4 rakiʼy

Diosqa, munayninmanta willawanchik

1, 2. ¿Imaynamantá Dios, runaspa tapuykunasninman kutichisqanta yachanchik?

MUNAKUYNIYUQ Diosqa, Payta maskʼaq runasman, imachus munaynin kasqanta willan. Payqa, runap tapuykunasninman kutichin, juk tapuytaq kay kachkan: ¿Imaraykutaq Dios, ñakʼariy kananta saqin?

² Biblia nin: “Ajinatachus payta maskʼanki chayqa, pay tarichikusonqa.” “Janaj pachapi uj Dios tiyan, pichus sutʼita rikuchin pakaypi kaj tukuy imasta.” “Tata Diosqa manamin imatapis ruwanchu manaraj ñawpajta profetasninman sutʼinchaspa.” (1 Crónicas 28:9; Daniel 2:28; Amós 3:7.)

¿Maypitaq kutichiykunata tarisunman?

3. Imaraykuchus Dios ñakʼariy kananta saqisqanmanta, ¿maypitaq kutichiyta tarisunman?

³ ¿Imaraykutaq Dios, ñakʼariy kananta saqin? ¿Imatataq ñakʼariyta chinkachinanpaq ruwanqa? Kay tapuykunaman kutichiykunaqa, Diospa yuyaychasqan qillqasqapi tarikun. Chay qillqasqataq, Palabran, Santa Biblia. Imaraykuchus, “Diosmanta tukuy Qhelqasqaqa paypa yuyaychasqan kaspa, may sumaj kashan yachachinapaj, juchata reparachinapaj, cheqa kajman kutirichinapaj, cheqanta kawsayta yachachinapaj ima. Ajinamanta Diospa kamachenqa ruwanapaj atiyniyoj kanqa, sumaj wakichisqataj tukuy ima allin kajta ruwanampaj.” (2 Timoteo 3:16, 17.)

4, 5. ¿Imaraykutaq ni mayqin libropis Bibliawan kikinchakunmanchu?

⁴ Ni mayqin libropis, Bibliawan kikinchakunmanchu. Unay tiempo runasmanta parlaspa, maychus kaqta willan, imaschus niraq runa ruwasqa kachkaptin kasqanmantapis, sutʼinchallantaq. Chantapis, Bibliaqa, kay tiemponchikpaqjina, imaraykuchus qillqasqa profeciasqa, kunan pʼunchaykunapi juntʼakuchkan. Jinallataq, imaschus aswan qhipaman kananta willawanchik.

⁵ Bibliallamanta, unay tiempo runaspa kawsayninmanta chiqata willasqanta ninku. Tʼukurina, unay tiempo runaspa qillqasqankuqa, wakillan kunankama tiyan. Chaywanpis, Bibliamanta copiasqa qillqakunaqa, wakinmanta chayri tukuyninmanta, kunankama tiyan. Hebreo qillqakunamanta, suqta waranqajina (“Ñawpa Testamentomanta” 39 librosnintin), Griego qillqakunamantataq, chunka kimsayuq waranqajina (“Musuq Testamentomanta” 27 librosnintin).

6. ¿Imaraykutaq tiemponchikmanta Biblias, Dios qallariypi yuyaycharqajina kasqanta nisunman?

⁶ Bibliata yuyaychaq, Tukuy Atiyniyuq Diosqa, Palabranmanta copiasqa qillqas, qallariypi qillqakurqajina kikin yuyayllapuni kananpaq jarkʼan. Chayrayku, tiemponchikmanta Bibliasqa, qallariypi qillqakurqajina, kikin yuyayllapuni kachkan. Astawan sutʼinchanapaq, Griego qillqakunaqa, qillqakusqanmanta pisi tiemponman copiakurqapacha. Runaspa qillqasqankutaqrí, achkha watasninmanraq copiasqa karqa.

Diospa qusqan

7. ¿Imaraykutaq Biblia, ni mayqin librojina runasman chayasqanta nikun?

⁷ Bibliaqa, ni mayqin librojina may chhika runasman chayan. Tawa waranqa junu Bibliasjinaña ruwakun. Ni mayqin librotapis, chay chhikata ruwankuchu. Chantapis, tukuynin Biblia chayri wakin librosnillanpis, iskay waranqa kimsa pachak kuraq qalluspiña tiyan. Chayrayku, sapa pachak runamanta, jisqʼun chunka kuraq runa, Bibliayuq kayta atinku.

8-10. ¿Imaraykutaq Bibliata ñawiriy, allin kasqanta niwaq?

⁸ Bibliaqa, kikinmanta Diospa yuyaychasqan kasqanta nin, chantapis chaypi qillqakusqanmanjina, wakkuna nisqankumanjina ima, chiqa kasqanqa, sutʼita yachakun. Chiqamanta kay librotaqa, ñawirinanchikpuni tiyan.a Kay libroqa, imaraykuchus kawsachkasqanchikta, imaraykuchus saqra ruwaykuna kachkasqanta, imachus aswan qhipaman kananta ima, sumaqta sutʼinchan. Ni mayqin libropis, jinata sutʼinchanmanchu.

⁹ Arí, Diosqa Biblianiqta runaswan parlan. Espíritu santonniqtataq, tawa chunka runaswan qillqachirqa. Chayrayku, Dios Biblianiqta, parlawasqanchikta ninchik. Apóstol Pablo qillqarqa: “Imaraykuchus Diospa Palabranta qankunaman willajtiyku, qankunaqa uyariytawan, tukuy sonqo chay Palabrata japʼikorqankichej, mana runaj palabranta jinachu, manachayqa cheqamanta Diospa Palabranta jina” (1 Tesalonicenses 2:13).

¹⁰ Estados Unidos suyumanta juk presidente, Abraham Lincoln sutiyuq, Bibliamanta jinata nirqa: “Bibliaqa, Diosmanta runaspaq juk sumaq qurisqan [...] Mana chay kanman chayqa, nichá imachus allin, imataqchus mana allin kasqanta yachayta atisunmanchu”, nispa. Jina kaptin, ¿imatataq Diospa Palabran, imaraykuchus Dios ñakʼariy kananta saqisqanmanta, chantá, imatachus ñakʼariywan ruwananmanta, niwanchik?

[Sutʼinchaynin]

[10 paginapi dibujo/foto]

Bibliaqa, Diospa yuyaychasqan, chayniqtataq munayninta runaman willan