Davidwan Goliatwan

Jehová Diosqa Samuelman nerqa: “Riy Jesejpa wasinman. Ujnin wawan Israelpi rey kanqa”, nispa. Samueltaj rerqa. Jesej kuraj wawanta rikuspataj sonqonpi nerqa: “Kaychá ajllasqa reyqa”, nispa. Jehová Diostaj Samuelman nerqa mana paychu kasqanta. Chantapis nerqa: “Noqaqa runaj sonqonta qhawani, manataj rijchʼaynillantachu”, nispa.

Jeseqa waj sojta wawasnintawan Samuelman pusamorqa. Samueltaj nerqa: “Jehová Diosqa ni mayqenninkuta ajllanchu. ¿Chayllachu wawasniyki?”, nispa. Jesetaj nerqa: “Mana. Uj sullkʼa waway kanraj David, payqa ovejasta michishan”, nispa. David chamojtintaj, Jehová Diosqa Samuelta nerqa: “Kaymá ajllakusqayqa”, nispa. Chantá Samuelqa David Israelpi rey kananpaj aceitewan umanman jichʼaykorqa.

Unayninmantaj, israelitasqa filisteoswan maqanakorqanku. Filisteospataqa jatun soldadonku karqa, Goliat sutiyoj. Paytaj sapa día israelitasmanta burlakuspa nej: “Qankuna ukhumanta uj runata ajllaychej noqawan maqanakoj uraykamunanpaj. Sichus chay runa atipawanqa chayqa, noqayku qankunaj kamachisniykichej kasqayku. Noqachus payta atipasaj chaytaj, qankuna kamachisniyku kankichej, sirviwasqaykutaj”, nispa.

Davidpa hermanosnenqa soldados karqanku. Davidtaj paykunaman mikhunata apashaspa Goliatta uyarerqa. Chayrayku nerqa: “Noqa maqanakamusaj”, nispa. Saultaj nerqa: “Wawallaraj kanki”, nispa. Davidtaj nerqa: “Jehová yanapawanqa” nispa.

Saultaj maqanakuna ropanta qorqa. Davidtaj nerqa: “Mana kay ropawan maqanakuyta atisajchu”, nispa. Chantá Davidqa warakʼanta oqhariykukuspa, wayqʼomanta phishqa llosqʼo rumista wayaqanman churaykuspa Goliatwan tinkoj rerqa. Goliattaj qhaparerqa: “Jamuy kayman lloqallitu. Aychaykita qaraykusaj aycha mikhu pʼisqosman, phiña animalesmanpis”, nispa. Davidtaj mana manchikuspa nerqa: “Qanqa jamushawanki espadawan, tʼojsina lanzawan, jabalinawan ima. Noqatajrí jamushayki Jehová Diospa sutinpi. Mana noqaykuwanchu maqanakushanki, manaqa Dioswanmin. Kunanqa tukuy yachanqanku espadamanta nisqa, lanzamanta nisqa Jehová Dios aswan atiyniyoj kasqanta. Paytaj makiykuman qankunata jaywaykuwasqayku”, nispa.

Chantá Davidqa warakʼanman rumita churaykuytawan, tukuy kallpanwan warakʼarqa. Jehová Diospa yanapanwantaj, rumeqa Goliatpa frentenman satʼiykukorqa. Jatun runa Goliattaj wañusqa choqakorqa. Chantá filisteosqa ayqerikaporqanku. Yachakunchej jina, may allinpuni David jina Jehová Diospi atienekunaqa.