Lloqallitullaraj kashaspa sumajta ajllarqani

Kay 1985 watapi chunkayoj kashajtiy, escuelayman Camboya suyumanta wakin wawas jamporqanku. Chay karqa Estados Unidospi Columbus (Ohio) llajtapi. Paykunamanta ujnenqa wakin rimaykunallata inglespi yacharqa. Paytaj dibujapuwaspa cuentariwaj ñakʼariykunamanta, wañuchinakusmanta, runas ayqekusqankumanta ima. Chʼisisninpitaj, chay wawaspi yuyaspa waqaj kani. Paykunamanqa Paraisomanta, wañusqas kausarinankumanta ima willayta munaj kani, inglesta parlasqayraykutaj ni entiendewajchu kanku. Lloqallitullaraj kajtiypis, paykunaman Jehovamanta yachachinaypaj camboyano qalluta yachakunayta nikorqani, nitaj yacharqanichu qhepamanpis mayta yanapanawantaqa.

Camboyanota yachakuytaqa ni atillarqanichu. Iskay kutipi saqepunaypajña kasharqani. Jehovataj tatasniynejta yanapawarqa. Qhepamantaj, profesoresniy, compañerosniy ima ashkhata gananaypaj jina profesionta ajllanayta niwarqanku. Noqatajrí, precursor kayta munaspa colegiopiña llankʼanaypaj wakin imasta yachakorqani. Clasesmanta llojsispaqa precursoreswan willayman rej kani. Chantapis, wakin compañerosniyman inglesta yachachej kani, chaytaj qhepaman mayta yanapawarqa.

Chantá 16 watayoj kashajtiy, Estados Unidospi Long Beach llajtapi, camboyanopi uj qotu jatarisqanta yacharqani. Chay qotuman rispaqa, camboyano qallupi leeyta yachakorqani. Colegiota tukuytawantaj, precursor kayta qallarerqani, wasiy qayllapitaj camboyanota parlajkunaman willaj kani. Camboya suyu mana tiyakunapaj jina kajtinpis, 18 watayoj kashajtiy, chayman ripuyta yuyarqani. Imajtinchus chunka millones jina tiyakojkunaman pisillata Reinomanta willakusharqa. Chantapis uj qotuchakuylla karqa, 13 willajkunayoj. Ñaupaj kutirayku rishajteyqa 19 watayoj karqani, iskay watanmantaj Camboyaman riporqani. Chaypitaj, inglesmanta tijrachispa, yachachispa ima wakin horasllata llankʼayta qallarerqani. Tiempowanqa Diospaj astawan llankʼayta munaj hermanawan casarakorqani. Iskayniykutaj, camboyanota parlaj ashkha runasta bautizakunankupaj yanapayku.

Jehovaqa sonqoypa “munasqanta” qowan (Sal. 37:​4). Runasman willayqa ima profesionmantapis aswan kusiyta apamun. Camboyapi 16 watastaña kasqaypi, uj juchʼuy qotuchakuymanta 12 qotuchakuykunamanña wiñasqanta rikuni, jinallataj tawa juchʼuy qotuspis rikhurisqanta. ( Jason Blackwell kausayninmanta willariwanchej.)