¿Imaraykú israelitasman waj llajtayojkunawan mana casarakunankuta Dios nerqa?

▪ Jehová Dios, israelitasman kay leyta qollarqataj: “Ama paykunawan aylluchanakunkichejchu. Ama casarachinkichejchu churisniykichejta ususisninkuwan, nitaj ususisniykichejta churisninkuwan”, nispa (Deuteronomio 7:3, 4). ¿Imaraykutaj chayta kamacherqa?

Jehovaqa, israelitasta waj diosesta yupaychayman, Satanás tanqayta munasqanta yacharqa. Chayraykutaj waj llajtayojkunawan mana casarakunankuta nerqa, Paymanta mana karunchakunankupaj, waj diosesta mana sirvinankupaj. Jehovaj jarkʼayninta, khuyakuyninta chinkachispa, enemigosninkoj makinman urmallankuman karqa. Jina kajtin, israelnejta suyasqa Mesías mana jamunmanchu karqa. Chayraykuchá Satanás tanqayta munarqa, israelitasta waj llajtayojkunawan casarakunankupaj.

Diosqa, sapa uj israelitamanta interesakoj, yacharqataj Paywan allinpi kaspalla kusisqa kanankuta. Waj llajtayoj runaswan casarakunankumanta llakikusqanqa, ¿allinchu karqa? Rey Salomonpi tʼukuriy. Payqa, mana israelita warmiwan casarakuy mana allinpi tukunanta yacharqa. Imaraykuchus Jehová nerqa: “Paykunaqa dioskunankuman sonqosniykichejta aysasonqachej”, nispa. Chaywanpis Salomonqa, mana kasukorqachu, yachayninpi atienekuspataj waj llajtayoj warmiswan casarakorqa. Pisimanta pisitaj “warmisnenqa paypa sonqonta pantacherqanku [...] waj dioskunaman[taj] sonqonta kutiricherqanku”. ¡Chaymá llakiyqa! Imaraykuchus Jehová manaña allinpajchu qhawarqa, mana kasukusqanraykutaj Israel llajta iskayman tʼaqakorqa (1 Reyes 11:2-4, 9-13).

Ichá pillapis ninman mana tukuychu Salomón jina tukunankuta. Sutʼinchanapaj, Mahlón Moabmanta Rutwan casarakorqa, chay warmeqa, tiemponman Jehovata yupaychayta qallarerqa. Chaywanpis moabitawan casarakoyqa mana allinchu kaj. Bibliataj mana ninchu Mahlón uj moabitawan casarakusqan allinta kasqanta. Mahlonqa, wayna kashaspa wañuporqa, ichá Jehová Diosta, Rut, Diosninta jina niraj rejsikapushajtin. Wauqen Quelionpis, Moabmanta Orfawan casarakorqa, Orfataj diosesninta mana saqerqachu. Boozqa, Rut, Jehovata yupaychasqanmantaña paywan casarakorqa. Judiosqa, Rutta allinpaj qhawarqanku cheqa Diosta tukuy sonqo yupaychasqanrayku. Booz, Rutwan casarakusqanqa iskayninkupaj allin karqa (Rut 1:4, 5, 15-17; 4:13-17).

Mahlón Rutwan casarakusqanqa, ¿Dios, payta yupaychajkunallanwan casarakunankuta nisqanwan churanakunchu? Churanakusqanta yuyayqa, ni allinchu kanman. Sutʼincharinapaj, pillatapis qolqerayku phujllaypi allin rejtenqa, ¿tukuyta qolqerayku phujllaypi allin rinawanchejta nisunmanchu? Ni, ¿icharí?

Bibliaqa, kunan cristianosta “creejkuna[lla]wan” casarakunankuta nin. “Uj yugollapi Diospi mana creejkunawan” kanankoqa mana allinchu kasqanta nillantaj. Kaytaj cheqa cristianos casarakuyta munajkunata yanapan. Chaywanpis mana creejkunawan casarasqasmanqa, allinta kausakunankupaj yuyaychan (1 Corintios 7:12-16, 39; 2 Corintios 6:14). Kaykunaqa, casarakuyta Qallarichej Dios, casarasqas, solteros kusisqas kausakunankuta munasqanta rikuchin.