Jehovaj testigosnin, ¿Jesuspi creenkuchu?

JESUSPI CREENAPUNI TIYAN

Antonio: Imaynalla don Luis. Kusikuni ujtawan rikususpa.

Luis: Noqapis.

Antonio: Kay killamanta Torremanta Qhawaj revistata, ¡Despertad! revistatawan aparinporqayki. Kay revistaspi yuyaychakusqanqa sumajpuni kashan.

Luis: Gracias, walejtapuni jamurinki. Tapuriyta munasharqayki.

Antonio: Imatachus, ¿i?

Luis: Qaninpalla llankʼaj masiyman, revistasniykichej sumaj kasqanta nerqani. Paytaj mana leenayta munarqachu, imaraykuchus Jehovaj testigosnenqa Jesuspi mana creenkuchu niwarqa. Noqatajrí, kutimojtinku paykunata tapurisaj nispa kuticherqani. Qankuna, ¿Jesuspi creenkichejchu?

Antonio: Walejtapuni tapuriwanki. Imaraykuchus pillapis imatachus creesqanta yachanapajqa, paytaraj tapurina tiyan, ¿icharí?

Luis: Arí, ajinapuni kanpis.

Antonio: Jehovaj testigosnenqa, Jesuspi creeykupuni. Paypi mana creespaqa ni pi salvakusunmanchu.

Luis: Creesqaykichejtapuni nisharqani. Chayrayku llankʼaj masiy qankunamanta niwasqanqa tʼukurichiwarqa, chayrayku tapurishayki.

Antonio: Bibliaj wakin versiculosninta qhawarisunman, chaypitaj sutʼinchawasunchej imaraykuchus Jesuspi creenapuni kasqanta. Runasmanqa kay versiculosta rikurichiykupuni.

Luis: Ya, rikurichiway.

Antonio: Ñaupajtaqa Jesús, ujnin apostolninman imatachus nisqanta qhawarina. Chaytaj kashan Juan 14:6, nintaj: “Noqa ñan kani, cheqa kajtaj, kawsaytaj; mana pipis Dios Tataman chayayta atinchu, mana noqanejta rispaqa”. Leesqanchejman jina, ¿pinejtataj Diosman qayllaykuyta atisunman?

Luis: Jesusnejta nishan, ¿i?

Antonio: Arí. Jehovaj testigosnintaj chayta creeyku. Diosmanta mañakuspaqa, Jesuspa sutinpipuni mañakuyku.

Luis: Hmmm.

Antonio: Noqapis Jesuspa sutinpipuni mañakuni. Tukuy Jehovaj testigosninpis kikillantataj ruwanku.

Luis: Walejtapuni sutʼinchariwanki.

Antonio: Kunanqa Juan 3:16 nisqantañataj qhawarina. Kay versiculoqa, Jesús kay Jallpʼapi kausayninmanta, Diospa Reinonmanta willarasqantapis sutʼinchashan. Tukuy Evangeliospa nisqankoqa, kay versiculollapi sutʼinchakushan. ¿Leeriwajchu?

Luis: Arí. “Diosqa chay jinatapuni kay pachapi kaj chhikata munakusqanrayku, uj kʼata Churinta qorqa. Ajinamanta pillapis paypi creejqa mana chinkayman renqachu, astawanqa wiñay kawsayniyoj kanqa.”

Antonio: Gracias Luis. ¿Maykʼajllapis kay versiculota leerqankichu?

Luis: Arí, iglesiaypi uyarerqani.

Antonio: May rejsisqa, ¿i? Astawan sutʼincharina. Jesús nerqa Diospa munakuyninrayku wiñay kausayta japʼiyta atisqanchejta. Chaypajtaj, ¿imatamin ruwananchejta nishan?

Luis: Creenanchejta nishan.

Antonio: Arí. Diospa kʼata churin Jesucristopi creenanchejta nishan. Chaytapunitaj sutʼincharishan kay Torremanta Qhawaj revistapi. Iskay kaj paginanpi nin, kay revistaqa orqhokun Rey Jesucristopi creeyninchejta wiñachinanpaj, “payqa noqanchej wiñay kausayta taripananchejpaj wañorqa”.

Luis: Chayqa, revistallaykichejtaj nishasqa Jesuspi creesqaykichejta.

Antonio: Arí.

Luis: Chantá, ¿imaraykutaj runas uj jinatataj parlankuri?

Antonio: Wakenqa runaj nisqallanta chayri religionninkuta kamachejninku yachachisqallanta japʼikunku.

Luis: Ichá kallanmantaj mana Jesuspa testigosninchu kasqaykichejrayku.

Antonio: Arí, kallanmantaj.

Luis: Chantá, ¿imaraykutaj chay jinatapuni Jehovamanta parlankichejri?

“PAYKUNAMAN SUTIYKITA REJSICHERQANI”

Antonio: Imaraykuchus Diospa sutenqa Jehová, chay sutintataj oqharinapuni kasqanta creeyku. Jesuspis Tatanmanta mañakushaspa chayta ruwarqa. Qhawarina Juan 17:26. Leeripuway a.

Luis: Ya. “Paykunaman sutiykita rejsicherqani, astawanraj rejsichisajpis, ima munakuywanchus munakuwarqanki, chay munakuy sonqonkupi kanampaj, noqataj paykunapi.”

Antonio: Gracias. Leerinki jina, Jesusqa Diospa sutinta rejsicherqa. ¿Imaraykú chayta ruwanman karqa?

Luis: Má yachaymanchu.

Antonio: Tumpatawan entienderinapaj, Hechos 2:21 leerina. Nin: “Pillapis Señorpa [Jehovaj NM] sutinta oqharispa Diosnimpaj rejsikapojqa salvasqa kanqa”. Leerinchej jina, salvasqa kananchejpajqa Diospa sutinta oqharina tiyan. Chayraykuchá Jesuspis Tatanpa sutinta rejsicherqa.

Luis: Arí.

Antonio: Chayrayku Jesús munarqa discipulosnin, Tatanpa sutinta rejsinankuta, oqharinankutapis. Imajtinchus salvakunapajqa chaytapuni ruwananchej kashan. Chayraykutaj Jehovaj testigosninpis, Jehovamanta mayta parlayku. Munaykutaj tukuy runas Diospa sutinta rejsinankuta, oqharinankutapis.

Luis: Runasqa Diospa sutinta mana rejsispapis, yachanku pichus Pay kasqanta.

Antonio: Ichá ajina kanman, jinapis Diosqa sutinta rejsichiwanchej Payman qayllaykuyta atinanchejpaj.

Luis: Hmmm, má entiendeshaykichu.

Antonio: Sutʼincharina, casi tukuyninchej yachanchej pichus Puka Qochata iskayman khallasqanta, Diosmantataj Chunka Kamachiykunata japʼisqanta, ¿icharí? Yachallanchejtaj pichus arcata ruwaspa familiantawan, animalestawan salvasqanta. Chantapis pichus cielomanta kay Jallpʼaman jamuspa, juchasninchejrayku wañusqanta. Chay runaspa sutisninkuta mana yachaspa, pi runamantachus parlashasqanchejqa, ¿sutʼichu kanman?

Luis: Mana.

Antonio: Diostajrí, chay runaspa sutisninkuta yachananchejtapuni munarqa: Moisespata, Noejta, Jesuspatapis. Paykunawan mana jaykʼaj tinkuspapis, sutisninkuta yachaspaqa, rejsisqa runasta jina qhawananchejpaj.

Luis: Nipuni chayta repararqanichu. Sutʼipuni kashan.

Antonio: Chayrayku Jehovaj testigosnenqa Diospa sutinta oqhariykupuni. Munaykutaj tukuy runas Paypi atienekunankuta, uj amigota jinataj qhawanankuta. Creeykutaj Jesusnejllata salvasqa kayta. Chayta qhawarina kay versiculopi.

Luis: Ya.

Antonio: Kay Juan 14:6 leerqanchejña. Chaypitaj Jesús, “noqa ñan kani, cheqa kajtaj, kawsaytaj” nerqa. Kunantajrí Juan 14:1 qhawarina. Kay versiculoj tukukuyninta, ¿leeriwajchu?

Luis: Ya. “Qankunaqa Diospi creeychej, noqapipis creellaychejtaj.”

Antonio: Gracias. Kay versículo nisqanman jina, ¿Diosllapichu creenanchejta nishan?

Luis: Mana. Jesús nerqa, iskayninkupipuni creenanchejta.

Antonio: Ajinapuni. Chantapis, creeyninchejqa mana simillamantachu kanan tiyan, manaqa ruwasqasninchejpipis rikukunan tiyan. ¿Ajinallatatajchu yuyanki?

Luis: Arí.

Antonio: ¿Imaynatá chayta ruwasunman? Kaymanta parlarinapaj, ¿kutimuymanchu?a

Luis: Arí, kutimullanki a.