¿YACHARQANKICHU?

¿Imapajtaj Bibliapi eunuco palabrata oqharikun?

Wakin kutipeqa eunuco palabrata “kapasqa runamanta” parlanapaj oqharikun. Ñaupa tiempopeqa, wakin runasta kapakoj castigakunanpaj chayri carcelpi wisqʼaykuytawan chayri wata runas kasqankutawan. Chay runas atienekunapaj jina kajtinkoqa, reyespa warmisninkoj wasisninkuta qhawanankupaj churakoj. Sutʼincharinapaj, Hegai, Saasgaz ima, pikunachus eunuco runas karqanku, Persiamanta rey Asueroj warmisninta, tanta warmisninta ima qhawaj kanku. Chay reyqa wakin runas yuyasqankuman jina Jerjes I karqa (Ester 2:3, 14).

Bibliapi eunucosmanta parlasqanqa, mana tukuychu kapasqa karqanku. Wakin yachayniyoj runas nisqankuman jinaqa, reypa wasinpi llankʼajkunata eunucosllatataj sutichakoj. Chantapis Jeremiaspa amigon Ebed-melecta, chantá Etiopiamanta eunuco runata, chayrayku eunucos kasqankuta sutichakoj. Chay eunucomanqa Felipe Diosmanta willarqa. Ebed-melecqa may atiyniyojchá karqa, imajtinchus rey Sedequiaswan parlayta atillaj (Jeremías 38:7, 8). Etíope runataj reinaj qhapaj kapuyninta waqaychaj karqa, payqa Jerusalenman Diosta yupaychaj risqa (Hechos 8:27).

¿Imaraykutaj ñaupa tiempopi michejkuna ovejasta cabrasmanta tʼaqaj kanku?

Jesusqa juzgana tiempomanta parlashaspa, jinata nerqa: “Maypachachus Runaj Churenqa Rey jina jatun kaynimpa kʼanchaynimpi [jamonqa] ujkunata ujkunamanta tʼaqanqa, imaynatachus michejpis ovejasta cabrasmanta wajman tʼaqan, ajinata” (Mateo 25:31, 32). Jesusqa imatachus chay tiempopi michejkuna ruwasqankuman jina parlasharqa, paykunaqa ovejasta, cabrasmanta tʼaqaj kanku. ¿Imaraykú?

Pʼunchaypeqa ovejasta cabrastawan khuskata michej kanku. Tutanpirí, sajra animalesmanta, suwasmanta, chirimantataj jarkʼakunanpaj corralpi wisqʼaj kanku (Génesis 30:32, 33; 31:38-40). Michejkunaqa, china ovejasta uñasnintawan waj corralman tʼaqaj kanku, chaytataj ruwaj kanku cabrasmanta jarkʼanankupaj. Imaraykuchus cabrasqa phiñas kanku. Chantapis Todas las cosas de la Biblia (All Things in the Bible) nisqa libro nisqanman jina ovejastaqa “uñasniyoj kanankupaj, chʼawanankupaj, millmanta ruthunankupaj ima” tʼaqallajtaj kanku. Jesusqa imachus judiospaj rejsisqa karqa chaymanta parlarqa, paykunamanta ashkhasqa campo runas karqanku.