ASTAWAN YACHAKUNAPAJ 10C
Jehová yanapawanchej sayarinapaj
¿IMAYNATÁ Ezequiel 37:1-14 versiculospi nisqan sapa ujninchejta yanapawasunman? Chay profeciapi tʼukureyqa mayta kallpachawasunman. Qhawarina imatachus chaymanta yachakuyta atisqanchejta.
Wakin problemasrayku chayri llakiykunarayku phutisqalla kanchej, manataj kallpanchej kanchu ñaupajman rinallapajpuni. Ezequiel mosqoypi jina rikusqanpi tʼukureyqa mayta kallpachawasunman ajina phutisqa kashajtinchej. Imaraykuchus chay profeciapi yachakunchej Diosqa may atiyniyoj kasqanta, chʼaki tullustapis kausarichisqanta. Chayrayku seguros kashanchej noqanchejmanpis kallpata qonawanchejmanta ima llakiytapis, ima problematapis atipanapaj, wakin problemas mana atipanapaj jina kasqanta yuyajtinchejpis (Salmo 18:29 leey; Fili. 4:13).
Ezequielmanta aswan ñaupajta profeta Moisesqa nerqa Jehová Diosqa kamachisninta kallpachayta atisqanta, yanapaytataj munasqanta. Moisesqa nerqa: “Diosqa unay watasmantapacha pakakunayki. Payqa wiñay makisninwan japʼishasunki”, nispa (Deu. 33:27). Chayrayku ima problemapis mayta llakichishawanchej chayqa, mana iskayrayaspa Jehovaman qayllaykuna, paytaj munakuwasqanchejrayku makisninwan japʼiwasun, munakuywan aysarispa watejmanta sayarinapaj yanapariwasun (Eze. 37:10).