¿Imaraykutaj wakin pisipaj qhawakunku?

**¿IMARAYKUTAJ MANA PISIPAJ QHAWAKUNACHU TIYAN?**

Mana pisipaj qhawakojkunaqa ima problematapis atipayta atillanku, nitaj chay ratochu “mana atinichu” nispa ninku.

Runas estudiasqankuman jinaqa, piskunachus pisipaj qhawakunku chaykunaqa, desesperacionwan japʼichikunku, llakiywan atipachikunku, nitaj allintachu alimentakunku. Chantapis ichá machayman qokunkuman, imapajpis medicamentosllataña tomankuman, drogakunkumantaj.
Mana pisipaj qhawakojkunaqa mana wajkunawan kikinchakunkuchu. Chayrayku wajkunawan allinta apanakunku, sumaj amigosniyojtaj kanku. Pisipaj qhawakojkunatajrí wajkunapaj rimanku, qhawaranku ima. Chayraykutaj mana wajkunawan allinta apanakuyta atillankuchu.
Mana pisipajchu qhawakojkunaqa problemasniyoj kajtinkupis ñaupajllamanpuni rinku, nitaj imatachus ruwayta munasqankuta saqepunkuchu. Pisipaj qhawakojkunatajrí, juchʼuy imitaspi pantaspapis, ni imapaj valesqankutaña yuyanku, imatachus ruwayta munasqankutataj chay rato saqepunku.

¿IMATÁ RUWAWAJ?

Allin amigosta maskʼakuy. Astawan masichakuy wajkunata respetajkunawan, allinniykita maskʼajkunawan, kausayniykipi yanapasojkunawan ima.

“Sumaj amigoqa tukuy tiempo munakuyniyoj, llakiy kajtintaj uj hermanopis kanman jina yanapakun” (Proverbios 17:17).

Wajkunata yanapay. Sichus wajkunawan kʼacha kanki, wajkunapajpis allin imasta ruwanki chayqa, aswan kusisqa kanki, nitaj yuyankichu ni imapaj valesqaykita. Chaytataj ruwawaj mana kutichipuyta atisojkunapajpis. Chayta ruwaspaqa kusisqa kanki, mana agradecekususqankuta yuyajtiykipis.

“Aswan kusisqa kanchej wajman qorispa, qorichikunamanta nisqaqa” (Hechos 20:35).

Wawasniykita yanapay mana pisipaj qhawakunankupaj. Chaytataj ruwawaj atikusqanman jina paykunallamanta ima problemankutapis allinchanankuta saqespa. Ajinamanta yachakonqanku problemasta atipayta, ñaupajllamanpunitaj riyta. Chantapis mana pisipaj qhawakonqankuchu. Chaytaj mayta yanapanqa jatuchejña kajtinku.

“Wawataqa allinta yachachiy may ñantachus rinanta, machuyajtinñapis mana chay ñanmanta karunchakonqachu” (Proverbios 22:6).

Uj hermana, uj cafeteriapi uj warmiman Bibliamanta yachachishan.

¿IMATÁ JEHOVAJ TESTIGOSNIN RUWAYKU?

Tantakuykunasniyku, Bibliamanta wajkunaman yachachisqaykupis runasta yanapan aswan sumajta kausakunankupaj, nitaj pisipajchu qhawakunankupaj.

SAPA SEMANA TANTAKUYKU

Sapa semana tantakuykunasniykupeqa Bibliamanta yachachikusqanta uyariyku. Chaykunapi yuyaychawasqaykoqa yanapawayku mana pisipaj qhawakunaykupaj. Tantakuykunasniykuman yaykunapajqa mana paganachu, pipis yaykullanman. Chaypitaj yachakunki…

… Dios sapa ujninchejta munakuwasqanchejta.
… kusisqa kausakunapaj imatachus ruwanata.
… sumaj amigosta tarinapaj imatachus ruwanata.

Chantapis sumaj amigosta chaypi tarinki, purajmanta munanakoj amigosta (1 Corintios 12:25, 26).

Tantakuykunasniykumanta astawan yachayta munanki chayqa, jw.org nisqapi ¿Imaynataj tantakuykunasniyku? nisqa videota qhawariy.

RUNASMAN BIBLIAMANTA YACHACHIYKU

Wiñaypaj kusisqa kausakuy librowan Bibliamanta gratislla yachachiyku. Chay libropeqa tiyan Bibliamanta textos, sumaj sutʼinchaykunas, sumaj tapuykunas, kʼachitu videos, kʼachitu dibujos ima. Bibliamanta yachachisqaykoqa, runasta yanapan mana pisipaj qhawakunankupaj, aswan sumajtataj kausakunankupaj.

Jehovaj testigosninwan Bibliamanta yachakuwaj. Imaynatachus chay yanapasunanta yachayta munanki chayqa, jw.org nisqapi ¿Imaraykutaj Bibliamanta yachakuna? nisqa videota qhawariy.