Salomón Israelpi rey kasqantawan, Jehová Diosqa payman nerqa: “Imatachus qosunayta munanki chayta mañakuway”, nispa. Salomontaj nerqa: “Jovenllaraj kani, ni imatapis ruwayta atinichu. Yachayta qoway llajtaykita allinta yanapanaypaj”, nispa. Diostaj nerqa: “Yachayta mañakuwasqaykirayku, yachayniyojman tukuchisqayki, qhapajyachisqayki, kasuwajtiykitaj ashkha watasta kausanki”, nispa.

Salomonqa templota ruwarqa aswan sumaj qoriwan, qolqe metalwan, maderawan, valorniyoj rumiswan ima. Templota ruwaypitaj yachayniyoj qharis, warmis yanapakorqanku. Templota 7 wataspi tukuytawan, Jehová Diosman jaywapunankupaj altarman ofrendasta churarqanku. Salomontaj altarpa ñaupaqenpi qonqoriykukuspa orakorqa: “Jehová Diosníy, kay temploqa mana qanpaj jina jatunchu, nitaj kʼachituchu. Jinapis yupaychasusqaykuta allinpaj qhaway, mañakususqaykutapis uyariwayku”, nispa. Jehová Diosqa Salomonta uyarerqa. Pay templowan kusisqa kashasqanraykutaj cielomanta nina uraykamuspa ofrendasta qʼolarparerqa. Israelitastaj chayta rikuspa mayta kusikorqanku.

Rey Salomonqa yachayniyoj kasqanrayku Israelpi, karu llajtaspi ima rejsisqa karqa. Runasqa Salomonman rej kanku problemasninkuta allinchananpaj. Sabamanta reinapis Salomonman rerqa mana kutichiy atina tapuykunawan. Chay reinaqa Salomonpa nisqanta uyarispa, nerqa: “Mana creerqanichu runas qanmanta willawasqankuta. Yachayniykeqa, uyarisqaymantapis astawanraj kasqa. Jehová Diosniyki bendecisunki”, nispa. Israelitasqa chay wataspi sumajta kausakorqanku, kusisqastaj. Aswan qhepamantaj manaña.

Salomón Jehová Diosta yupaychashajtenqa, israelitas allinta kausakorqanku. Chantá Salomonqa waj llajtayoj warmiswan casarakorqa. Chay warmisnintaj waj diosesta yupaychaj kanku. Ajinamanta Salomonqa pisimanta pisi llulla diosesta yupaycharqa. Chayrayku Jehová Diosqa phiñakuspa nerqa: “Gobiernoykita familiaykimanta qhechusaj, iskaymantaj tʼaqasaj. Jatun kajtaqa ujnin kamachiykiman qosaj, juchʼuy kajtataj familiayki kamachenqa”, nispa.

Jehová Diosqa profeta Ahiyata kacharqa Salomonpa kamachin Jeroboanman. Ñanpi paywan tinkuspataj, Ahiyaqa mantonta 12 pedazosman llikʼirarqa. Jeroboantataj nerqa: “Jehová Diosqa Salomonpa familianmanta gobiernota qhechuspa iskayman tʼaqanqa. Japʼikuy kay llikʼisqamanta chunkata, imajtinchus qanman chunka ayllusta qosonqa”, nispa. Salomontaj chayta yachaytawan, Jeroboanta wañuchiyta munarqa. Jeroboantaj Egiptoman ayqekorqa. Salomón wañupojtintaj wawan Rehoboam gobernarqa, Jeroboantaj Israelman kutiporqa.

Israelmanta kurajkunaqa Rehoboamta nerqanku: “Kʼacha kanki chayqa, runasqa qanta sirvisonqanku”, nispa. Joven amigosnintaj nerqanku: “Runasta ñakʼarichiy, sinchʼitataj trabajachiy”, nispa. Rehoboam chayta kasojtin, runasqa paypa contranpi oqharikuspa, Israelmanta chunka ayllusta gobernananpaj Jeroboanta churarqanku. Chay chunka ayllustaj Israel sutiwan rejsisqa karqa. Iskay ayllustajrí Judá sutiwan rejsisqa karqa, Rehoboamtataj kasukorqanku. Ajinamanta Israelpa 12 ayllusnin iskayman tʼaqakorqanku.

Jerusalenqa Judapi kasharqa. Jeroboantaj mana munarqachu runas Jehová Diosta yupaychaj chayman rinankuta. Imajtinchus payqa yuyarqa, runas Rehoboamman kutiripunankuta. Chayrayku iskay waka uñasta ruwarqa, runastataj nerqa: “Jerusalenqa karupi kashan. Chayrayku kayllapi kay iskay waka uñasta yupaychaychej”, nispa. Runastaj payta kasuspa Jehová Diosmanta ujtawan karunchakorqanku.