“¿Maykʼajtaj waj jatun tantakuy kallanqataj?”

KAY 1932 watapi noviembre killapi, Mexicopi semaforosta churakorqa. Chay wataqa, Mexicopi millonmanta astawan runas tiyakorqanku. Semáforos churakushajtin noticiaspi chayllamanta parlakusharqa, semananmantaj waj noticiamantañataj. Imaraykuchus estación de trenpi, periodistasqa cámaras japʼirisqa, Joseph F. Rutherfordta suyasharqanku. Payqa Sociedad Watch Tower nisqamanta presidente karqa. Jehovaj testigosninpis payllatataj suyasharqanku. Payqa kinsa diapaj jatun tantakuyman jamusharqa.

Jaqay tiempopi, inglespi ¡Despertad!, revista nerqa: “México suyupi kay jatun tantakoyqa, Diospa Gobiernonmanta astawan willakunanpaj yanaparqa. Chayrayku mana qonqanapaj jinapuni karqa”, nispa. Chay jatun tantakuy may sumajpuni karqa, 150 runaslla rejtinkupis.

Kay 1919 watamantapacha, Mexicopi jatun tantakuykuna ruwakorqa. Jinapis watasninman, congregacionesqa pisiyasharqa. Kay 1929 watapi, Mexicopi sucursalta kicharikorqa, Diosmanta willay ñauparinanpaj. Jinapis wakin chʼampaykuna rikhurerqa. Chay tiempopi kamachikorqa, predicashaspa ama negociosta ruwanankuta. Chaymantataj uj precursor maytapuni phiñakorqa, congregacionmantapis tʼaqakaporqa, uj iglesiatataj sayaricherqa. Chay watasllapitaj sucursalta kamachejqa, uj juchapi urmarqa, cuentanmantataj waj hermanota churakunan karqa. Chay tukuy imasrayku 1932 watapaj, pisi runaslla Jehovaj testigosninwan Bibliamanta yachakusharqanku. Chayrayku Jehovaj testigosnenqa kallpacharinata necesitarqanku.

Hermano Rutherfordqa, Mexicopi hermanosta waturikushaspa, mayta kallpacharerqa. Payqa jatun tantakuypi iskay discursosta qorqa, phishqa discursostataj radiopi. Chaypacha, México suyuntinpi ñaupaj kutirayku radionejta Diospa Gobiernonmanta willakorqa. Chantá hermano Rutherfordqa, sucursalta kamachejpa cuentanmanta waj hermanota churarqa. Chay hermanotaj jatun tantakuy pasajtinkama, Mexicopi Diosmanta willakunanpaj tukuy imata sumajta wakicherqa. Chaymantapachataj hermanosqa, Jehová yanapasqanta repararqanku, sonqo kʼajayllawanpunitaj willamorqanku.

Watanmantaj iskay jatun tantakuykuna ruwakorqa. Ujnenqa México llajtapi ruwakorqa, ujnintaj Veracruz llajtapi, chay llajtataj mama qochaj kantunpi kashan. Kay 1931 watapi, 82 publicadoreslla karqanku, hermanos sumajta predicasqankurayku 1941 watapaj 820 publicadoresña karqanku. Chantapis 1941 watapi, casi waranqa runas México llajtapi jatun tantakuyman rerqanku.

“CALLESMAN JUNTʼAYKAMUNKU”

Kay 1943 watapi, Jehovaj testigosnenqa, “Nación Libre” nisqa jatun tantakuyman tukuyta wajyarinankupaj, letreroswan callesman willaj llojserqanku. Chay jatun tantakuytaj 12 llajtaspi ruwakorqa.a Hermanosqa, iskay letrerosta puraj ladoman warkhuykukoj kanku. Kay 1936 watamantapachaña ajinata willasharqanku.

Mexicomanta La Nación nisqa periodicoqa, Jehovaj testigosnin letreroswan willaypi allin risqanmanta, kayta nerqa: “Ñaupaj kaj diapeqa jatun tantakuypi astawan runasta wajyarinankuta nikorqa. Qʼayantintaj runasqa mayta juntʼaykorqanku”, nispa. Curasqa chayta rikuspa mayta phiñakorqanku, Jehovaj testigosnintataj qhatiykacharqanku. Ajinapis hermanosqa mana manchachikuspa callespi willashallarqankupuni. La Nación periódico nisqanman jina, México llajtapi runasqa rikorqanku, “qharistawan warmistawan puraj ladomanta letreroswan warkhurisqa purishajta”. Chay periodicopi uj foto karqa, hermanos callespi willasqankumanta. Fotoj ura kantunpi nisharqa: “Callesman juntʼaykamunku”, nispa.

“CARTON PATAPI QʼOÑISITUTA PUÑUKORQAYKU”

Chay wataspeqa, Mexicopi jatun tantakuykuna pisillata ruwakoj. Hermanosqa chay tantakuykunaman mana riyta atillajchu kanku. Ashkhasqa karuspi tiyakorqanku. Chay lugaresmanqa, autos, tresnespis mana chayajchu. Chayrayku hermanosqa, jatun tantakuyman chayanankupaj, chakipi chayri mulapi diasta rinanku kaj, chantataj trenpi.

Casi tukuy hermanospata, qolqenku jatun tantakuyman rinallankupaj alcanzaj. Ashkhasqa hermanospa wasinkupi qhepakoj kanku, wakintaj tantakuna wasipi. Uj kuti, 90 hermanos jina sucursalpi ashkha cartones patapi puñukorqanku. Anuario libro nisqanman jina, hermanosqa may agradecesqa kasharqanku. Nerqankutaj: “Carton patapi qʼoñisituta puñukorqayku, aswan allintaj karqa qʼara pampapi puñunaykumantaqa”, nispa.

Hermanosqa jatun tantakuykunapi mayta kusikoj kanku. Chayrayku tukuy imata ruwaj kanku mana faltakunankupaj. Kay 1949 watapi, México sucursalmanta uj hermano nerqa: “Kay tiempopi kausay may llakiy kajtinpis, hermanosninchejqa jatun tantakuykunaman rillankupuni. Jatun tantakuy pasajtinpis chay tantakuymanta parlallankupuni. Tapukunkutaj: ‘¿Maykʼajtaj waj jatun tantakuy kallanqataj?’”, nispa. Kunankamaqa, Mexicopi hermanosqa millón jinaña kanku, jatun tantakuykunaman rinankupajtaj, mayta kallpachakushallankupuni.b (Centroamérica sucursalpi waqaychakusqanmanta).