¿Tukuy iglesiaschu kikillan kanku? ¿Tukuyninkuchu Diosman pusawanchej?

Biblia nin

Mana. Mana tukuy iglesiaschu kikin kanku. Biblia nisqanman jina, Diosqa mana tukuy iglesiastachu, nitaj tukuy religionestachu allinpaj qhawan. Imaraykuchus ajina kasqanta yachanapaj iskay imasta qhawarina.

Ñaupaj kaj: Qhasi dioskunata yupaychajkuna

Bibliaqa nin llulla dioskunaqa “qhasi manakajlla” kasqankuta (Jeremías 10:3-5; 16:19, 20). Jehováa Diosqa ñaupa tiempomanta israelitasman nerqa: ‘Ama waj diosniyki kachunchu noqamanta jawaqa’, nispa (Éxodo 20:3, 23; 23:24). Israelitas waj dioskunata yupaychajtinku, Jehová Diosqa paykunapaj “mayta phiñakorqa”. Kunanpis Jehová Diosqa qhasi dioskunata yupaychajkunapaj mayta phiñakun (Números 25:3; Levítico 20:2; Jueces 2:13, 14).

Diosqa payta yupaychayta munajkunaman nin, waj dioskunata yupaychajkunamanta tʼaqakunankuta (1 Corintios 8:5, 6; Gálatas 4:8). Bibliapi pay nin: “Paykuna ukhumanta llojsimuychej, tʼaqakuychejtaj”, nispa (2 Corintios 6:14-17). Tukuy iglesias kikillan kankuman, tukuyninkutaj Diosman pusawasunman chayqa, Diosqa mana chay kamachiyta qowasunmanchu.

Iskay kaj: Diosta mana munayninman jinachu yupaychajkuna

Israelitasqa Jehová Diosta yupaychayta, wakin kutis qhasi dioskunata yupaychaywan chajrorqanku. Jehová Diostaj chay ruwasqankuta manapuni allinpajchu qhawarqa (Éxodo 32:8; Deuteronomio 12:2-4). Jesuspis fariseosta, leymanta yachachejkunatawan imaynatachus Diosta yupaychasqankumanta juchacharqa. Paykunaqa Diosta yupaychasqankuta nispapis, puraj uyas karqanku. Imaraykuchus leymanta aswan allin kajta qonqaporqanku, nisunman “cheqan kajta, khuyakuyta, Diosta mana wasanchayta ima” (Mateo 23:23).

Kunanpis uj iglesialla, nisunman uj religionlla Diosman pusawanchej. Chay iglesiataj Bibliaj nisqantapuni yachachin (Juan 4:24; 17:17; 2 Timoteo 3:16, 17). Jinapis casi tukuy iglesias yachachinku: Dioswan, Jesuswan, espíritu santowan ujlla kasqankuta, alma mana wañusqanta, sajra runastaj wiñaypaj nina lauraypi ñakʼarishasqankuta. Chay yachachiykunaqa, mana Bibliaj nisqanman jinachu kashan, manaqa qhasi dioskunata yupaychaymanta jamun. Chay imasta yachachej iglesiasqa, Diospa nisqanta yachachinankumantaqa, runaspa costumbresnillankuta yachachinku. Chayrayku runata Diosmanta karunchanku, Diosta yupaychasqankutaj qhasi manakajlla (Marcos 7:7, 8).

Diosqa payta simillamanta yupaychaj iglesiasta chejnikun (Tito 1:16). Uj iglesia Diosman pusanawanchejpajqa, kausayninchejpi yanapanawanchej tiyan. Manataj runaspa yuyasqallankutachu chayri costumbresllatachu yachachinan tiyan. Bibliallataj nin: “Sichus pipis religionniyoj caskanta yuyan, manataj kallunta refrenanchu, antes sonkonta engañan chayka, caypa religionnenka yankhamin. Dios Tataj ñaupakenpi chʼuwa religionka mana chʼichiyojtaj cay jinamin, mana piniyoj wawasta watucuymin warmi-sapastapis llaquiynincupi” yanapay, kay mundowantaj mana chʼichichakuy (Santiago 1:26, 27, Mosoj Testamento 1956). Kay 1956 watamanta Mosoj Testamento Bibliaqa, Diosta munayninman jina yupaychayta ‘chʼuwa religión’ nispa sutichan.