Ashkha runasta “Drama Eureka” cheqa kajta rejsinankupaj yanaparqa

“¡EUREKA!”, nisqaqa “¡Tarini!”, niyta munan. Kay 1801-1900 wataspi ashkha runas Californiaman (Estados Unidos) qorita maskʼaj rerqanku. Tariytawantaj qhaparej kanku: “¡Tarini!”, nispa. Charles Taze Russell, waj hermanoswan ima qorimanta aswan valorniyoj cheqa yachachiyta tarerqanku. Chaytataj runasman willayta munarqanku.

Kay 1914 watapajqa, jatuchaj llajtaspi ashkha runas 8 horaspi tukukoj “Foto-Drama de la Creación” nisqata qhawarqanku. Chaytataj Asociación Internacional de Estudiantes de la Biblia (inglespi IBSA) nisqamanta kajkuna rikucherqanku. Chay dramapi coloresniyoj dibujos karqa, parlasqanku, música ima uyarikoj, imatachus ruwashasqankupis rikukoj. Chaypitaj Dios kay Jallpʼapi kaj imasta ruwayta qallarisqanmantapacha, Cristo Waranqa Watasta kamachinankama rikukoj (Apo. 20:4).a

Bibliamanta Yachaqajkunaqa llajtitasmanta, ranchosmanta runas cheqa kajta yachakunankupaj, “Drama Eureka” nisqata agosto 1914 watapi rikuchiyta qallarerqanku. Chaytaj mana “Foto-Drama” jinachu karqa, apayta atinapaj jinallataj karqa. “Eureka” nisqaqa kinsa laya karqa, ashkha qalluspitaj. Ujnin “Drama Eureka X” karqa, chaytaj grabacionesniyoj, musicayoj ima karqa. Ujnintaj “Eureka Y” karqa, chaytaj grabacionesniyoj, coloresniyoj vidriopi dibujosta qhawanapaj ima karqa. “Eureka Familiar” nisqataj familiasta yanapananpaj grabacionesniyoj, takiykunasniyoj ima karqa. Chayta rikuchinapajtaj gramofonosta, waj aparatosta ima baratollawan rantikoj.

Bibliamanta Yachaqajkunaqa Reinomanta yachachinankupaj “Drama Eureka” nisqata llajtitaspi rikuchiyta, uyarichiyta ima atej kanku. Imaraykuchus chayta rikuchinankupaj, mana ashkha aparatostachu necesitarqanku. “Eureka X” grabacionesniyojlla kasqanrayku tutapis pʼunchaypis uyarichiyta atikullaj. “Eureka Y” nisqatataj, carburowan kʼanchaj lamparawan rikuchej kanku. Finlandés qallumanta Watch Tower revista nerqa: “Kaytaqa mayllapipis rikuchiyta atikullan”, nispa. Chaytaj ajinapuni karqa.

Bibliamanta Yachaqajkunaqa, yachaywasispi, juzgana wasispi, estacionespi, chayri mayllapipis chay dramata rikuchej kanku. Ashkha kutispitaj jawallapi uj perqaman jatun yuraj sabanata churaykuspa cinepi jina rikuchej kanku. Anthony Hambuch nerqa: “Chajra runasqa Dramata qhawanankupaj huertankupi kʼullusta churaraj kanku”, nispa. Chay hermano, paywan kajkuna ima, “Drama Eureka” nisqata rikuchinapaj aparatosta, waj imasta ima, carretaspi apaj kanku.

Chay Dramata qhawajkunaqa pisilla chayri ashkha kaj kanku. Estados Unidospa ujnin llajtanpi 150 runas tiyakoj kanku, chay llajtaj escuelanpi chay dramata qhawajtaj 400 runas rerqanku. Waj lugarespitaj chay dramata qhawaj 8 kilometrosta rerqanku, jinallataj kutipunankupajpis. Sueciapi Charlotte Ahlbergpa wasinpi vecinosnin dramata uyarinankupaj tantakorqanku. Uyariytawantaj, tʼukulla qhepakorqanku. Australiaj uj llajtanpitaj 1.500 runas tantakorqanku. Watch Tower revista nisqanman jina escuelasmanta, universidadesmanta kajkuna kusisqas kasharqanku “Drama Eureka” nisqawan. Chay Dramaqa may rejsisqa karqa cinesniyoj llajtaspipis.

YACHACHINAPAJ SUMAJ YANAPA KARQA

“Drama Eureka” nisqaqa, mosoj qotuchakuykuna kananpaj uj sumaj yanapa karqa. Imaraykuchus qotuchakuykuna umallirichejkunata waj lugaresman qotuchakuykunata sayarichinankupaj kachaj kanku. Mana yachakunchu “Drama Eureka” nisqata mashkhachus qhawasqankuta. Imaraykuchus wakin aparatoswan astawan rikuchikoj. Kay 1915 watapitaj 86 qotusmanta 14 qotuslla mashkhachus qhawasqankuta willallarqankupuni. Willakorqataj chay Dramata uj millón kuraj uyarisqankuta, 30.000 runas jinataj publicacionesta mañakusqankuta.

“Drama Eureka” mana rejsisqa kajtinpis, Australiamanta, Argentinakama; Sudafricamanta, Indiakama, may ashkha runas chay dramata qhawarqanku chayri uyarerqanku, jinallataj Gran Bretañaj churusninpipis. Chay runasmanta ashkhastaj qorimanta aswan valorniyoj cheqa yachachiykunata tarerqanku. Chayraykutaj “¡Eureka!” nispa nerqanku.