1, 2. Ezequiel 47:1-12 nisqanman jina, ¿imatá Ezequiel rikorqa, chanta imatá repararqa?

EZEQUIEL mosqoypi jina templota rikusqanmanta watejmanta parlarina. Payqa rikorqa templomanta yaku llojsimushasqanta. Tʼukuriy imastachus profeta rikusqanpi chay mayuta qhatispa (Ezequiel 47:1-12 leey). Chay yakoqa temploj punku yaykunan uramanta llojsimushasqa. Temploj pationta pasaspataj, inti llojsimuy lado punku qayllata llojsimushasqa. Ezequielwan kasharqa chay angeltaj, templo jawaman llojsichispa, risqankuman jina midispa risqa. Chay angelqa Ezequielta ashkha kutista yakuta pasachisqa. Pasasqanman jina Ezequielqa reparasqa yakoqa astawan ashkhayasqanta. Astawan ashkhayasqanraykutaj nadaspallaña pasanapaj jina kasqa.

² Ezequielqa repararqa chay mayoqa Wañusqa qochaman chayasqanta. Maynintachus chay mayu pasan chay kʼara yakusqa jampisqa kasqa, nisunman llimphuchasqa. May chhika pescadostaj juntʼaykusqa. Chay mayu kantupipis may chhika sachʼasta wiñashajta rikusqa. Chay sachʼasqa sapa killa poqoj kasqa, laqhesnintaj jampinapaj kasqa. Tukuy chay imasta rikusqantaj Ezequielpa sonqontachá tiyaykucherqa, allin imastaj kanantachá suyakorqa. Mosqoypi jina rikusqan, ¿imaynatá payta yanaparqa, presos apasqa kajkunatapis? Noqanchejtarí, ¿imaynatá yanapawanchej?

¿Imaynatá presos apasqa kajkunata Ezequielpa rikusqan yanaparqa?

3. ¿Imajtintaj judíos Ezequielpa rikusqan mayuta mana uj mayupunichu kasqanta ninkuman karqa?

³ Chay tiempomanta judiosqa repararqankuchá Ezequielpa rikusqan mana mayupunichu kananta. Ezequielpa nisqanta uyarisqankoqa yuyaricherqachá profeta Joel may chhika watas ñaupajta qhelqasqanta (Joel 3:18 leey). Joel qhelqarqa: “Chay pʼunchayqa orqosmanta miskʼi vino sutʼurimonqa. Lomasmantapis lecheqa yaku jina uraykurimonqa. [...] Jehová Diospa wasinmantaqa yaku phullchirimonqa”. Joelpa profecianta leespa presochasqa judiosqa, sutʼitachá repararqanku uj kikinchay jinalla kasqanta. Ajinallatataj Ezequielpa rikusqantapis mana uj mayupunichu kasqanta repararqanku.a ¿Imatataj Jehová judiosman willachiyta munasharqa? Biblia chayta sutʼinchawanchej. Chay profeciamanta kinsa imasta sutʼincharina, chay imastaj Jehovaj munakuyninta rikuchiwasqanchejtapis.

4. 1) Judíos Ezequielpa profecianta uyarispa, ¿ima bendicionestataj japʼiyta yuyankuman karqa? 2) ¿Imamanta parlananpajtaj wakin versículos mayuta, yakuta oqharinku, imatataj chay sutʼita reparachiwanchej? (“Jehovamanta jamoj bendicionesniyoj mayus” nisqa recuadrota leeriy).

⁴ Bendicionesniyoj mayu. Bibliaqa ashkha kutista oqharin yakuta, mayusta Jehovaj bendicionesninmanta parlananpaj. Ezequielqa templomanta uj mayu llojsimusqanta rikorqa. Diospa llajtanmanta kajkunaqa repararqankuchá Jehová paykunata bendecinanta payllata yupaychajtinku. ¿Imaynatá bendecinman karqa? Sacerdotesqa watejmanta Diosmanta yachachinkuman karqa. Templopi watejmanta ofrendas jaywakusqanraykutaj, juchasninku perdonasqa kanman karqa (Eze. 44:15, 23; 45:17). Ajinamanta watejmanta llimphus kankuman karqa templomanta llojsimoj yakuswanpis mayllakunkuman jina.

5. Ezequiel rikusqanman jina, ¿tukuypajchu bendiciones kallanmanpuni karqa?

⁵ ¿Tukuypajpunichu bendiciones kallanmanpuni karqa? Arí. Ezequielpa rikusqan yakoqa, pisimanta pisi ashkhaman tukorqa. Uj chhika correshaj yakitumanta uj jatun mayuman tukorqa (Eze. 47:3-5). Presochasqa judíos llajtankuman kutejtinku, maytachá mirankuman karqa. Chayrayku Jehovaj bendicionninpis yapakullanmantaj karqa, llajtanman necesitasqanta qonanpaj. Chay mayoqa ashkha sumaj bendicioneswan ninakorqa.

6. 1) Ezequielpa profecian, ¿imayna kausay kanantataj reparachiwanchej? 2) ¿Tukuypunichu bendicionesta japʼinkuman karqa?

⁶ Kausayta qoj yaku. Ezequiel mosqoypi jina rikusqan mayoqa, Wañusqa qochaman chayaspa kausayta juntʼaykuchin. Chay mayoqa tukuy laya pescadosta rikhuricherqa, jatun marpi kan chay jinatapuni. Rikusqanman jinataj Wañusqa qocha kantupi pescadosta japʼispa trabajasharqanku iskay llajtaspa chaupinpi. Angeltaj nerqa: “Maynintachus kay mayu renqa chay cheqaspeqa tukuy ima kausanqa”, nispa. ¿Chay ninayanchu Jehovaj wasinmanta llojsimoj yaku Wañusqa qochaman tukuyninmanpuni juntʼaykunanta? Mana. Ángel nisqanman jinaqa mana chayanmanchu karqa yaku qochasniyoj jallpʼasman. Chay jallpʼasmanta nerqa: “Millu kʼara yakusniyojllapuni kanqanku”, nispa (Eze. 47:8-11).b Chay profecía nisqanman jina, Jehovallata yupaychajtinku Diospa llajtanqa, allinta kausakunkuman karqa. Jinapis mana tukuychu Jehovaj bendicionesninta japʼikunkuman karqa, chayraykutaj mana sanoyachisqaschu kankuman karqa.

7. ¿Imatataj judíos repararqanku mayu kantupi sachʼasmanta uyarispa?

⁷ Poqoyniyoj jampej sachʼas. Mayu kantupi rikusqan sachʼasqa, chay mayuta may kʼachitutachá rikucherqa, manataj chayllapajchu karqa. Ezequielwan chay waj judioswanqa, chay sachʼaspa frutanta mikhuriytachá munarqanku. Chay sachʼasqa sapa killa poqonkuman karqa. Chaywan Jehovaqa nishallarqataj, sumaj yachachiykunata mikhunata jina qonallantapuni. Profeciapeqa nillantaj chay sachʼaspa laqhesnenqa “jampinapaj” kasqanta (Eze. 47:12). Jehovaqa yacharqa jallpʼankuman kutipoj judíos, Jehovaj qayllanpi kanankupaj jampisqaraj kananku kasqanta. Chayrayku paykunata jampinanta nerqa. Waj profeciaspitaj sutʼinchan imaynatachus chayta ruwasqanta. Kay libroj 9 capitulonpitaj chayta sutʼinchashan.

8. ¿Imaraykutaj nisunman Ezequielpa rikusqan aswan allinninmantaraj juntʼakunanta?

⁸ Kay libroj 9 capitulonpi yachakorqanchej jina, Jerusalenman kutinpoj judiosqa uj tiempollata chay bendicionesta japʼerqanku. Chaypajtaj paykunallataj juchayoj karqanku. Paykunaqa mana kasukorqankuchu. Ñaupajta jina mana allin kajta watejmanta ruwarqanku. Jehovallata yupaychaytapis pisipaj qhawarqanku. Chayrayku, ¿imaynatá Jehová paykunata bendecillanmanpuni karqa? Chayta rikuspa kasukoj judiosqa maytachá llakikorqanku. Jinapis yacharqanku Jehová Diosqa nisqasninta juntʼasqantapuni (Josué 23:14 leey). Jinapis Ezequielpa rikusqanqa, aswan qhepaman aswan allinninmantaraj juntʼakunan karqa. ¿Maykʼajtaj?

Mayoqa kunanña puririshan

9. Ezequiel mosqoypi jina templota rikusqan, ¿maykʼajtaj aswan allinninmanta juntʼakunan karqa?

⁹ Kay libroj 14 capitulonpi yachakorqanchej Ezequiel templomanta rikusqanqa, “qhepa pʼunchaykunapi” aswan allinninmanta juntʼakunanta. Chay tiempopi Jehovallata yupaychayqa, aswan patapi churasqa kanan karqa (Isa. 2:2). Ezequielpa rikusqan, ¿imaynatataj kay tiempopi juntʼakushan?

10, 11. 1) ¿Ima bendicionestaj kay tiempopi mayu jina puririshan? 2) ¿Imaynatataj Jehovaj bendicionnin qhepa pʼunchaykunapi yapakushan?

¹⁰ Bendicionesniyoj mayu. ¿Ima bendicionestataj yuyarichiwanchej Jehovaj wasinmanta llojsimoj yaku? Chayqa yuyarichiwanchej Jehovaj qayllanpi kanapaj, sumaj yachachiykunata japʼinapaj imaschus tiyapuwasqanchejta. Aswan sumaj bendiciontaj, Jesucristo noqanchejrayku wañusqan. Wañusqanrayku juchasninchejmanta perdonasqa kayta atinchej. Chantapis Diospa Palabranmanta chʼuwa yachachiykunaqa, yaku jina llimphuchawanchej, kausaytataj qowanchej (Efe. 5:25-27). ¿Imaynatataj chay bendiciones kunan yaku jina puririshan?

¹¹ Jehovaj kamachisnenqa 1919 watapaj pisilla karqanku. Necesitasqanku yachachiykunata japʼispataj, kusisqa karqanku. Chaymantapachataj Diospa llajtanqa astawan yapakushan. Kunantaj 8 millonesmanta astawanña kanchej. Cheqa yachachiykunarí, ¿yaku jinallapunichu puririshan? Arí. Diosmanta yachachiykunaqa may chhika tiyapuwanchej. Diospa llajtanqa 100 watasta jinaña may chhikatapuni japʼin Bibliata, librosta, revistasta, folletosta, tratadosta ima. Ezequielpa rikusqan mayu jina, cheqa yachachiymanta yakoqa usqhayllata yapakushan jallpʼantinmanta kʼacha runasman chayananpaj. Chayrayku publicacionesta unay watasmantaña impriminchej. Kunantaj Internetpi jw.org paginanchejpi 1.000 kuraj qalluspi publicaciones tiyapuwanchej. ¿Imaynatataj cheqa yachachiykunamanta yakus kʼacha sonqoyoj runasta yanapashan?

12. 1) Reparasqaykiman jina, ¿imaynatataj Bibliaj yachachiykunasnin runasta yanapan? 2) Ezequielpa rikusqan, ¿imata mana ruwanapajtaj yanapawanchej? (Sutʼinchayninta qhawariy).

¹² Kausayta qoj yaku. Ezequiel kayta uyarerqa: “Maynintachus kay mayu renqa chay cheqaspeqa tukuy ima kausanqa”. Kaypi tʼukuriy. Cheqa yachachiymanta yakoqa, mayta yanapashan Diosllata yupaychanamanta “jallpʼaman” yaykumojkunata. Bibliaj yachachiykunasnenqa pikunachus tukuy sonqo japʼikojkunaman kausayta qon, Jehovapi creenankupajtaj yanapan. Ezequielpa rikusqanpeqa kayta reparallanchejtaj. Wakenqa manaña Bibliaj yachachiykunasninta japʼikunkuñachu. Chay runasqa sonqonkuta rumiyachispa manaña Bibliaj yachachiykunasninta kasukunkuñachu. Chay runasqa Ezequiel Wañusqa qochapi rikusqan yaku qochasniyoj jallpʼasman, pastosniyoj qochasman rijchʼakunku.c Ni jaykʼaj munasunmanchu chay runas jina kayta (Deuteronomio 10:16-18 leey).

13. ¿Imatataj yachachiwanchej Ezequiel mosqoypi jina sachʼasta rikusqan?

¹³ Poqoyniyoj jampej sachʼas. Mayu kantupi kaj sachʼasmanta, ¿imatataj yachakusunman? Chay sachʼasqa sapa killa poqoj, laqhesninpis jampikunapaj karqa (Eze. 47:12). Chayqa yuyarichiwanchej uj kʼacha Diosta sirvisqanchejta. Payqa sumaj yachachiykunata mikhunata jina qowanchej, jampiwanchejtaj paypa qayllallanpipuni kananchejpaj. Kay mundomanta runastaj Diospa ñaupaqenpi onqosqas, yarqhaymanta wañusqastaj kashanku. Noqanchejmantajrí Jehovaqa ashkha imasta qowanchej. Maytacharí kusikunchej, sonqo juntʼasqataj kanchej revistasninchejmanta uj yachaqanata leerispa, jatun tantakuyninchejmanta qhepa kaj takiyta takirispa, uj videota chayri JW Broadcasting® nisqata qhawarispa. Chaykunawan sumaj sajsachisqa kashanchej (Isa. 65:13, 14). Chay sumaj yachachiykunaqa Jehová Diospa qayllanpi kananchejpaj yanapawanchej. Bibliamanta sumaj yuyaychaykunaqa yanapawanchej, mana khuchichakuyman urmanapaj, mana munapayanapaj, mana pisi creeyniyoj kanapaj, mana waj sajra imasta ruwanapajpis. Jatun juchapi urmajtinchejpis Jehovaqa yanapallawanchejtaj onqoymanta jina sanoyapunanchejpaj (Santiago 5:14 leey). Ezequiel mosqoypi jina sachʼasta rikusqanqa, yuyarichiwanchej may chhika bendicionesta japʼishasqanchejta.

14, 15. 1) ¿Imatá yachakunchej Ezequiel yaku qochasniyoj jallpʼasta rikusqanmanta? 2) ¿Imaynatá chay mayoj bendicionesnin yanapawanchej?

¹⁴ Ezequielpa rikusqan mayoqa, mana jamperqachu yaku qochasniyoj jallpʼasta, pastosniyoj qochastapis. Noqanchejqa mana munasunmanchu Dioswan mana jampichikuyta munaj runas jina kaytaqa (Mat. 13:15). Chay runas jina kajtinchejqa, Jehová manaña bendeciwasunmanchu. Ezequielpa rikusqan mayumanta bendicionesta japʼispaqa, may kusisqas kashanchej. Chay mayumantaqa ichapis yuyarikunchej, Bibliaj yachachiyninta yakuta jina tomaspa, runasman willaj rispa, wajkunaman yachachispa, allin kamachi yuyayniyoj wakichisqan ancianos yanapawajtinchej, sonqochawajtinchej, yuyaychawajtinchejpis. Mayman chayajtinpis chay mayoqa kausayta qon, jampintaj.

¹⁵ ¿Imaynatá chay rikusqan aswan qhepaman juntʼakonqa? Yachakusunchej jina, chay mayoqa paraisopi ni jaykʼaj jina purirenqa.

Ezequielpa rikusqan, ¿imaynatá paraisopi juntʼakonqa?

16, 17. 1) ¿Imaynatá kausayta qoj yakus paraisopi yapakonqa? 2) ¿Imaynatá paraisopi yanapawasun chay bendicionesniyoj mayu?

¹⁶ ¿Tʼukurinkichu qan, familiaykiwan, amigosniykiwan paraisopi kusisqa kausakushasqaykita? Ezequiel mayuta rikusqanmanta yachakoyqa, chaypiñapis kashasunman jina yuyanapaj yanapawasun. Kunanqa watejmanta kinsa imasmanta yachakuna. Chaykunataj Jehovaj munakuyninta rikuchin.

¹⁷ Bendicionesniyoj mayu. Paraisopi chay mayoqa mana Dioswan allinpi kanallapajchu yanapawasun. Onqoykunasninchejmanta sanoyapunapajpis yanapawasun. Jesús 1.000 watasta gobernamushajtin, runasqa aswan allinninmanta yanapachikonqanku Jesuspa wañuyninwan. Pisimanta pisi mana juchayoj runasman tukonqanku. Manaña kanqachu onqoykuna. Chayrayku manaña necesitakonqachu jampis, hospitales, doctores, hospitalesman asegurasqa kaypis. Kausayta qoj yakusqa yanapanqa Armagedonmanta ‘may chhika runas’ salvakojkunata, pikunachus “manchay ñakʼariymanta” llojsenqanku chaykunata (Apo. 7:9, 14). Qallariypi chay mayus sumaj bendicionesta apamojtinpis, chayqa uj chhika yakitu jinalla kanqa. Qhepamanqa astawan ashkha bendiciones kanqa. Ezequielpa rikusqan mayu jinallataj, pisimanta pisi astawanraj yapakonqa runas astawan necesitasqankuman jina.

18. ¿Imaynamantataj ‘kausayta qoj yakuyoj mayu’ 1.000 wataspi uj jatun mayuman tukonqa?

¹⁸ Kausayta qoj yaku. 1.000 wataspi ‘kausayta qoj yakuyoj mayoqa’ uj jatun mayuman tukonqa (Apo. 22:1). May chhika waranqa waranqa runas kausarimonqanku, paraisopitaj wiñaypaj kausakuyta atenqanku. Wañusqas kausarimusqankoqa, Diospa Gobiernon bendicionesta apamusqanmanta ujnin kanqa. May chhika watastaña “jallpʼa ukhupi kajkuna”, nisunman ‘wañusqas’ kajkuna kausarimonqanku (Isa. 26:19). Jinapis, ¿tukuy kausarimojkunachu wiñaypaj kausakonqanku?

19. 1) ¿Imatataj Jehová paraisopi qollawasunpuni, imaynapitaj chayta yachanchej? 2) ¿Imaynapitaj wakin runas paraisopi “millu kʼara yakusniyojllapuni” kanqanku?

¹⁹ Wiñaypaj kausanankoqa sapa ujmanta kanqa. Paraisopeqa mosoj kʼuyuna libros kicharikonqanku. Jehovamanta jamoj chay yakusqa, mosoj kamachiykunata, mosoj yachachiykunatapis chayachimonqa. Chayqa may sumaj kanqa. Wakintaj chay bendicionta mana japʼikonqankuchu, Jehová Diostapis mana kasukonqankuchu. Sichus pillapis chay waranqa wataspi Diospa contranta oqharikonqa chayqa, Diosqa mana saqenqachu allin kausayta mana allinman tukuchinanta (Isa. 65:20). Chayqa yuyarichiwanchej Ezequielpa rikusqan yaku qochasniyoj jallpʼasta, mayqenkunachus ‘millu kʼarallapuni’ karqanku chaykunata. Kausay yakuta mana tomayta munajkunaqa, manapuni allintachu ruwanqanku. 1.000 watas pasasqantawan, Diospa contranta oqharikojkunaqa Satanasman kutikonqanku. Pikunachus Jehovaj cheqa kamachiykunasninta mana kasukojkunaqa, tukuyninku wiñaypaj wañuchisqa kanqanku (Apo. 20:7-12).

20. ¿Jehová 1.000 wataspi imasta ruwasqantaj Ezequielpa rikusqan sachʼasman rijchʼakonqa?

²⁰ Poqoyniyoj jampej sachʼas. Jehová Diosqa wiñaypaj kausakunanchejta munan. Chaypajtaj Ezequielpa rikusqan sachʼasta jina sumaj imasta ruwanqa. Chaytaj mana Jehovaman qayllaykunallapajchu yanapawasun, yanapallawasuntaj sanos kananchejpajpis. Chay 1.000 wataspeqa Jesuswan 144.000 ajllasqa cristianoswan cielopi reyes kanqanku. Sacerdotes jinataj Cristoj wañuyninwan runasta yanapanqanku, mana juchayoj runasman tukunankupaj (Apo. 20:6). Sumaj poqoyniyoj, jampinapaj laqhesniyoj sachʼasta Ezequielpa rikusqanqa, Juanpa qhelqasqan profeciaman rijchʼakun (Apocalipsis 22:1, 2 leey). Juan rikusqanman jina “chay sachʼaspa laqhesnenqa nacionesta jampinapaj karqa”. May chhika kasukoj runasqa, yanapachikonqanku 144.000 ajllasqas sacerdote ruwanasninkuta juntʼasqankuwan.

21. 1) Ezequielpa rikusqan mayumanta yachakuy, ¿imaynatá yanapawanchej? (“Uj chhika yakitu jatun mayuman tukun” nisqa recuadrota leeriy). 2) ¿Imatataj qhepan capitulospi yachakusun?

²¹ Ezequielpa rikusqan mayumanta yachakuspaqa sonqo juntʼasqa kanchej, sumaj kausaytataj suyakushanchej. Chaytataj Jehovaqa may chhika watas ñaupajtaña qhelqacherqa. Chaymantapachataj Diosqa runasta pacienciawan wajyashan, chay nisqanta juntʼakojta rikunankupaj. Ichapis qanqa tapukushanki: “¿Rikuymanchu chayta?”, nispa. Ezequielpa profecianpa tukukuynenqa, atikunanta nin. Qhawarina imaraykuchus chayta nisqanchejta.

1, 2. 1) ¿Imata ruwanantataj Jehová Ezequielta nerqa? 2) ¿Ima tapuykunatá kutichisun?

IMATACHUS Ezequiel 593 watapi mosqoypi jina rikusqanqa yuyaricherqachá 900 watas ñaupajta Moisespa tiemponpi, Josuej tiemponpi imachus pasasqanta. Chaypacha Jehovaqa Moisesman nerqa maynejkunachus sumaj jallpʼaj lindesnin kananta, aswan qhepamantaj Josueman nerqa imaynatachus Israelpa ayllusninman chay jallpʼata partinanta (Núm. 34:1-15; Jos. 13:7; 22:4, 9). Chayman rijchʼakojllatataj Jehovaqa Ezequielman, presos apasqa kajkunamanpis chay Sumaj Jallpʼata Israelpa ayllusninman partinankuta nerqa (Eze. 45:1; 47:14; 48:29).

² ¿Ima niytá munarqa chay rikusqan Ezequielpaj, presos apasqa kajkunapajpis? ¿Imaynatá noqanchejtapis kay tiempopi kallpachawanchej? ¿Qhepaman aswan allinninmanta juntʼakullanmantajchu?

Mosqoypi jina rikusqanqa tawa garantiasniyoj

3, 4. 1) Ezequielpa qhepa kaj rikusqan, ¿ima tawa garantiastataj presos apasqa kajkunaman qorqa? 2) ¿Ima garantiamantataj kay capitulopi yachakusunchej?

³ Ezequiel mosqoypi jina qhepa kajta rikusqanqa jisqʼon capitulospi rikhurin (Eze. 40:1–48:35). Chaytaj presos apasqa kajkunaman tawa garantiasta qorqa Israel nación watejmanta sayarichisqa kananmanta: Uj kaj, Diospa templonpi watejmanta Jehovallata yupaychanankuta. Iskay kaj, nacionninku watejmanta sayarichisqaña kajtin, sacerdotes, cheqan michejkunapis paykunata pusanankuta. Kinsa kaj, Israelman tukuy kutejkuna jallpʼata herenciata jina japʼinankuta. Tawa kaj, Jehová paykunawan kananta, nisunman watejmanta paykuna chaupipi tiyakunanta.

⁴ Kay libroj 13 chantá 14 capitulosninpi, ñaupaj iskay garantiasta sutʼinchakunña: Jehovallata yupaychay watejmanta sayarichisqa kananta, chantá Diospa llajtanta cheqan michejkuna pusaykachanankuta. Kay capitulopeqa kinsa kaj garantiamanta yachakusunchej: Jallpʼamanta uj parteta herenciata jina japʼinamanta. Qhepan capitulopitaj Jehová llajtan chaupipi tiyakunanmanta yachakusunchej (Eze. 47:13-21; 48:1-7, 23-29).

‘Kay jallpʼaqa herenciaykichej jina rakʼisqa kashan’

5, 6. 1) Ezequiel rikusqanman jina, ¿ima jallpʼatataj tʼaqakunan karqa? (Qallariypi kaj dibujota qhawariy). 2) ¿Imajtintaj chay jallpʼaj lindesninta sutʼita willakorqa?

⁵ (Ezequiel 47:14 leey). Jehovaqa mosqoypi jina Ezequielman nerqa chay jallpʼamanta uj cheqa “Edén huertaman jina” tukunanta (Eze. 36:35). Chantá Jehová nerqa: “Qankunaqa kay jallpʼata herenciata jina tʼaqankichej Israelpa 12 ayllusninman”, nispa (Eze. 47:13). Tʼaqananku karqa chay ‘jallpʼaqa’ Israelpa jallpʼan karqa, mayqenmanchus presochasqa kajkuna kutinpunanku karqa, watejmantataj sayarichisqa kanan karqa chay. Chantá Ezequiel 47:15-21 nisqanman jina, Jehovaqa maynejkunachus chay jallpʼaj lindesnin kasqanta sutʼita willarqa.

⁶ ¿Imajtintaj chay jallpʼaj lindesninta sutʼita willakorqa? Ezequielpis chay waj judiospis sutʼita yachanankupaj munasqa jallpʼanku watejmanta sayarichisqa kananta. Jehová chay garantiata qosqanqa maytachá kallpacharqa presochasqa kajkunata. ¿Diospa llajtan jallpʼata herenciata jina japʼerqapunichu? Arí, japʼerqapuni.

7. 1) ¿Imataj pasarqa 537 watamantapacha? ¿Imataj kay tiempopi chayman rijchʼakojllataj karqa? 2) ¿Imatá kunan yachakusun?

⁷ Ezequiel chayta rikusqanmanta 56 watasninman jina, 537 watamantapacha may chhika presochasqa kajkuna Israel jallpʼaman kutispa chaypi tiyakorqanku. Chayman rijchʼakojllatataj kay tiempopi Diospa llajtanqa uj “jallpʼata” japʼillantaj. ¿Imataj chay jallpʼa? Jehovaqa kamachisninta uj “jallpʼaman” yaykucherqa, chaypi payllata yupaychanankupaj. Chayrayku ñaupa tiempopi Sumaj Jallpʼa watejmanta sayarichisqa kasqanta yachaspaqa, mayta yachakusunman imaynatachus kay tiempopi Diospa llajtanpa “jallpʼan” watejmanta sayarichisqa kasqanmanta. Niraj chayta yachakushaspataj qhawarina imajtinchus kay tiempopi Diospa llajtanpa “jallpʼan” kasqantapuni nisqanchejta.

8. 1) ¿Ima naciontataj Jehová rikhuricherqa Israel nacionpa cuentanmanta? 2) ¿Imataj Diospa llajtanpa “jallpʼan”? 3) ¿Maykʼajtaj chay “jallpʼa” rikhurerqa, pikunataj chay “jallpʼapi” tiyakuyta qallarerqanku?

⁸ Jehovaqa aswan ñaupajtaña Ezequielta nerqa Israel jallpʼa watejmanta sayarichisqa kasqanqa aswan allinninmantaraj juntʼakunanta. Chayqa juntʼakunan karqa ‘kamachin David’, nisunman Jesucristo 1914 watapi kamachiyta qallarisqanmanta qhepaman (Eze. 37:24). Chay watapaj Israelqa may chhika watasña manaña Diospa ajllasqa llajtanchu karqa, cuentanmantaqa espíritu santowan ajllasqa cristianos nación jina churasqa karqanku (Mateo 21:43; 1 Pedro 2:9 leey). Chantapis Jehovaqa chay mosoj nacionman mana Israelpa jallpʼantachu qorqa, manaqa waj jallpʼata (Isa. 66:8). Kay libroj 17 capitulonpi yachakorqanchej jina, ajllasqa cristianosmanta puchojkuna 1919 watapi chay jallpʼapi tiyakuyta qallarerqanku (9B “¿Imajtintaj 1919?” nisqa recuadrota leeriy). Chayqa niyta munan paykuna llimphuchasqa kasqankuta Jehovallata yupaychanankupaj. Tiempowanqa ‘waj ovejasmanta’ kajkuna, nisunman pikunachus kay jallpʼapi wiñaypaj kausakuyta suyakushanku chaykuna, chay “jallpʼapi” tiyakuyta qallarillarqankutaj (Juan 10:16). Chay “jallpʼa” jatunyashallanpuni chaypis, Armagedón pasaytaraj tukuynin bendicionesninta japʼisun.

Jallpʼata uj rejta, allinsitutataj tʼaqanku

9. ¿Imaynatá Jehová kamacherqa jallpʼata rakʼinankuta?

⁹ (Ezequiel 48:1, 28 leey). Jehovaqa maynejkunachus nacionpa lindesnin kananta niytawan kamachillarqataj imaynatachus chay jallpʼata rakʼinankuta. Kamacherqa 12 ayllus japʼinanku karqa chay jallpʼata uj rejta, allinsitutataj tʼaqanankuta norte ladomanta sur ladokama. Norte ladopi Dan aylluwan qallarispa, sur ladopitaj Gad aylluwan tukuspa. Sapa aylloj jallpʼanqa chhoqo kanan karqa, inti llojsimuy ladopi nacionpa lindenmantapacha, inti yaykuy ladopi Jatun markama, nisunman mar Mediterraneokama (Eze. 47:20).

10. Jallpʼa imaynatachus tʼaqakunanta yachaspa, ¿imatá presos apasqa kajkuna sutʼita repararqanku?

¹⁰ Jallpʼa imaynatachus tʼaqakunanta yachaspa, ¿imatá presos apasqa kajkuna sutʼita repararqanku? Repararqankuchá jallpʼaqa uj rejta, allinsitutataj tʼaqasqa kananta. Chantapis 12 ayllusman uj rejta tʼaqakunanta nikusqanqa sutʼita rikucherqa Israelman tukuy kutejkuna jallpʼata japʼinankuta. Tukuyninku jallpʼayojtaj wasiyojtaj kankuman karqa.

11. ¿Imaynatá Ezequielpa rikusqan noqanchejtapis kallpachawasunman? (“Jallpʼa tʼaqasqa kasqanmanta” nisqa recuadrota leeriy).

¹¹ ¿Imaynatá Ezequielpa rikusqan noqanchejtapis kallpachawasunman? Mana sacerdotesllachu, levitasllachu, kamachejkunallachu chay Sumaj Jallpʼapi jallpʼayoj kankuman karqa, manachayqa chunka iskayniyoj ayllusmanta tukuyninkupis (Eze. 45:4, 5, 7, 8). Kikillantataj Diospa llajtanpa “jallpʼanqa”, maypichus payllata yupaychanku chayqa, mana ajllasqa cristianosmanta puchojkunallapajchu, nitaj ‘may chhika runasmanta’ Diospa llajtanta pusajkunallapajchu (Apo. 7:9).a Tukuyninchej chay “jallpʼapi” kayta atinchej, sumaj ruwayniyojtaj kanchej Diospa llajtanpi may pisisitullata ruwaysikojtinchejpis. Chaytaj mayta kallpachawanchej.

Iskay imas mana kikinchu kasqanmanta, ¿imatá yachakusunman?

12, 13. ¿Imaynatá Jehová kamacherqa ayllusman jallpʼata tʼaqanankuta?

¹² Imaynatachus jallpʼata tʼaqakunanta Jehová kamachisqanqa ichapis Ezequielta tʼukuchinman karqa, Moisesman kamachisqanwan mana kikinchu kasqanrayku. Iskay imaspi mana kikinchu karqa: Imaynatachus jallpʼata tʼaqakusqan, pikunamanchus jallpʼata tʼaqakusqanpis.

¹³ Jallpʼata tʼaqakusqan. Moisesqa aswan jatun ayllusman aswan jatun jallpʼata qonan karqa (Núm. 26:52-54). Ezequielmantajrí Jehová nerqa tukuynin ayllus jallpʼata “uj rejta” japʼinankuta (Eze. 47:14). Chayrayku nortemantapacha surkama, sapa aylloj jallpʼanqa chhikankamalla kanan karqa. Chay sumaj jallpʼapi poqosqanqa tukuy israelitaspaj kanan karqa, mayqen ayllumanta kajtinkupis.

14. ¿Imapitaj mana kikinchu karqa Jehová Ezequielman forasterosmanta kamachisqanwan, Leypi forasterosmanta nisqanwan?

¹⁴ Pikunamanchus tʼaqakusqan. Moisespa Leyninpeqa nerqa forasterosta ama llakichinankuta, Jehovatapis yupaychayta atisqankuta, jinapis jallpʼataqa mana herenciata jina japʼiyta aterqankuchu (Lev. 19:33, 34). Ezequielmantajrí Diosqa waj jinata kamacherqa. Paymanqa nerqa: “Forasteromanqa mayqen aylloj jallpʼanpichus tiyakun, chaypi herenciata qonaykichej tiyan”, nispa. Chayta kamachispa Jehovaqa nisharqa, ‘nacekusqankumantapacha israelitaspuni’ kajkunawan forasteroswan uj rejllaña kasqankuta (Eze. 47:22, 23). Ezequiel watejmanta sayarichisqa jallpʼata rikusqanpi, chaypi tiyakojkunaqa tukuyninku ujchasqa kasharqanku, Jehovata khuska yupaychaspa (Lev. 25:23).

15. ¿Imataj Jehovamanta sutʼita yachakun imaynatachus chanta pikunamanchus jallpʼata tʼaqakunanta kamachisqanpi?

¹⁵ Imaynatachus jallpʼata tʼaqakunanta, chantá pikunamanchus chay jallpʼata tʼaqakunanta Dios Ezequielman kamachisqanqa maytachá preso apasqa kajkunata kallpacharqa. Sutʼitachá repararqanku israelitaspis, Jehovata yupaychaj forasterospis herenciata uj rejta japʼinankuta (Esd. 8:20; Neh. 3:26; 7:6, 25; Isa. 56:3, 8). Chayta kamachisqanpi sutʼita yachakullantaj Jehovapajqa tukuynin kamachisnin may valorniyoj kasqankuta, chaytaj ni jaykʼaj cambiananta (Ageo 2:7 leey). Chayta yachaytaj mayta kusichiwanchej cieloman ripunankuta suyakojkunatapis, kay jallpʼapi kausakuyta suyakojkunatapis.

16, 17. 1) Pikunamanchus chanta imaynatachus jallpʼata tʼaqakusqanmanta, ¿imastá yachakunchej? 2) ¿Imatá qhepan capitulopi yachakusun?

¹⁶ Pikunamanchus, chantá imaynatachus jallpʼata tʼaqakusqanmanta, ¿imastá yachakunchej? Chayqa yuyarichiwanchej sutʼi reparay kanan kasqanta mundontinmanta hermanosninchejta uj rejllata qhawasqanchej, ujchasqastaj kasqanchej. Jehovaqa tukuyta uj rejllata qhawan. Chayrayku allin kanman kaykunata tapurikunanchej: “¿Tukuy atisqaytachu kallpachakuni Jehová jina tukuyta uj rejllata qhawanaypaj? ¿Tukuynin hermanosniytachu tukuy sonqo respetani maymanta kajtinkupis, qhapaj kajtinkupis, wajchas kajtinkupis?” (Rom. 12:10). Mayta kusikunchej Jehovaqa tukuyninchejta llajtanpa “jallpʼanman” yaykojta saqewasqanchejmanta, maypichus payllata yupaychanchej chayman. Chay “jallpʼapeqa” tatanchej Jehovata tukuy sonqo yupaychanchej, bendicionesnintapis japʼinchej (Gál. 3:26-29; Apo. 7:9).

¹⁷ Qhepan capitulopeqa Ezequiel mosqoypi jina qhepa kaj rikusqanmanta tawa kaj garantiata ukhuncharisunchej: Jehová presochasqa kajkunawan khuska tiyakusaj nisqanmanta. Qhawarillasuntaj imatachus noqanchejpis chaymanta yachakuyta atisqanchejta.

1, 2. 1) ¿Ima jallpʼatataj tʼaqananku karqa? (Kay libroj tapanmanta dibujota qhawariy). 2) ¿Ima garantiataj karqa presos apasqa kajkunapaj?

EZEQUIEL qhepa kajta rikusqanpeqa, uj chhoqo jallpʼata tʼaqananku karqa. Chay jallpʼataqa mana Israelmanta mayqen ayllumanpis herenciata jina qonankuchu karqa, manachayqa Jehová Diospaj tʼaqapunanku karqa. Chantapis uj sumaj llajtata rikullarqataj, sutintaj mana mayqen suti jinallachu karqa. Chaytaj preso apasqa kajkunapaj uj sumaj garantía karqa: Munasqa jallpʼankuman kutipojtinku, Jehová paykunawan kanan karqa.

² Ezequielqa chay tʼaqasqa jallpʼaspi imaschus kananta sumajta sutʼinchan. Jehovaj kamachisninpaj imachus chay niyta munasqanta qhawarina.

Santo jallpʼawan llajtawan

3. Nacionmanta Jehová tʼaqasqan jallpʼa, ¿ima phishqa partespitaj tʼaqakorqa, imapajtaj chaykuna karqa? (“Jallpʼata tʼaqankichej” nisqa recuadrota leeriy).

³ Chay chhoqo jallpʼa ukhupeqa uj cuadrado jallpʼa kallarqataj, norte ladomanta sur ladoman 25.000 codosniyoj (13 kilometrosniyoj) inti llojsimuy ladomanta, inti yaykuy ladomanpis 25.000 codosniyojllataj. Chay cuadrado jallpʼaqa sutikun ‘tukuynin tʼaqasqa jallpʼa’. Kinsa chhoqospitaj tʼaqasqa kashan. Pata kajqa levitaspaj tʼaqasqa kashan. Chaupi kajtaj templopaj, sacerdotespajwan. Chay iskaynin ‘santo jallpʼa’ kanku. Uran kajtaj, nisunman “puchoj jallpʼataj” aswan juchʼuylla, ‘llajtamanta runaspajtaj’ (Eze. 48:15, 20).

4. ¿Imatá yachakusunman Jehovapaj tʼaqasqa llajtamanta?

⁴ ¿Imatá yachakusunman Jehovapaj tʼaqasqa jallpʼamanta? Ñaupajtaqa chay jallpʼataraj tʼaqakorqa. Chaymantaraj nacionmanta waj jallpʼasta ayllusman tʼaqakorqa. Ajinamanta Jehovaqa chay jallpʼa importante kasqanta rikucherqa Diosta yupaychanapaj kasqanrayku (Eze. 45:1). Chaytaj preso apasqa kajkunaman kayta yachacherqa: Jehovata yupaychayta kausayninkupi ñaupajman churananku kasqanta. Noqanchejpis ñaupajman churanchej Diospa Palabranta estudiayta, tantakuykunaman riyta, runasman willaytapis. Jehovaqa yachachiwanchej payta yupaychayta kausayninchejpi ñaupajman churana kasqanta.

“Llajtaqa chay jallpʼaj chaupinpi kanqa”

5, 6. 1) ¿Pikunapajtaj chay llajta karqa? 2) ¿Imawantaj chay llajta mana ninakunchu, imajtin?

⁵ (Ezequiel 48:15 leey). ¿Imawantaj ninakun ‘llajta’, muyuyninpis? (Eze. 48:16-18). ‘Llajtapaj tʼaqasqa jallpʼamanta’ Jehovaqa Ezequielta nerqa: “Chay jallpʼaqa tukuynin Israel nacionpaj kanqa”, nispa (Eze. 45:6, 7). Chayrayku llajtawan muyuyninwanqa, mana “santo jallpʼa” ukhupichu karqa, nisunman ‘Jehová Diospaj tʼaqaporqanku’ chay jallpʼa ukhupichu (Eze. 48:9). Imatachus kay tiempopi chay llajtamanta yachakusqanchejta qhawarina.

⁶ Chaypajqa yachananchej tiyan imawanchus chay llajta mana ninakusqanta. Chay llajtaqa mana Jerusalenta, templontawan watejmanta ruwarqanku chaychu kanman. ¿Imajtín? Ezequiel mosqoypi jina rikusqan llajtapeqa mana uj templo kanchu. Nillataj Israelpa watejmanta sayarichisqa jallpʼanpi llajtachu kanman. ¿Imajtín? Ni preso apasqa kasqankumanta kutinpojkunapis ni mirayninkupis Ezequielpa rikusqan llajtata jina ruwarqankuchu. Nillataj cielopi uj llajtachu kanman. ¿Imajtín? Chay llajtataqa ‘mana santo cheqapichu’, nisunman mana Diosta yupaychanapaj lugarpichu ruwakorqa (Eze. 42:20).

7. ¿Imawantaj ninakunman Ezequielpa rikusqan llajta? (Qallariypi kaj dibujota qhawariy).

⁷ ¿Imawantaj ninakun Ezequielpa rikusqan llajta? Yuyarikuna, chay llajtatawan chay jallpʼatawanqa ujllapi rikorqa (Eze. 40:2; 45:1, 6). Bibliaqa nin chay jallpʼaqa mana uj jallpʼapunichu kasqanta. Chayrayku nisunman chay llajtapis manallataj uj llajtapunichu kasqanta. ¿Imatá yuyachiwanchej llajta palabra? Yuyachiwanchej organizasqa uj qotu runasta. Chayrayku Ezequielpa rikusqan cuadrado llajtaqa ninakunman sumaj organizasqa kamachejkunawan.

8. ¿Maymantapachataj chay kamachejkuna kamachinku, imaynatá chayta yachanchej?

⁸ ¿Maymantapachataj chay kamachejkuna kamachinku? Ezequiel rikusqanman jina chay llajtaqa, Diosllata yupaychajkunaj “jallpʼanku” ukhupi kashan. Chayrayku chay kamachejkunaqa, maypichus Diospa llajtan Diosta yupaychanankupaj ruwanasninkuta ruwanku chay ukhupi kamachishanku. Chanta, ¿ima niytá munan chay llajta mana santo cheqapi kasqan? Chayqa reparachiwanchej chay kamachejkunaqa mana cielopichu kamachishasqankuta, manachayqa kay jallpʼapi. Imatachus chay kamachejkuna ruwashasqankoqa, tukuynin Diospa llajtanta yanapan, pikunachus payllata yupaychanku chaykunata.

9. 1) ¿Pikunataj kay jallpʼapi kamachejkuna kanku? 2) ¿Imatataj Jesús waranqa watasta kamachishaspa ruwanqa?

⁹ ¿Pikunataj kay jallpʼapi chay kamachejkuna kanku? Ezequielpa rikusqan llajtaj gobiernonpeqa uj ‘kamachej’ kamachisharqa (Eze. 45:7). Chay kamachejqa mana uj sacerdotechu, nitaj uj levitachu. Chay kamachejqa yuyarichiwanchej congregacionesta ñaupajman apajkunata, astawanqa mana ajllasqa cristianoschu kanku chaykunata. Chay kʼacha michejkunaqa ‘waj ovejasmanta’ kanku, Cristoj Gobiernonpa kʼumuykukoj sonqoyoj kamachisnintaj (Juan 10:16). Waranqa watasta kamachishajtin, Jesusqa kamachejkunata churanqa, nisunman sumaj wakichisqa ancianosta “tukuy jallpʼantinta kamachinankupaj” (Sal. 45:16). Paykunaqa Diospa Gobiernonpa kamachiyninpi kaspa chay waranqa watasta Diospa llajtanta cuidanqanku.

“Jehová Chaypi Kashan”

10. ¿Imataj chay llajtaj sutin? ¿Ima garantiatataj chay suti qon?

¹⁰ (Ezequiel 48:35 leey). Chay llajtaqa sutikun “Jehová Chaypi Kashan”. Chay llajtaj sutenqa uj garantía Jehová chay llajtapi kasqan sutʼi reparay kasqanmanta. Jehová Ezequielman chay llajtata chaupinejpi rikuchispaqa preso apasqa kajkunaman kaytapis nishanman jina karqa: “Watejmanta qankunawan kasaj”, nispa. Chayqa maytachá paykunata kallpacharqa.

11. ¿Imastawantaj yachakunchej Ezequielpa rikusqan llajtamanta, sutinmantapis?

¹¹ ¿Imastá yachakunchej Ezequielpa rikusqan llajtamanta? Chay llajtaj sutenqa chayri chay kamachejkunaj sutenqa kay garantiata qowanchej: Jehovaqa kay jallpʼapi llajtanwan kashan, wiñaypajtaj paykunawan kallanqapuni. Chay llajtaj sutenqa kayta yuyarichillawanchejtaj: Chay llajtaqa mana runasman atiyta qonanpajchu kashan, manachayqa Jehovaj sumaj kamachiykunasninta juntʼachinanpaj. Jehovaqa mana chay kamachejkunaman atiyta qorqachu nacionpa jallpʼasninta nisqankuman jinalla partinankupaj. Astawanpis Jehovaqa munan chay kamachejkuna jatunpaj qhawanankuta imaynatachus chay jallpʼata tʼaqasqanta, nisunman ima ruwaytachus kamachisninman qosqanta, pisipaj qhawasqa jinalla kajtinkupis (Eze. 46:18; 48:29).

12. 1) ¿Imatá yachakusunman chay llajta ashkha punkusniyoj kasqanmanta? 2) ¿Imatataj chay llajta ancianosta yuyarichin?

¹² ¿Imatá yachakullasunmantaj “Jehová Chaypi Kashan” sutiyoj llajtamanta? Ñaupa tiempomanta llajtasqa perqawan muyurisqas kaj kanku, pisi punkusniyojllataj. Kay llajtatajrí 12 punkusniyojpuni karqa (Eze. 48:30-34). Chay cuadrado llajta chay chhika punkusniyoj kasqanqa, sapa ladopi kinsapuni, reparachiwanchej chay kamachejkunaqa chimpaykunapaj jinalla kasqankuta Diospa tukuynin kamachisninta yanapanankupaj. Chantapis 12 punkusniyoj kasqanqa reparachiwanchej tukuypaj kicharisqa kasqanta, “tukuynin Israel nacionpaj” (Eze. 45:6). Chaytaj ancianosta kayta yuyarichin: Jehovaqa munan chimpaykunapaj jinalla kanankuta, Diosllata yupaychajkunatataj tukuyninkuta yanapanankuta.

Runas Diosta yupaychanankupaj yaykunku, llajtapi llankʼanankupajpis

13. Jehová nisqanman jina, ¿ima ruwanastataj runas ruwasharqanku payta sirvinankupaj?

¹³ Ezequielpa rikusqan llajtamanta parlarinallapuni. Jehovaqa Ezequielman mosqoypi jina rikuchisqanpi payta sirvinankupaj runas imaymana ruwanasta ruwasqankuta nerqa. Sacerdotesqa nisunman “templopi sirvejkunaqa” ofrendasta jaywaj kanku, Jehovamantaj qayllaykoj kanku payta sirvinankupaj. Levitaspis ‘templopi sirvejkunallataj’ karqanku. Paykunaqa templopi ruwanasta ruwaj kanku “chaypi imaschus ruwakunan karqa chay tukuyninta” (Eze. 44:14-16; 45:4, 5). Ezequielqa rikullarqataj chay llajta qayllapi runas trabajashasqankuta. ¿Pikunataj chay trabajajkuna kanku?

14. ¿Imapitaj yuyachiwanchej llajta qayllapi trabajajkuna?

¹⁴ Llajtaj qayllanpi trabajajkunaqa “Israelpa tukuynin ayllusninmanta jamunku”, yanapakoj jamunku. Paykunaqa poqochinku “llajtapi trabajajkuna mikhunankupaj” (Eze. 48:18, 19). Chayqa imastachus kay tiempopi ruwayta atisqanchejpi yuyachiwanchej. Kay tiempopi Jehovallata yupaychajkunaj “jallpʼankupi” tukuy tiyakojkunaqa yanapakuyta atinku imastachus Cristoj ajllasqa hermanosnin ruwasqankupi, jinallataj Jehovaj churasqan hermanospa ruwasqankupipis, pikunachus ‘may chhika runasmanta’ kanku chaykunaj ruwasqankupi (Apo. 7:9, 10). Paykunataqa yanapakusunman allin kamachi yuyayniyoj qowasqanchej kamachiykunata tukuy sonqo kasukuspa.

15, 16. 1) ¿Imastawantaj yachakusunman Ezequielpa rikusqanmanta? 2) ¿Ima ruwaypitaj yanapakusunman?

¹⁵ Ezequielpa rikusqanmantaqa waj imatawan yachakullasunmantaj Jehovata sirvisqanchejpi. Jehovaqa nin 12 ayllusmanta mana levitas kajkunaqa iskay lugarespi trabajasqankuta: temploj pationpi, llajtaj pasto jallpʼasninpiwan. ¿Imatá chay lugarespi ruwanku? Jehovaj templonpa pationmanqa tukuynin ayllus yaykumunku ofrendasta jaywaspa payta “yupaychanankupaj” (Eze. 46:9, 24). Llajtaj muyuyninpi jallpʼasmantaj tukuy ayllusmanta runas jamunku llankʼaspa yanapakunankupaj. ¿Imatá chay llankʼajkunamanta yachakusunman?

¹⁶ Kay tiempopipis may chhika runasmanta kajkunaqa Ezequielpa rikusqan ruwaykunata jinallataj ruwayta atinku. Paykunaqa Jehovata “templonpi” yupaychanku siminkuwan ofrendasta jina jaywaspa (Apo. 7:9-15). Chaytaqa ruwanku runasman willarispa, tantakuykunapi parlarispa, takispa ima. Paykunapajqa Jehovata yupaychay aswan importante (1 Cró. 16:29). Chantapis ashkhasqa Jehovaj llajtanta waj jinasmanta yanapakunku. Wakenqa Tantakuna Wasista, sucursalestapis ruwaypi, allinchaypi yanapakunku, Jehovaj llajtan waj imasta ruwasqanpipis. Wakintaj kapuyninkuwan yanapakunku. Ajinasmanta Diospa llajtanta yanapakusqankoqa jallpʼatapis llankʼashankuman jina, “Dios jatunchasqa kananpaj” (1 Cor. 10:31). Chay imastaqa tukuy sonqo, may kusiywan ruwanku, yachaspa ‘chay ruwaykunaqa uj jaywana jina kasqanta, Diostataj mayta kusichisqanta’ (Heb. 13:16). Noqanchejrí, ¿tukuy atisqanchejtachu yanapakushanchej chay imasta ruwaysikuspa?

“Mosoj cielota, mosoj jallpʼatawan suyakushanchej”

17. 1) ¿Imaynamantataj Ezequielpa rikusqan aswan allinninmanta qhepaman juntʼakullanqataj? 2) ¿Pikunatataj kay jallpʼapi kamachejkuna yanapanqanku?

¹⁷ ¿Ezequiel santo jallpʼata rikusqan aswan allinninmanta qhepaman juntʼakullanqatajchu? Arí. Kaypi tʼukuriy: Ezequiel rikorqa chay “santo jallpʼaqa”, maypichus ‘Jehová Diospa templon’ kasharqa chayqa, nacionpa chaupinpi kasharqa (Eze. 48:10). Chaytaj uj garantía jina noqanchejpaj: Armagedón pasayta kay jallpʼapi maypi tiyakojtinchejpis Jehovaqa noqanchejwanpuni kanqa (Apo. 21:3). Cristo waranqa watasta kamachishajtin kamachejkunaqa, nisunman pikunachus kay jallpʼapi Diospa llajtanta cuidanankupaj ajllasqa kajkunaqa ‘mosoj jallpʼamanta’ kajkunata tukuyninkuta yanapanqanku, pusanqankutaj (2 Ped. 3:13).

18. 1) ¿Imajtín nisunman kay jallpʼapi kamachejkunawan Diospa Gobiernonwan uj yuyayllapuni kanankuta? 2) ¿Ima garantiatataj qowanchej chay llajtaj sutin?

¹⁸ Ezequielpa rikusqan llajtawan ninakoj kay jallpʼapi kamachejkunaqa Diospa Gobiernonwan uj yuyayllapuni kanqanku. ¿Imaraykú chayta ninchej? Bibliaqa sutʼita rikuchiwanchej kaj jallpʼapi 12 punkusniyoj llajtaqa Mosoj Jerusalén llajtaman rijchʼakusqanta. Chay llajtaqa cielopi kashan, chantapis 12 punkusniyojllataj, Cristowan khuska kamachenqanku chay 144.000 kamachejkunawantaj ninakun (Apo. 21:2, 12, 21-27). Chaytaj yachachiwanchej kay jallpʼapi kamachejkunaqa imatachus Diospa Gobiernon cielomantapacha nimusqanta ruwanankuta. Chay llajta “Jehová Chaypi Kashan” sutikusqanqa tukuyninchejman kay garantiata qowanchej: Paraisopeqa Jehovallata yupaychay wiñaypaj kanqa, sumajyanqataj. Chay kausayqa may sumajpuni kanqa.