Jesús kausakushasqanta. Noqaykumanta wakinpis, sepulturaman rispa chʼusajllata tarisqanku, chay warmis nisqankuman jina”, nispa (Lucas 24:24).

Cleopaswan compañeronwanqa, nirajpuni entienderqankuchu chay día imachus pasasqanta. Chay forasterotaj paykunata yanaparqa Jesús kausarimusqanpi creenankupaj. Pay nerqa: “¡Ay mana yuyayniyojkuna! ¿Imaraykutaj profetaspa tukuy nisqankuta mana creeyta munankichejchuri? ¿Manachu Cristoqa ajinatapuni ñakʼarinan karqa jatunchasqa kananpaj?”, nispa (Lucas 24:25, 26). Ajinata chay forasteroqa imachus Cristomanta qhelqasqa kasqanta sutʼincharqa.

Emaús ranchoman chayaytawan, Cleopaswan compañeronwanqa astawan yachayta munaspa chay forasterota nerqanku: “Chʼisiyaykushanñaqa ari, noqaykuwan qheparikuy”, nispa. Chay runataj “paykunawan qhepakorqa”. Chantá mikhushajtinku, Diosman graciasta qorqa, tʼantata partiytawantaj paykunaman jaywarqa. Paykunataj chay runata rejsirparerqanku. Chay runataj chay rato chinkarparerqa (Lucas 24:29-31). Paykunaqa chaymantapacha yacharqanku Jesús kausakushasqanta.

Chayrayku may kusiywan ninakorqanku: “¿Manachu sonqonchejqa kʼajarerqa ñanta jamoj jina parlashawajtinchej, Diosmanta Qhelqasqatataj allinta sutʼinchashawajtinchej?”, nispa (Lucas 24:32). Chantá chay rato Jerusalenman kutirerqanku, chaypitaj tariparqanku apostolesta, waj yachachisqastawan tantasqata. Paykunataj nishasqanku: “¡Cheqatapuni Señorqa kausarinpusqa, Simonmanpis rikhurisqa!”, nispa (Lucas 24:34). Chantá Cleopaswan compañeronwanqa, ñanpi Jesuswan tinkusqankuta willarqanku.

Paykunaqa judiosta manchachikusqankurayku wasi ukhupi llaveykukuspa parlasharqanku. Jinallapitaj Jesusqa chaupinkupi rikhurerqa. Paykunataj payta rikuspa tʼukorqanku. Jesustajrí nerqa: “Sonqo tiyaykuy qankunapaj kachun”, nispa. “Paykunatajrí manchariywan muspharqanku”. Uj wata ñaupajta jinallataj chay kutipi payta mana rejserqankuchu. Yuyarqankutaj “uj angelta rikushasqankuta” (Lucas 24:36, 37; Mateo 14:25-27).

Jesustajrí mana ajinata yuyanankupaj nerqa: “¿Imaraykutaj mancharikushankichejri? ¿Imaraykutaj sonqoykichejpi iskayrayashankichejri? Qhawariychej makisniyta, chakisniytawan. Noqa kani. Llankhariwaychej, qhawaychejtaj, uj angelqa mana aychayojchu, nitaj tullusniyojchu, noqajta rikushankichej jinaqa”, nispa (Lucas 24:36-39). Paykunaqa kusiymanta tʼukusharqanku. Jinapis manaraj creerqankuchu Jesús chaypi kashasqanta.

Chayrayku Jesusqa paykunata taporqa: “¿Imallapis mikhunapaj kapusunkichejchu?”, nispa. Chantá pescado kankata uj chhikanta japʼikuytawan mikhorqa, nerqataj: “Qankunawan kashaspallaraj kay imastaqa nerqaykichejña. Moisespa Leyninpi, Profetaspa qhelqasqankupi, jinallataj Salmospipis imachus noqamanta qhelqakusqanqa, juntʼakunanpuni karqa”, nispa (Lucas 24:41-44).

Jesusqa imastachus paymanta qhelqakusqanta Cleopasman, compañeronmanwan sutʼincharqa. Wasipi kasharqanku chay yachachisqasninmanpis, chayta sutʼinchallarqataj. Pay nerqa: “Diosmanta Qhelqasqapi nin, Cristoqa ñakʼarinanta, kinsa pʼunchayninmantaj wañusqas ukhumanta kausarinpunanta. Chantá tukuy nacionespi Jerusalenmantapacha qallarispa, paypa sutinpi willakunanta runas pesachikunankupaj, ajinamanta juchasninku pampachasqa kananpaj. Qankunataj testigos kankichej chay tukuy imasmanta”, nispa (Lucas 24:46-48).

Chaypacha apóstol Tomasqa mana chaypichu kasharqa. Chayrayku qhepan diaspi, chay waj yachachisqasqa Tomasman willarqanku: “¡Señorta rikuyku!”, nispa. Tomastaj nerqa: “Manachus makisninpi clavospa juskʼusqanta rikusaj chayqa, nitaj dedoytapis clavospa juskʼusqanman satʼiykusaj chayqa, nillatajchus wajtannin chaynejman makiyta satʼiykusaj chayqa, manapuni creesajchu”, nispa (Juan 20:25).

Pusaj dianmantaj, Jesuspa yachachisqasnin watejmanta uj wasipi llaveykukuspa tantakullarqankutaj. Tomastaj chaypi kasharqa. Ajinata tantasqa kashajtinku, Jesusqa aycha cuerpoyoj chaupinkupi rikhurerqa. Paykunatataj nerqa: “Sonqo tiyaykuy qankunapaj kachun”, nispa. Chantá Tomasta nerqa: “Dedoykita kayman churay, makisniytataj qhawariy, makiykitapis wajtanniy chaynejman satʼiykuy, amaña iskayrayaychu, astawanqa creey”, nispa. Tomastaj kuticherqa: “¡Señorníy! ¡Diosníy!”, nispa (Juan 20:26-28). Chaymantapacha payqa creerqa Jesús kausakushasqanta. Jesusta “¡Diosníy!” nispataj, Jesús uj dios jina kasqanta nisharqa, Jehová Diospa sutinpitaj kay jallpʼaman jamusqanta.

Chantá Jesusqa Tomasman nerqa: “¿Rikuwasqaykiraykuchu creenki? Kusisqa kanku mana rikuspalla creejkunaqa”, nispa (Juan 20:29).