¿Ima niytá munan yupaychay?

Diosta yupaychayqa niyta munan “payta munakuy, manchachikuy ima”. Biblia ima parlaykunapichus qhelqakorqa chaykunapi, “yupaychay” palabraqa niyta munan tukuy sonqo respetay chayri pitapis kasukuy (Mat. 28:9). Chay kikin palabrasllatataj oqharikun Diosta yupaychaymanta chayri waj dioskunata yupaychaymanta parlanapaj (Juan 4:23, 24). Chay palabras imachus niyta munasqanta yachanapajqa ladonpi kaj palabras yanapawanchej.

Jehová Diosllata yupaychana tiyan, paylla tukuy imata ruwasqanrayku, paylla kamachinanpaj derechoyoj kasqanrayku ima (Apo. 4:10, 11). Jehovata yupaychanchej kamachejninchejta jina kasukuspa, sutintataj jatunpaj qhawaspa (Sal. 86:9; Mat. 6:9, 10). Ezequiel libropitaj Jehovalla kamachej kasqanmanta, sutinmantapis ashkhata parlan. Chantapis chay libropi 217 kutista rikhurin ‘Tukuyta Kamachej Señor Jehová Dios’ nisqa palabras. Chantá 55 kutista rikhurin “yachankichej noqa Jehová Dios kasqayta” nisqa palabras chayri chayman rijchʼakoj palabras (Eze. 2:4; 6:7).

Diosta yupaychasqanchejqa mana sonqollanchejpichu kashan, chaytaqa ruwasqanchejwan rikuchinchej (Sant. 2:26). Kausayninchejta Jehovaman qopushaspaqa payllata kamachejninchejta jina kasukunanchejta nerqanchej, sutintataj jatunpaj qhawananchejta nerqanchej. Jesusqa kinsa kaj kutipi Satanás juchaman urmachiyta munashajtin, Diosllata sirvina kasqanta nerqa (Mat. 4:10). Jehovata yupaychajkunaqa payllata sirviyta munanchej (Deu. 10:12).a Diostaqa sirvinchej payta yupaychanapaj ashkha imasta ruwaspa, wakin kuti mana atikullajtinpis. ¿Imastataj ruwanchej?

Jehová Diostaqa tukuy imaymanasmanta sirviyta atisunman, chaytataj payqa jatunpaj qhawan. Payta sirvinchej runasman willaspa, tantakuykunaman rispa, chaypi parlarispa, tantakuna wasista cuidaspa, ruwaspa, familiapi Diosta yupaychaspa, llakiypi kaj hermanosta yanapakuspa, jatun tantakuykunapi llankʼaspa chayri Betelpi sirvispa (Heb. 13:16; Sant. 1:27). Jehovallata yupaychayta sonqonchejpi, yuyayninchejpi ñaupajman churajtinchejqa, payllata ‘tuta pʼunchay’ sirvishanchej. ¡Jehová Diosninchejta yupaychayqa mayta gustawanchej! (Apo. 7:15).