Paykunajina ruwanaykipaq: Sulamita

Sulamitaqa, juk waynawan riqsinakuy mana pukllakuyllachu kasqanta sutʼita yacharqa. Chayrayku Jerusalenmanta sipaskunata jinata nirqa: “Jurachiykichik ama munakuyniyta ñuqapi rikchʼarichinaykichikpaq, sunqullaymanta munakuyniy lluqsimunankama”, nispa. Chantá sunqun payta chʼawkiyayta atisqanta yachallarqataq. Astawanpis tanqasqa kaspa, mana paypaqjina waynawan casarakunanta, munaynin allin yuyayninta laqhayachinanta ima, yachallarqataq. Chayrayku, sulamitaqa “juk pirqajina” sumaq sayasqa kayta munarqa (Cantar de los Cantares 8:4, 10, NM).

¿Qamri? Piwanpis riqsinakuymanta, ¿sulamitajinachu, yuyanki? ¿Yuyayniykimanjinachu ruwayta atiwaq chayri sunquykip munayninmanjinachu ruwawaq? (Proverbios 2:10, 11.) Ichá wakinkunaqa, manaraq allin wakichisqa kaptiykipis, piwanpis riqsinakunaykipaq mayta tanqachkasunku. Chayri, ichá qam kikiyki chaypi yuyachkanki. Reparanaykipaq; juk waynawan juk sipaswan makinkumanta japʼinakuspa purichkaqta rikuspa, ¿piwanpis riqsinakunaykipaq wañurquchkankiñachu? Chay munasqaykirayku, ¿mana chiqa cristiano waynawan chayri sipaswan riqsinakuwaqchu? Sulamitaqa wiñay tukusqa runajina yuyaspa imallatapis ruwarqa, qampis kikillantataq ruwayta atiwaq.