¿Imaynatá ñaupaj kaj profecía yanapawanchej?

1. ¿Imatá Jehová ruwarqa Adanwan Evawan juchallikusqankutawan? (Génesis 3:15).

ADANWAN Evawan juchallikusqankutawan, Jehovaqa may importante profecianejta mirayninkuman uj suyakuyta qorqa. Chay profecía kashan Génesis 3:15 (leey) versiculopi.

2. ¿Imajtintaj Bibliaj ñaupaj kaj profecian may importante?

² Kay profeciaqa Bibliamanta ñaupaj kaj libropi kashan, Bibliaj tukuynin librosnintaj chay profeciaman ujchasqa kashanku. Imaynatachus uj libroj paginasnin ujllapi sumaj kʼaskanasqa kashanku, ajinallatataj Bibliaj tukuynin librosninpis Génesis 3:15 versiculoman kʼaskanasqa kashanku. Bibliaj tukuynin librosnin parlan Dios uj Salvajta kachamunanmanta, Diablota, payta qhatejkunatawan tukuchinanpaj.b Chayqa Jehová Diosta munakojkunapaj may sumaj.

3. ¿Ima tapuykunamantaj kay yachaqanapi kutichisun?

³ Kay yachaqanapeqa Génesis 3:15 profeciamanta kay kinsa tapuykunaman kutichisun: ¿Pikunamantataj chay profecía parlashan? ¿Imaynatá chay profecía juntʼakushan? ¿Imaynatá chay profecía yanapawanchej?

¿PIKUNAMANTATAJ CHAY PROFECÍA PARLASHAN?

4. ¿Pitaj ‘katari’, chanta imaynamantá chayta yachanchej?

⁴ Génesis 3:14, 15 versiculospi parlan ‘katarimanta’, ‘mirayninmanta’, ‘warmimanta’, ‘mirayninmanta’ ima. Bibliaqa yanapawanchej pikunachus paykuna kasqankuta yachanapaj.c ¿Pitaj ‘katari’? Kataripuni kanman karqa chayqa, imatachus Edén huertapi Jehová nisqanta mana entiendeyta atinmanchu karqa. Chayrayku nisunman Jehovaqa mana kataritapunichu juchachasqanta. ¿Pitá chanta juchacharqa? Apocalipsis 12:9 sutʼita niwanchej pichus chay katari kasqanta. Chaypi nin ‘ñaupa katareqa’ Satanás Diablo kasqanta. Chantá, ¿pikuná kanku katarej miraynin?

5. ¿Pikunataj katarej miraynin kanku?

⁵ Wakin kutis Bibliaqa ‘pejpa miraynin’ nispa nejtin, pay jina yuyajkunamanta, pay jina ruwajkunamanta parlan. Chayrayku katarej miraynenqa kanku pikunachus Satanás jina Jehová Diospa contranta oqharikunku, llajtanmanpis churanakunku chay ángeles, runas ima. Chaykuna kankuman Noejpa tiemponpi cielopi ruwayninkuta saqej ángeles, tatanku Diablo jina ruwaj sajra runaspis (Gén. 6:1, 2; Juan 8:44; 1 Juan 5:19; Jud. 6).

6. ¿Imajtintaj profeciamanta ‘warmi’ mana Evachu kanman?

⁶ Kunanqa ‘warmimantañataj’ parlarina. Warmeqa mana Evachu kanman. ¿Imajtin? Chay profeciapeqa nin warmej miraynin katarej umanta ‘pʼaltarparinanta’. Yachakunchej jina katareqa sajra ángel Satanás, chayrayku Evaj mirayninmanta ni pi runapis payta pʼaltarpayta atinmanchu. Jina kajtin, ¿imaynamantá Satanás chinkachisqa kanman?

7. Apocalipsis 12:1, 2, 5, 10 versiculospi nisqanman jina, ¿pitaj kashan Génesis 3:15 versiculomanta warmi?

⁷ Génesis 3:15 versiculopi warmi pichus kasqanta Apocalipsis libropi willawanchej (Apocalipsis 12:1, 2, 5, 10 leey). Chay warmeqa mana kay jallpʼamanta warmis jinachu. “Chakisnin urapeqa killa kasharqa, uman patapitaj uj corona 12 estrellasniyoj”. Payqa uj qhari wawata nacechikorqa, nisunman Diospa Gobiernonta. Chay Gobiernoqa cielopi kashan, chayrayku chay warmipis cielollapitaj kashan. Chay warmeqa ninakun cielopi kaj Diospa llajtanwan, nisunman kasukoj angeleswan (Gál. 4:26).

8. ¿Pitaj warmej ñaupaj kaj miraynin, chanta maykʼajtaj mirayninman tukorqa? (Génesis 22:15-18).

⁸ Bibliaqa sutʼinchallawanchejtaj pichus warmej ñaupaj kaj miraynin kasqanta. Chay mirayqa Abrahanpa mirayninmanta jamunan karqa (Génesis 22:15-18 leey). Jesustaj chay profecía nisqanman jinapuni Abrahanpa mirayninmanta jamorqa (Luc. 3:23, 34). Chay miraytaj runasmanta aswan atiyniyoj kanan karqa, Satanasta pʼaltarparispa chinkarparichinanpaj. Chayrayku Jesusqa 30 watasniyoj jina kashajtin, Diospa kʼata Wawan jina espíritu santowan ajllasqa karqa. Ajinamanta warmej ñaupaj kaj mirayninman tukorqa (Gál. 3:16). Jesús wañuymanta kausarimusqantawan, Diosqa “jatun kayta, jatunpaj qhawasqa kaytapis coronata jina” churaykorqa, qorqataj ‘tukuy atiyta cielopi, jinallataj kay jallpʼapipis’. Atiyta qollarqataj “Diabloj ruwasqasninta tukuchinanpaj” (Heb. 2:7; Mat. 28:18; 1 Juan 3:8).

9, 10. 1) ¿Pikunataj warmej mirayninmanta kallankutaj, chanta maykʼajmantapachataj warmej mirayninman tukunku? 2) ¿Imatataj qhepan parrafospi qhawarisun?

⁹ Warmej miraynenqa Jesusmanta wajkunapiwan kanallankutaj karqa. Apóstol Pabloqa pikunachus chay wajkuna kasqankumanta parlaspa judiosman, waj nacionesmanta ajllasqa cristianosmanpis nerqa: “Sichus Cristojta kankichej chayqa, Abrahanpa miraynin kankichej. Diospa nisqanman jinataj herenciata japʼinkichej”, nispa (Gál. 3:28, 29). Jehová uj cristianota espíritu santowan ajllajtin, chay cristianoqa warmej miraynillanmantaj tukun. Chayrayku warmej miraynenqa Jesuswan 144.000 ajllasqa cristianoswan kanku, pikunachus Jesuswan khuska kamachenqanku chaykunawan (Apo. 14:1). Paykunaqa Tatanku Jehová jina yuyanankupaj, ruwanankupaj ima kallpachakunku.

¹⁰ Yachanchejña Génesis 3:15 pikunamantachus parlashasqanta. Kunantaj qhawarina imaynatachus Jehová chay profeciata juntʼashasqanta, imaynatachus chay profecía yanapashawasqanchejtapis.

¿IMAYNATÁ CHAY PROFECÍA JUNTʼAKUSHAN?

11. ¿Imaynatá warmej mirayninpa ‘chaki talonnin’ khanisqa karqa?

¹¹ Génesis 3:15 nisqanman jina, katareqa warmej mirayninpa “chaki talonninta” khaninan karqa. Chaytaj juntʼakorqa maypachachus Satanás judiosta, romanostapis Diospa Wawanta wañuchinankupaj tanqarqa chaypacha (Luc. 23:13, 20-24). Imaynatachus pillapis chaki talonninta imanarpakojtin uj tiempota mana puriyta atinchu, ajinallatataj Jesuspis sepulturapi kashaspa kinsa diasta ni imata ruwayta aterqachu (Mat. 16:21).

12. ¿Maykʼajtaj chanta imaynatataj katarej uman pʼaltarparisqa kanqa?

¹² Génesis 3:15 profecía juntʼakunanpaj, Jesusqa mana sepulturapichu qhepakunan karqa. ¿Imajtin? Chay profecía nerqa warmej miraynin katarej umanta pʼaltarparinanta. Chaypajqa Jesús kausarimunanpuni karqa, ajinapunitaj karqa. Jesusqa kinsa diasninman ni jaykʼaj wañunanpaj kausarimorqa, cielopi kausakunanpaj cuerpoyoj. Diospa nisqan tiempopi, Jesusqa Satanasta chinkasqata chinkarparichenqa (Heb. 2:14). Cristowan khuska kamachejkunapis, jallpʼamanta tukuynin Diospa enemigosninta chinkarparichiypi yanapakonqanku, nisunman katarej mirayninta (Apo. 17:14; 20:4, 10).d

¿IMAYNATÁ KAY PROFECÍA YANAPAWANCHEJ?

13. ¿Imaynatá chay profecía juntʼakusqan yanapawanchej?

¹³ Diospa kamachinña kanki chayqa, kay profeciawan yanapachikushanki. Jesusqa runaman tukuspa kay jallpʼaman jamorqa, Tatan jinapunitaj tukuy imata ruwarqa (Juan 14:9). Jinamanta paynejta Jehová Diosta rejsiyta, munakuytapis aterqanchej. Chantapis Jesuspa yachachisqasnin, imaynatachus kay tiempopi Diospa llajtanta kamachisqanpis yanapallawanchejtaj. Jesusqa yachachiwarqanchej imaynatachus Jehová allinpaj qhawanawanchejpaj jina kausakuyta. Chantapis Jesús chaki talonninmanta khanisqa kasqanqa, nisunman wañusqanqa tukuyta yanapawasunman. ¿Imaynamanta? Jesús kausarichisqa kaytawan yawarninta uj sumaj jaywanata jina jaywarqa ‘tukuy juchamanta llimphuchanawanchejpaj’ (1 Juan 1:7).

14. ¿Imaynamantataj yachanchej Edenpi Jehovaj nisqan profecía mana chay ratochu juntʼakusqanta?

¹⁴ Edén huertapi imatachus Jehová nisqanpi reparanchej, chay profeciaqa mana chay ratochu juntʼakunanta. Tiempo pasanan karqa warmej miraynin rikhurinanpaj, Diablo payta qhatejkunata tantananpaj, chay iskaynin grupostaj chejninakunankupaj. Chay profeciata entiendeyqa yanapawanchej yachanapaj Satanaspa mundonpi kajkunaqa, Jehová Diosta yupaychajkunata chejninankuta. Aswan qhepaman Jesuspis nillarqataj discipulosnin chejnisqa kanankuta (Mar. 13:13; Juan 17:14). Ajinapunitaj kasqanta reparanchej, astawanraj kay qhepa pachaj wataspi. ¿Imaynamanta?

15. 1) ¿Imajtintaj kay mundomanta runas astawan chejnikuwanchej? 2) ¿Imaraykutaj Satanasta mana manchikunanchejchu tiyan?

¹⁵ Jesusqa 1914 watapi Diospa Gobiernonmanta Rey jina churasqa karqa. Pisi tiemponmantaj Satanasta cielomanta wijchʼumorqa. Diabloqa kay jallpʼaman wijchʼuchikamusqanrayku kay jallpʼallapiña imatapis ruwayta atin, chinkachisqa kayllatañataj suyashan (Apo. 12:9, 12). Jinapis mana jinallachu suyashan. Satanasqa may phiñasqa kasqanrayku tukuy imata ruwashan, phiñakuynintataj Diospa llajtanwan pagachikushan (Apo. 12:13, 17). Chayrayku Satanaspa mundonmanta runasqa astawan chejnikuwanchej. Jinapis mana manchikunanchejchu tiyan ni Satanastapis ni payta qhatejkunatapis. Astawanpis apóstol Pablo jinallataj niyta atinchej. Pay nerqa: “Sichus Dios noqanchejwan kashan chayqa, ¿pitaj contranchejpi kayta atinmanri?”, nispa (Rom. 8:31). Génesis 3:15 versiculopi profeciaqa casi tukuyninña juntʼakushan. Chayrayku Jehová Diospi astawan atienekuyta atinchej.

16-18. ¿Imaynatataj Curtista, Ursulata, Jessicata ima yanaparqa Génesis 3:15 versiculota entiendey?

¹⁶ Génesis 3:15 versiculopi imatachus Jehová nisqanqa, ima llakiytapis atipanapaj yanapawasunman. Curtis sutiyoj hermanoqa misionero jina Guam islapi sirvishan. Pay nin: “Llakiykunapi, pruebaspi rikukusqayrayku Jehovata sirviyta mana atillarqanichu. Jinapis tʼukurerqani Génesis 3:15 versiculopi kaj profeciapi. Chaytaj yanapawarqa Tatay Jehovapi atienekunallaypajpuni”, nispa. Hermano Curtisqa mayta suyakushan Jehová tukuy llakiykunasninchejta chinkachinanta.

¹⁷ Alemania suyoj Baviera jallpʼasninpi tiyakoj Ursula sutiyoj hermanamantañataj parlarina. Payqa nin Génesis 3:15 versiculopi kaj profeciata entiendeyqa, Biblia Diospa yuyaychasqanpuni kasqanta reparananpaj yanapasqanta. Payqa repararqa Bibliaj tukuynin profeciasnin chay profeciawan ujchasqa kashasqanta. Chaytaj mayta tʼukucherqa. Pay nillantaj: “Jehovaqa suyakuyniyoj kananchejpaj chay rato nerqa imatachus ruwananta. Chayta yachaspataj astawan Jehovata munakorqani”, nispa.

¹⁸ Micronesiamanta Jessica sutiyoj hermana nin: “Yuyarikuniraj Diosta rejsishaspa imaynachus sonqoy kashasqanta. Génesis 3:15 versiculopi profeciaqa juntʼakusharqapuni. Chayta entiendeyqa yanapawarqa yuyarikunaypaj Jehová mana jina llakiypichu kausakunanchejta munasqanta. Chay profecía sutʼita reparachiwan Jehovata sirvispalla kay tiempopi, aswan qhepamanpis kusisqa kausakuyta atinanchejta”, nispa.

19. ¿Imajtintaj atienekusunman tukuynin profecía juntʼakunanpi?

¹⁹ Yachakunchej jina Génesis 3:15 versiculopi kaj profeciaqa juntʼakushan. Yachanchejña pikunachus warmej miraynin kasqankuta, katarej miraynin kasqankutapis. Jesusqa warmej ñaupaj kaj miraynin. Paytaj chaki talonninpi khanisqa kasqanmanta thañikunña. Kunanqa may atiyniyoj, mana jaykʼaj wañoj Reytaj. Jehovaqa pikunachus Wawanwan khuska kamachenqanku chaykunatapis casi tukuyninkutaña ajllan. Kay profeciamanta uj parte juntʼakunña. Chayrayku katarej uman pʼaltarparisqa kananta nisqan juntʼakunanpipis atienekullanchejtaj. Satanás chinkachisqa kajtin Diosta yupaychajkunaqa mayta kusikusun. Chaykamataj ama saykʼunachu. Diosninchejqa atienekunapaj jinapuni. Payqa warmej mirayninnejta, kay jallpʼapi ‘tukuy nacionesta’ mayta bendicenqa (Gén. 22:18).