Nisqasninkumanta wakillan juntʼakun

Tukuypis, “¿imataj qhepaman kanqarí?”, nispa tapurikunchej. Ashkhastaj chayta yachasqankuta ninku. Chay nisqankumantataj wakillan juntʼakun. Kunantaj paykunamanta astawan parlarina:

• CIENTIFICOSQA paramunantachus manachus, Jallpʼata runas chʼichichasqankurayku imapichus tukunanta, waj imastawan niyta atinku. Chaypajtaj sumaj maquinasta rantinku, ashkha qolqetataj gastanku.

• QOLQEMANTA, POLITICAMANTAWAN YACHAJKUNAQA pichus gobiernoman yaykunanta, imaschus qolqeta mirachinanta ima ninku. Uj qhapaj runata Warren Buffett sutiyojta, profeta ninku, ima negociospichus sumaj ganakunanta yachasqanrayku. Chantá Nate Silverqa runaj gustosninta qhawarispa, sutʼinchayta atin politicamanta, pichus peliculasta ruwaspa premiosta japʼinanta, waj imastawan.

• ÑAUPA TIEMPOMANTA QHELQASQASTA profeciapaj qhawarqanku. Sutʼincharina, ashkha runas creenku Michel de Notredame (Nostradamus) 1501-1600 watasnejpi qhelqasqasnin kunan juntʼakushasqanta. Mayaspaj calendarionqa, 2012 diciembre killapi 21 pʼunchaypi tukukorqa. Chayraykutaj ashkha runas yuyarqanku Jallpʼanchej chinkapunanta.

• RELIGIONTA KAMACHEJKUNAQA runas paykunata qhatinankupaj, Jallpʼantinpi sinchʼi ñakʼariykuna kananta ninku. Harold Camping sutiyoj, ñakʼariykuna kananta parlarqa, yachachisqasninwan khuska, Jallpʼanchej 2011 watapi thuñisqa kananta nerqanku. Chay nisqankutaj pantasqapuni karqa.

• ADIVINOSQA jamoj imasmanta yachanankupaj atiyniyoj kasqankuta ninku. Edgar Cayce chantá Jeane Dixonwan, 1901-2000 watas chaynejpi imaschus kananta nisqankoqa wakillan juntʼakorqa. Sutʼincharina, Jeane Dixonqa 1958 watapi Kinsa Kaj Guerra Mundial qallarinanta nerqa. Edgar Caycetajrí, 1970 wata chaynejpi Nueva York llajta mama qochaman chinkaykapunanta nerqa.

Qhepaman imachus kananta yachasunman chayqa, kausayninchej waj jinataj kanman.