Negociorayku phiñanakuy kaptin, ¿imaynatá allinchasunman?

Kay 1 Corintios 6:1-8 pʼitikunapi, apóstol Pablo parlachkarqa cristianopura phiñanakusqankumanta. Ñawpaqta, Pabloqa Corintomanta cristianospaq phiñakurqa, imaraykuchus paykunaqa phiñanakusqankurayku ‘mana creeq juezpaman quejakuq rirqanku’ (1 pʼiti). Chantá sutʼincharqa ima phiñanakuynillankutapis qutuchakuypi allinchanankuta, manataq mana creeq juezpa ñawpaqinpiqa. Chayrayku qhawarisunchik imaraykuchus apóstol Pablop nisqanmanjina ruwanamanta, chantá ima phiñanakuykunapichus rikukuspa mana apóstol Pablop nisqanmanjina ruwanamanta.

Negociorayku cristianos phiñanakunku chayqa, usqhayllata allinchananku tiyan, Jehovap nisqanmanjina, manataq paykunap munasqankumanjinachu (Proverbios 14:12). Chaymanta parlaspa Jesús nillarqataq, ima phiñanakuytapis usqhayllata allinchanata manaraq jatun phiñanakuypi tukuchkaptin (Mateo 5:23-26). Llakikunapaqjina wakin cristianosqa puraqmanta atipanakuyta munaspa, mana creeq juezkunaman rinku. Chayrayku Pablo sutʼinchan ‘paykunapura quejanakuspa pantachkasqankuta’. ¿Imarayku jinata nin? Imaraykuchus chayjina ruwayqa Diosninchikpa sutinta chʼichichan, chantá Diospa llaqtantapis. Mana chay kananpaqtaq apóstol Pablop nisqanta yuyarina, pay nin: “Imaraykutaj mana chʼinllamanta pacienciakunkichejchu, sajrata ruwasojtiykichej?”, nispa (7 pʼiti).

Apóstol Pablo sutʼincharqa phiñanakuyta allinchanapaq, Diosninchik ancianosta qutuchakuy ukhupi churasqanta. Kay cristianostaq yachayniyuq kanku Bibliata sumaqta ukhuncharisqankurayku. Chayrayku paykunaqa wakichisqa kanku kay kawsaypi ‘hermanospura quejanakuqkunata juzganankupaq’ (3-5 pʼitikuna). Jesuspis nillarqataq imatachus juk cristiano ruwananta, wak cristiano qhasimanta juchachaptin chayri chʼawkiyaptin. Ñawpaqtaqa sapallan chay hermanowan parlariq rinan tiyan; mana uyariptinri juk testigop chayri iskay testigospa ñawpaqinpi paywan parlarinan tiyan; chaypiwanpis mana uyariyta munaptinqa qutuchakuymanta ancianosman willanan tiyan (Mateo 18:15-17).

Chaywanpis ancianosqa mana abogadosjinachu nitaq negociosmanta yachayniyuq runasjinachu ruwananku tiyan. Manataq kamachiykunata churanqankuchu imastachus sapa juk ruwanankumanta. Astawanpis sutʼinchanqanku imaynatachus Bibliap yuyaychasqanmanjina ruwanankuta, kʼachamanta phiñanakuyninkuta allinchanankupaq. Chay chʼampayta ancianos mana allinchayta atispaqa, qutuchakuykunata waturikuqta tapurinkuman, mana chayri sucursalmanta yanapata mañarikunkuman. Chaywanpis, wakin chʼampaykunaqa mana Pablop nisqanmanjinapunichu allinchayta atikun. Chaymanta kunan parlarina.

Wakin kuti juk cristiano mana creeq juezkunaman demandata apasqanqa, mana paypa allinninta maskʼasqanraykullachu, manaqa juk chʼampayta mana phiñanakuspalla allinchayta munasqanrayku. Wakinkunataq chayta ruwanku tramitanankupaq segurota, divorciota, chayri wawas tatanwanchus, mamanwanchus qhipakunankupaq, chantapis pensionesta mañanankupaq, chayri mayqin testamentollatapis legalizachinankupaq. Astawanpis ichá juk cristiano, juk demandamanta jarkʼakunanrayku demandata churallanmantaq.a

Juk cristiano kayjina chʼampaykunapi rikukuspa juk juezman chʼampayninta kʼachamanta allinchananrayku rinman chayqa, mana ninayanchu apóstol Pablop nisqanta pʼakichkasqanta.b Mana qunqananchikchu tiyan Diosninchikpa sutinta llimphupi qhawachiyta munasqanchikta, hermanosninchikwantaq sunqu tiyasqas, jukchasqas ima kawsakuyta munasqanchiktapis. Jesuspa qhipanta puriqkunaqa munakuyniyuq kasqanchikrayku riqsisqas kanchik, jina munakuyniyuq kasqanchikraykutaq ‘mana nuqallanchikpaqchu imatapis maskʼanchik’ (1 Corintios 13:4, 5; Juan 13:34, 35).