Wajkunata khuyakuna

JOHNQA familianwan Gujarat nisqa ranchitupi tiyakorqa. Chaytaj kashan India suyupi. Johnpa tatanqa 1957 wata chaynejta Jehovaj testigon jina bautizakusqa. Johnqa católico karqa, jinallataj kinsantin hermanasnin, iskaynin hermanosnin, maman ima. Tukuyninkutaj tatanman churanakoj kanku, Jehovaj testigon kasqanrayku.

Uj kuti, Johnman tatan nisqa, uj hermanoman uj cartata apapunanta. Johnqa niraj chay cartata apashajtintaj, uj latata kicharishaspa dedonta khuchuykukusqa. Jinapis payqa dedonta trapitowan maytʼukuspa chay cartata hermanoj wasinman apasqa.

Johntaj hermanoj señorallanta taripasqa. Hermanoj señorantaj hermanallataj kasqa. Paymantaj chay cartata jaywasqa. Hermanataj John dedonta khuchuykukusqanta reparasqa, chay ratotaj jampiykuspa vendaykusqa. Chantá teycituta qorisqa. Teycituta tomarishajtinkutaj, Bibliamanta parlarisqanku.

Johntaj sonqonpi nikusqa: “Jehovaj testigosnenqa kʼacha runas kasqanku”, nispa. Chantá Johnqa hermanata tapuykusqa Jesusmanta, Mariamantawan. Imaraykuchus Johnqa creerqa Jesús Diosllataj kasqanta, Mariamanpis rezana kasqanta. Hermanataj gujarati parlaypi, Johnpa tapuykunasninman Bibliawan sutʼinchasqa. Chantapis “Estas buenas nuevas del reino”, nisqa folletota jaywasqa.

Johntaj chay folletota leesqa. Reparasqataj chay folleto Bibliaj nisqanman jina kasqanta. Chantá Johnqa iglesianman riytawan, curata tapurisqa, Jesús Diosllatajchus manachus kasqanta, Mariamanpis rezanachus manachus kasqantapis. Curataj rabiawan, Bibliawan choqaykusqa. Qhaparispataj nisqa: “Jesús mana Dioschu ninaykipaj, ¿Diablochu kanki imatajri?, Chantá, ¿Maypi Bibliapi nin, Mariaman mana rezanachu kasqantari?”, nispa. Johntaj chay jinata cura qhapariykusqanrayku, nisqa: “Ni jaykʼaj iglesiaman jamusajñachu”, nispa. Johntaj chaymantapacha, ni ujtawan iglesiaman rerqañachu.

Chantá Johnqa Bibliamanta yachakuyta qallarerqa. Jinamantataj Jehovaj testigonman tukorqa. Familianmanta wakinpis, Jehovaj testigonman tukullarqankutaj. John dedonta khuchuykukusqanmantapacha 60 watasña pasan. Jinapis payqa khuchuykukusqan dedonta qhawarikuspa, mana qonqakunchu uj hermana, khuyakusqanrayku dedonta jampiykusqanta. Chaytaj Johnpa sonqonta kuyurichisqa, Diospa llajtanman yaykunpunanpaj (2 Cor. 6:4, 6).