Uj china burro parlan

Israelitasqa Moab pampaspi jarakorqanku, Jordán mayoj inti llojsimuyninpi. Paykunaqa chʼin pampaspi 40 watasta jinaña kasharqanku. Chay kutikamataj ashkha llajtastaña japʼikaporqanku, Sumaj Jallpʼamanpis yaykunankupajña kasharqanku. Moabmanta rey Balacqa, mancharisqa kasharqa israelitas llajtanta japʼikapunankuta yachaspa. Chayrayku Balaam sutiyoj runata wajyachimorqa israelitasta maldecinanpaj.

Jehová Diostaj Balaamman nerqa: “Ama israelitasta maldecinkichu”, nispa. Chayrayku Balaamqa mana Moabman rerqachu. Rey Balactaj ujtawan wajyachispa tukuy munasqanta qonanta nerqa. Balaamqa nipuni riyta munarqachu. Chantá Jehová Dios nerqa: “Rillay. Jinapis imatachá noqa nisqayki chayllata parlanki”, nispa.

Balaamqa china burronpi Moabman rerqa. Payqa israelitasta maldeciyta munarqa, Jehová Dios mana munashajtinpis. Chayrayku Diospa angelnin ñanpi kinsa kutita payman rikhurerqa. Balaamqa mana angelta rikorqachu, burrontajrí rikorqa. Chayrayku burroqa ñanmanta llojsispa, wajnejman rerqa. Qhepan kutipitaj perqaman kʼaskaykuspa Balaampa chakinta ñitʼiykorqa. Kinsa kutipitaj burroqa chay kikinpi lastʼarparerqa. Balaamtaj phiñakuspa chay kinsantin kutipi burronta kʼaspiwan seqʼorqa.

Chantá burroqa Jehová Dios parlarichejtin nerqa: “¿Imaraykutaj seqʼowankiri?”, nispa. Balaamtaj nerqa: “Qanqa sonsopis kayman jina burlakushawanki. Sichus makiypi uj espada kanman chayqa, kunitan wañuchiykiman”, nispa. Burrotaj nerqa: “Unaymantapachaña noqapi purinki. ¿Maykʼajllapis noqaqa ajinata ruwajchu kayki?”, nispa.

Jehová Diosqa Balaampa qhawayninman angelninta rikhuricherqa. Angelqa Balaamman nerqa: “Dios nisorqa israelitasta mana maldecinaykita”, nispa. Balaamtaj nerqa: “Juchallikuni. Wasiyman kutiripusaj”, nispa. Angeltaj nerqa: “Moabman rillay. Jinapis imatachus Dios nisonqa chayllata parlanki”, nispa.

Balaamqa mana kasukorqachu. Astawanpis israelitasta kinsa kutita maldeciyta munarqa. Jinapis Jehová Diosqa mana saqerqachu maldecinanta, astawanpis bendecicherqa. Aswan qhepamantaj israelitasqa Moabta japʼikaporqanku, Balaampis wañorqa. Allinpuni kanman karqa Balaam, Jehová Diosta kasukunan.