11 rakʼiy
Musuq pachapi kawsayta munaqkunata tantakuchkanña
1, 2. ¿Ima profeciatataq juntʼakuqta rikuchkanchik?
SATANASPA saqra pachan tukukapuchkanña, chaywanpis, Diospa musuq pachanpi kawsayta munaqkunata kunanña tantakuchkan. Diosqa, tukuy rikunankupaqjina, tukuy suyusmanta runasta tantachkan, paykunawantaq juk musuq llaqtata ruwachkan, mayqinchus, saqra pachap cuentanmanta sayachisqa kanqa. Bibliaqa, chay runasta 2 Pedro 3:13 pʼitipi, ‘musuq jallpʼa’ nispa sutichan.
2 Biblia nillantaq: “Qhepa pʼunchaykunapi [tiemponchikpi] kay jina kanqa: [...] Ashkha runas jamuspa, nenqanku: Jakuchej, Tata Diospa orqonman [chiqa yupaychayninman] wicharinachej [...] payqa ñankunanmanta yachachiwasunchej, chaki ñankunampi purinanchejpaj” (Isaías 2:2, 3).
3. a) ¿Pikunapitaq Isaiaspa nisqan juntʼakuchkan? b) ¿Imatá Apocalipsis libro chaymanta nin?
3 Chay profeciaqa, ‘Diospa ñanninpi puriqkunapi’ juntʼakuchkan. Bibliamanta Apocalipsis libroqa, chay tukuy suyusmanta allin kawsayta munaq runas, ‘tukuy nacionesmanta, llaqtasmanta, qallusmanta ima, may chhika runas kasqankuta’, nin. Chiqamanta paykunaqa, juk llaqtajinalla Diosta yupaychachkanku. Bibliaqa, chay runasmanta nin: “Kaykunaqa chay jatun ñakʼariy tiempomanta llojsimojkuna kanku”, nispa. Chay niyta munan, paykuna, kay saqra pacha chinkachisqa kachkaptin, mana wañunankuta (Apocalipsis 7:9, 14; Mateo 24:3).
Juk llaqtajinalla Diosta yupaychachkanku
4, 5. ¿Imaraykutaq Jehovamanta sutʼinchaqkuna, jukchasqa llaqtajina kawsakuyta atinku?
4 May chhika Jehovamanta sutʼinchaqkuna, Diospa kamachisqanmanjina kawsanankupaq kallpachakunku. Paykunaqa, Diospa musuq pachanta, suyakunku. Sapa pʼunchay kawsayninkupi, Diospa kamachisqanta kasukunku, chaytaq, Diospa kamachiyninta, mana kunanllachu manaqa musuq pachapipis kasukuyta munasqankuta, rikuchin. Tukuyniqpi, ima suyumanta, ima layamanta kaspapis, Diospa Palabranpi kamachiykunata kasukunku. Chayrayku, juk llaqtajinalla kanku, nisunman, Diospa musuq pachanpi kawsanankupaqjina kasqankuta (Isaías 54:13; Mateo 22:37, 38; Juan 15:9, 14).
5 Jehovamanta sutʼinchaqkunaqa, jukchasqa llaqtajina kasqankumanta mana jatunchakunkuchu, imaraykuchus, Diospa espiritunniqta jukchasqa kasqankuta yachanku (Hechos 5:29, 32; Gálatas 5:22, 23). Chiqamanta, Dioslla jukchayta atin. Jesús nirqajina: “Runaspaj mana atikojqa Diospaj atikumpuni”, nispa (Lucas 18:27). Tukuy imata ruwaq Dios, chay musuq llaqtata wiñaypaq sayachichkan.
6. Jehovamanta sutʼinchaqkuna jukchasqa kasqanku, ¿imaraykutaq juk milagrojina kasqanta nisunman?
6 Chayrayku, Dios imaynatachus musuq pachapi kamachinantaqa, kunanña chaypi kawsayta munaqkunata kamachichkasqanpi rikuchkanchik. Chayrayku, llaqtanwan ruwasqanqa, juk milagrojina kasqanta nisunman. ¿Imaraykutaq? Imaraykuchus Jehovamanta sutʼinchaqkunaqa, chiqamanta jukchasqa llaqta kanku, chaytataq, ni layankupis, ni suyunkupis, ni wak imaspis, tʼaqayta atinmanchu. May chhika Jehovamanta sutʼinchaqkuna, iskay pachak kimsa chunka suqtayuq suyuspi kaspapis, mana tʼaqayta atinapaqjina jukchasqas kachkanku. Chiqamanta chay llaqtaqa, kunan tiempopi Diospa ruwasqan milagrojina kasqanta nisunman (Isaías 43:10, 11, 21; Hechos 10:34, 35; Gálatas 3:28).
¿Imaynatá Diospa llaqtanta riqsiwaq?
7. Jesús nisqanmanjina, ¿imaynamantá Diospa llaqtanta riqsikunan karqa?
7 ¿Imaynamantawantaq, Diospa musuq pachanpi kawsayta munaqkunata riqsiyta atinkiman? Jesús kay Juan 13:34, 35 nisqanta, ¿pikunataq juntʼachkanku? Pay nirqa: “Uj mosoj kamachisqata qoykichej: Purajmanta munanakuychej. Imaynatachus noqa munakorqaykichej, ajinallatataj qankunapis purajmanta munanakuychej. Qankunachus munanakunkichej chayqa, tukuy runas yachanqanku yachachisqasniy kasqaykichejta”. Jehovamanta sutʼinchaqkunaqa, Jesuspa nisqanta juntʼanku, nisqanmanjinataq ruwanku. Diospa Palabranpi ninjina, paykunaqa, ‘tukuy sunqu munanakunku’ (1 Pedro 4:8). Chantapis, ‘munakuywan pʼachawanjina pʼachallikunku, imaraykuchus munakuyqa, chay tukuyninta jukllaman tukuchin’ (Colosenses 3:14). Chayrayku, paykunaqa, munanakusqankurayku Jallpʼantinpi “jukchasqa” kanku.
8. ¿Imaynamantá 1 Juan 3:10-12, Diospa llaqtanta riqsinaykipaq yanapasunkiman?
8 Chantapis, 1 Juan 3:10-12 nin: “Kay jinapi yachakun Diospa wawasninchus, chayri Kuraj Supaypatachus kasqankoqa. Mana cheqan kajta ruwajqa mana Diospa wawanchu, nitaj hermanontapis mana munakojqa. Kaymin qallariymantapacha uyarisqaykichej chay willayqa: Ujkuna ujkunawan munanakunanchej. Mana Cain jinachu kananchej; payqa Kuraj Supaymanta kaspa, wawqenta wañucherqa”. Rikunchikjina, Diospa llaqtan achkha suyusmanta kaspapis, mana chiqninakunkuchu.
¿Imaynamantawantaq riqsiwaq?
9, 10. a) ¿Imaynamantá riqsillawaqtaq, Diospa kamachisninta? b) ¿Imaynamantá Jehovamanta sutʼinchaqkuna, Mateo 24:14 nisqanta juntʼachkanku?
9 Diospa kamachisnintaqa, wakjinamanta riqsillawaqtaq. Jesús, kay pachap tukukuyninmanta profeciasta nichkaspaqa, imachus tukukuy pʼunchaykunapi kachkasqanchikta rikuchinanmanta, parlallarqataq (9 rakʼiyta qhawariy). Chaykunamanta, jukqa, kay Mateo 24:14 tarikun, nintaq: “Janaj pacha reinomanta evangelio tukuynejpi willasqa kanqa, tukuy runas yachanankupaj; chaypachama tukukoyqa jamonqa”.
10 ¿Rikunchikchu chay profecía juntʼakuchkasqanta? Arí. Jehovamanta sutʼinchaqkunaqa, tukukuy pʼunchaykuna 1914 watapi qallarisqanmantapacha, Jesús nisqanmanjina, Diospa Reinonmanta Jallpʼantinpi, wasimanta wasi willachkanku (Mateo 10:7, 12; Hechos 20:20). May chhika Jehovamanta sutʼinchaqkuna, musuq pachamanta willanankupaq, runaspa wasinman willaq rinku. Chayrayku, qampis kay folletota ñawirichkanki, imaraykuchus Jehovamanta sutʼinchaqkunaqa, Jallpʼantinpi Diospa Reinonmanta willanankupaq, may chhika publicacionesta urqhunku. ¿Riqsinkichu wakkunata, Jallpʼantinpi Diospa Reinonmanta willaqkunata? Chantapis, Marcos 13:10 rikuchisqanmanjinaqa, niraq tukukuy pʼunchay chayamuchkaptin, “ñawpajta tukuy nacionespi willakunampuni tiyan”.
Iskay kaq jatun tapuypa kutichiynin
11. Jehovamanta sutʼinchaqkuna Diospa kamachiyninta kasukuspa, ¿imatá rikuchinku?
11 Jehovamanta sutʼinchaqkuna, Diospa kamachiyninta kasukuspaqa, Satanás llulla kasqanta rikuchichkanku. Imaraykuchus Satanasqa, wak parlaypi nirqa: Ni mayqin runapis Diosman juntʼa sunqu kanqachu, saqra ruwayman tanqaptinkuqa, nispa (Job 2:1-5). Jehovamanta sutʼinchaqkunaqa, jukchasqa llaqtajina Diospa kamachiyninman, chiqa sunqu kasqankuta rikuchinku. Juchasapa runas kaspapis, Satanás paykunata tanqaptinpis, llaqtajinaqa manapuni Diospa kamachiyninta wasanchankuchu.
12. Jehovamanta sutʼinchaqkuna, ¿pikunajina kasqankutataq rikuchinku?
12 Kay tiempomanta Jehovamanta sutʼinchaqkunaqa, chay sutʼinchasqankuwan, ñawpa tiempopi Diosman juntʼa sunqu runasjina kasqankuta rikuchinku. Diosman juntʼa sunqu runasmanta wakinqa: Abel, Noé, Job, Abraham, Sara, Isaac, Jacob, Débora, Rut, David, Daniel ima, kanku (Hebreos, 11 tʼaqa). Biblia nisqanmanjina, chiqamantapuni ‘chay chhika testigoswan muyurisqa kachkachik’ (Hebreos 12:1). Chantapis, Jesuspa discipulosnin, Diosman juntʼa sunqu kallarqankutaq. Jesuspis, mana imapi pantaspa Diosman juntʼa sunqu kasqanta rikuchillarqataq.
13. ¿Jesuspa, ima nisqantaq chiqapuni kasqanta rikukun?
13 Kaytaq, Jesús, judiospa religionninkuta umachaqkunaman, Satanasmanta nisqan, chiqapuni kasqanta rikuchin, pay nirqa: “Qankunaqa wañuchiwayta munankichej, qankunaman cheqa kajta willashajtiy, Diosmanta mayqentachus uyarerqani, chayta. [...] Qankunaqa tataykichej Kuraj Supaymanta kankichej, chay tataykichejpa munaynintataj ruwayta munankichej. Payqa runa wañuchipuni qallariymantapacha, manataj jaykʼajpis cheqapeqa sayanchu. Cheqa kajqa sonqompi mana kanchu; llullata parlaspaqa, paypa kaynillanmanta parlan, imaraykuchus payqa llulla, llullakuypa tatantaj” (Juan 8:40, 44).
¿Imatataq akllanki?
14. Musuq pachapi kawsanankupaq tantasqa runas, ¿imatá kunan ruwachkanku?
14 Dios, tukuy suyusmanta runasta musuq pachapi kawsanankupaq tantasqanqa, aswan sinchita sayachkan. Sapa wata may chhika runas, chiqa kaqta yachakusqankumanjina, akllayta atisqankuta, Diospa kamachiyninta akllanankupaq apaykachanku. Paykunaqa, Diospa llaqtanwan khuska, Diospa kamachiyninta mana wasanchankuchu, chantapis, Satanás llulla kasqanta rikuchinku.
15. ¿Ima tʼaqakuytaq kunan tiempopi ruwakunqa?
15 Paykuna, Diospa kamachiyninta akllaspaqa, Cristo “ovejasta cabrasmanta” tʼaqaptʼin, paypa “pañanman” churasqa kanankupaq kasqankuta rikuchinqanku. Jesús, tukukuy pʼunchaykunamanta parlachkaspa, nirqa: “Tukuynejmantataj tukuy laya runas ñawpaqenman tantakamonqanku. Paytaj ujkunata ujkunamanta tʼaqanqa, imaynatachus michejpis ovejasta cabrasmanta wajman tʼaqan, ajinata. Ovejasta pañanman churanqa, cabrastataj lloqʼenman”. Ovejasqa, Cristop hermanosninwan masichakuq llampʼu sunqu runas kanku, pikunachus, Diosta kamachiqninkupaq akllanku. Cabrastaq, Cristop hermanosninta qhisachaq kʼullu runas kanku, nitaq Diospa kamachiynintapis kasukunkuchu. ¿Imatá tarinqanku chayta ruwasqankurayku? Jesús nirqa: “Chaykunaqa wiñay [wañuyman] renqanku, cheqan kajta ruwajkunataj wiñay kawsayman renqanku” (Mateo 25:31-46).
16. Paraisopi tiyakuyta munaptiyki, ¿imatá ruwanayki tiyan?
16 Arí, ¡Diosqa, chiqamantapuni munakuwanchik! Payqa, juk chhikamantawan Jallpʼapi juk paraisota sayarichinqa. ¿Munawaqchu qampis, chaypi tiyakuyta? Jina kaptinqa, Jehová qususqanta jatunpaq qhawasqaykita rikuchiy, paymanta yachakuspa, chaymanjinataq ruway. Biblia nin: “Tata Diosta maskʼaychej, kunan tarinapaj jina kashajtin; kunan qayllapi kashajtin, Diosta wajyakuychej. Juchasapaqa sajra kawsayninta saqechun. Sajra runapis imatachus yuyasqasninta saqechun. Tata Diosman kutirikuchun, imaraykuchus paymanta khuyakonqa” (Isaías 55:6, 7).
17. ¿Imaraykutaq, usqhayllata pitachus kasukuyta munasqaykita akllanayki tiyan?
17 Ama jinallaqa qhipakuychu. Tumpamantawanqa, kay saqra pacha tukukapunqa. Diospa Palabran yuyaychan: “Kay pachaj yuyayninman jina kawsayta ama munakuychejchu nitaj kay pachapi kaj imastapis. Pichus kay pachaj yuyayninman jina kawsayta munakojqa Dios Tatata mana munakunchu. [...] Kay pachaqa tukukapushan, jinallataj chay sajra munaynimpis; Diospa munayninta ruwajri, wiñaypaj kawsanqa” (1 Juan 2:15-17).
18. ¿Imatá ruwanayki tiyan, Diospa musuq pachanpi kawsayta suyakunaykipaq?
18 Diospa llaqtanqa, musuq pachapi kawsanankupaq kunan tiempo yachachisqa kachkanku. Paykunaqa, kʼacha kaykunata, wak imastawan, Jallpʼata juk paraisoman tukuchinankupaq yachakuchkanku. Qampis, Diosta Kamachiqniyki kananpaq akllay, Jallpʼantinpi Reinonmanta willakuchkasqanman yanapaysikunaykipaq, Diospa kamachisninwan jukchakuy. Jehovamanta sutʼinchaqkunawan, Bibliamanta yachakuy, chiqamanta munakusuq Diosta riqsiy, Pichus ñakʼariykunata chinkachinqa. Ajinamanta qampis, Diospa musuq pachanman yaykunaykipaq wakichikunki. Chantapis, Diospa khuyakuyninta suyakuyta atinki, wiñay wiñaypaqtaq, chay musuq pachapi kusisqa kawsayta atinki.
[31 paginapi dibujo/foto]
Jehovamanta sutʼinchaqkunaqa, Jallpʼantinpi juk sunqulla, juk yuyaylla kanku
[32 paginapi dibujo/foto]
Diospa musuq pachanpi sawsayta munaqkunata, kunanña tantakuchkan