Joseqa Jacobpa ujnin sullkʼa wawan karqa. Josej kuraj hermanosnintaj repararqanku payta tatanku mayta munakusqanta. Chayrayku Joseta chejnikorqanku, paymantataj envidiakorqanku. Uj kuti Joseqa tʼukuna imasta mosqokusqanta hermanosninman willarerqa. Paykunataj chayta uyarispa yuyarqanku uj día Joseman kʼumuykukunankuta. Chayraykutaj astawanraj Joseta chejnikorqanku.

Uj kuti, paykuna Sichem llajtaj qayllanpi ovejasta michisharqanku. Jacobtaj Joseta kacharqa paykunata qhawarimunanpaj. Hermanosnintaj karumanta Joseta rikuspa ninakorqanku: “Qhawariychej á, sumajta mosqorikoj runa jamushan. Kunanqa payta wañuchinachej”, nispa. Chayrayku Joseta uj pozoman wijchʼuykorqanku. Jinapis Judá sutiyoj hermanonku nerqa: “Ama wañuchiychejchu, astawanpis vendena uj esclavo kananpaj”, nispa. Ajinapi Josetaqa Madianmanta Egiptoman rej comerciantesman 20 qolqespi vendeykorqanku.

Chantá Josej ropanta uj chivoj yawarninman chhapuytawan tatankuman apaspa, nerqanku: “¿Kayqa manachu wawayki Josej ropan?”, nispa. Jacobqa mayta phutikorqa uj phiña animal Joseta wañuchisqanta yuyaspa. Nitaj pipis payta sonqochayta aterqachu.

Egiptopitaj Potifar sutiyoj capitán Joseta rantikorqa esclavon kananpaj. Jehová Diostaj Josewan kasharqa. Potifarqa repararqa José sumajta trabajasqanta, atienekunapaj jinataj kasqanta. Chayrayku Joseta churarqa tukuy imasninmanta cargoyoj kananpaj.

Potifarpa warmenqa, José simpático, kallpasapataj kasqanrayku, sapa día nej: “Puñuykuna”, nispa. Josetajrí mana kasuspa nej: “Chayqa mana allinchu kanman. Patronneyqa noqapi atienekun. Qantaj warmin kanki. Qanwan puñuykuspaqa Diospa contranpi juchalliyman”, nispa.

Uj kuti, Potifarpa warmenqa Joseta obligayta munarqa paywan puñuykunanpaj. Ropanmanta japʼiykojtintaj, Joseqa usqhayllata ayqerqa. Chay warmitaj qosan kutimusqantawan llullakuspa nerqa: “Joseqa abusayta munawan”, nispa. Potifarqa chayta uyarispa mayta phiñakorqa, Josetataj carcelman wisqʼaykucherqa. Jinapis Jehová Diosqa Josellawanpuni kasharqa.

José carcelpi kashajtin, Egiptomanta rey faraonpa mosqoyninta ni pipis sutʼinchayta aterqachu. Chayrayku ujnin kamachin payman nerqa: “José mosqoyniykita sutʼinchayta atin”, nispa. Faraontaj usqhayllata Joseta pusachimorqa.

Chantá nerqa: “Mosqoyniyta sutʼinchaway”, nispa. Josetaj nerqa: “Egiptopi qanchis watasta mikhuna sumajta poqonqa, qanchis watastataj mana. Chayrayku yachayniyoj runata churay mikhunata waqaychananpaj, runas yarqhaymanta mana wañunankupaj”, nispa. Faraontaj nerqa: “Qanta churasqayki. Noqalla qanmanta aswan kuraj kasaj”, nispa. Joseqa faraonpa mosqoyninta sutʼincharqa Jehová Diospa yanapanwan.

Joseqa qanchis watasta mikhunata waqaychaspa karqa. Chaymantataj pay nisqanman jina tukuy jallpʼapi yarqhay karqa. Runastaj tukuynejmanta mikhunata rantikoj Joseman jamorqanku. Tatan Jacobpis, Egiptopi mikhuna kasqanta yachaytawan, 10 wawasninta Egiptoman kacharqa mikhunata rantinankupaj.

Egiptopitaj Joseqa chay rato hermanosninta rejsirparerqa. Paykunarí mana repararqankuchu pay José kasqanta. Chayrayku payman kʼumuykukorqanku, imaynatachus José jovencitollaraj kashaspa mosqokorqa ajinata. Joseqa yachayta munarqa hermanosnin payta siguichus chejnikusqankuta chayri manañachus. Chayrayku nerqa: “Wateqajkuna kankichej. Imaynachus kay nación kasqanta qhawaj jamunkichej”, nispa. Paykunataj nerqanku: “Mana jinachu. Noqaykoqa Canaanmanta kayku. 12 hermanos karqayku, ujnin hermanoyku wañupun, sullkʼa kajtaj tataykuwan kashan”, nispa. Josetaj nerqa: “Sullkʼa hermanoykichejta pusamuwaychej, recién creesqaykichej”, nispa. Chantá paykunaqa tatankoj wasinman kutiporqanku.

Mikhunanku tukukojtin, tatanku paykunata watejmanta Egiptoman kacharqa. Chay kutipitaj, sullkʼa wawan Benjamintawan kacharqa. Joseqa hermanosninta pruebaman churananpaj qolqe copanta Benjaminpa costalninman churaykorqa. Chaymantataj paykunata suwamanta tumparqa. Josej kamachisnin chay copata Benjaminpa costalninpi tarejtinku, hermanosnenqa ni imanakuyta aterqankuchu. Chayrayku Josemanta rogakorqanku: “Ama payta imanaychu. Astawanpis noqaykuta castigawayku”, nispa.

Ajinamanta Joseqa yacharqa hermanosnin cambiasqankuta. Manaña aguantayta atispataj waqarikorqa, paykunamantaj nerqa: “Hermanoykichej José kani. ¿Tatay kausakushanrajchu?”, nispa. Hermanosnintaj tʼukorqanku. Chayrayku José nerqa: “Ama llakikuychejchu imatachus ruwawasqaykichejmanta. Diosmin kayman kachamuwan ama wañunaykichejpaj. Kunanqa usqhayta tatayta pusamuychej”, nispa.

Hermanosnintaj chay imasta tatankuman willaj kuterqanku. Tatankutataj Egiptoman pusarqanku. Joseqa ashkha watasmanta tatanwan tinkorqa.