Tukuy sonqo ruwarqanku Nueva Yorkpi

KAY pasaj watasllapi Cesar, warmin Rociowan, may allinta Californiapi tiyakusharqanku. Cesarqa diantinta llankʼaj sistemas de calefacción, ventilación, aire acondicionado nisqata ima allinchaspa. Warmintaj khuskan pʼunchayllata uj consultorio médico nisqapi llankʼaj. Paykunaqa uj jatun wasiyoj karqanku, nitaj wawasninkupis karqachu. Chaywanpis kausayninkoqa mana jinallapunichu karqa.

Octubre de 2009 watapi Estados Unidosmanta sucursal, chay suyumanta qotuchakuykunaman uj cartata apacherqa. Chay cartanejtataj wajyarisharqa, imallatapis ruwayta yachajkuna Wallkillpi (Nueva Yorkpi) Betelta jatunyachiypi llankʼaspa yanapakunankupaj. Chaypi llankʼanankupajqa 35 watasniyojmanta astawan kajkunatapis wajyarisqas karqanku. Cesarwan Rociowan ninku: “Noqaykupajqa riyta atisqayku may sumaj karqa. ¡Ni imarayku chayta qhesachaykumanchu karqa!”, nispa. Chayrayku, ¿imatá ruwarqanku? Chay ratopacha solicitudesta juntʼacherqanku.

Juntʼachisqankumanta wata kurajña kajtinpis, niraj yacharqankuchu wajyarinankutachus manachus. Jinapis kapuyninkuta pisiyacherqanku. Cesar nin: “Wasiykoj garajenpi uj juchʼuy wasita ruwarqayku, chaymantaj tiyakoj riporqayku. Chayraykutaj chaypachallaraj ruwakusqayku wasita alquilarqayku. Uj jatun wasipi tiyakushasqaykumanta, uj juchʼuy wasisitullapiña tiyakorqayku. Chayta ruwasqaykuraykutaj Betel wajyariwajtiyku rinaykupaj wakichisqa kasharqayku”, nispa. ¿Betelman wajyarerqankuchu? Rocio nin: “Chay juchʼuy wasisitupi killataña tiyakushajtiyku, Wallkillpi uj tiempota llankʼanaykupaj wajyariwarqayku. Ajinamanta rikorqayku kapuyniykuta pisiyachisqaykurayku, Jehová bendeciwasqaykuta”, nispa.

JEHOVÁ BENDECIN

Ashkha hermanospis Cesar, Rocio jinallataj kapuyninkuta pisiyachinku, Nueva Yorkpi ruwakushan chay llankʼaykunapi yanapakunankupaj. Wakin hermanosqa Wallkillpi Betelta jatunyachikushasqanpi yanapakushanku, wakintaj Warwickpi Jehovaj testigosninpa centralninkuta ruwaypi yanapakushanku.a Ashkha qhariwarmisqa Diospaj astawan llankʼanankupaj, sumaj wasisninkuta, sumaj llankʼayninkuta, animalitosninkuta ima saqenku. ¿Imaynatá chayta Jehová qhawan? ¿Chayta ruwasqankumanta bendecinchu? ¡Arí!

Sutʼincharinapaj, Way sutiyoj hermanoqa electricista. Pay, Debra ima 60 watasniyoj jinaña kanku, Kansaspi kaj wasinkuta, waj imasninkuta ima venderqanku Wallkillpi kaj Betelpi yanapakunankupaj.b Chayta ruwasqankumanta mana pesachikunkuchu. Debra Betelpi llankʼayninmanta nin: “Wakin kutispi publicacionesninchejpi paraisomanta dibujos rikukun, mayqenpichus hermanos wasista ruwashanku, kaypi llankʼaspaqa chaypi kashasqayta yuyani”, nispa.

Carolina del Sur nisqamanta Melvin, Sharon imaqa wasinkuta, wakin imasninkutawan venderqanku Warwickman yanapakoj rinankupaj. Chayta ruwayta mana atillarqankuchu, chaywanpis yanapakuyta atisqankuta may sumajpaj qhawarqanku. Paykuna ninku: “Pachantinmanta hermanospaj allinninkurayku yanapakoyqa may sumajpuni. ¡Chaytaj mayta kusichiwanchej!”, nispa.

Californiamanta Kennethqa albañil karqa, kunantaj jubilasqaña, paywan, Maureenwanqa 50 watasniyojmanta astawanña kanku. Paykunataj Warwickman yanapakoj riporqanku. Niraj ripushaspataj, uj hermanawan wasinkuta qhawaripunanpaj parlarerqanku. Chantapis familiankuwan parlarerqanku, Kenpa tatanta machituña kasqanrayku qhawaripunankupaj. ¿Betelman llankʼaj rinankupaj tukuy imata ruwasqankumanta pesachikunkuchu? Ken nin: “Kaypi yanapakusqaykoqa mayta yanapashawayku. Waj llakiykunasniyoj kaspapis, may kusisqas kausakushayku. Munaykutaj tukuy ajinata yanapakunankuta”, nispa.

MANA ATIKULLARQACHU

Yanapakoj rejkunamanta, ashkhas wakin chʼampaykunata atiparqanku. Sutʼincharinapaj, Williamwan Sandrawanqa 60 watasniyojmanta astawanña kanku, Pensilvaniapitaj allinta kausakoj kanku. Paykunaqa maquinaspaj repuestosta ruwaj may rejsisqa empresayoj karqanku, 17 runastaj paykunapaj llankʼaj kanku. Chantapis wawamantapacha karqanku chay qotuchakuyllapipuni kasharqanku, familiankupis qayllankupi tiyakoj. Wallkillman yanapakoj riyta atisqankuta yachaspataj, familiaresninkuta, rejsisqasninkuta, waj imastawan saqenanku kasqanta yacharqanku. William nin: “Tiyakorqayku chaymanta mana ripuyta atillarqaykuchu”, nispa. Paykunaqa Jehovamanta mayta mañakuytawan waj ladoman riporqanku, nitaj chayta ruwasqankumanta pesachikunkuchu. William nillanpuni: “Kaypi ruwaysikuy, betelitaswan khuska llankʼay imaqa ni imawan kikinchakunchu. Sandrawan noqawan ni jaykʼaj jina, ¡may kusisqa kashayku!”, nispa.

Wallkillpi yanapakojkunamanta wakin qhariwarmis

Rickyqa Hawaipi wasista ruwaj empresapi gerente karqa, Warwickpi yanapakunanpajtaj wajyarerqanku. Yanapakoj riyta munananpajtaj warmin Kendra yanaparqa. Chaywanpis paykunaqa llakisqa kasharqanku, imaraykuchus mana yacharqankuchu Nueva Yorkman ripojtinku, 11 watayoj wawanku Jacob yachaykukunantachus, manachus. Tapurikorqankutaj ripunanku allinchus, manachus kasqanta.

Ricky nin: “Noqaykoqa munarqayku, mosoj qotuchakuyniykupi creeypi sinchʼita sayaj waynaswan wawayku amigosta ruwakunanta”, nispa. Mosoj qotuchakuyninkupitaj pisi wawaslla karqanku, ashkha betelitastaj. Ricky nillanpuni: “Ñaupaj kutirayku mosoj qotuchakuyniykupi tantakuyman risqaykutawan, mana waj waynuchitus qotuchakuypi kasqankurayku imaynachus sientekusqanta Jacobta tapurerqani. Pay kutichiwarqa: ‘Ama llakikuychu tatay. Betelitas amigosniy kanqanku’”, nispa.

Jacob, tatasnin ima Tantakuna Wasipi betelitaswan kusisqas parlarishanku — Jacob, tatasnin ima qotuchakuyninkumanta betelitaswan amigos kanku

Chaytaj ajinapuni karqa. Jacobpa amigosnenqa betelitas kanku. ¿Chay payta yanaparqachu? Ricky nin: “Uj chʼisi wawaypa cuartonnejta pasashaspa luzllapipuni kashasqanta rikorqani. Yuyarqanitaj pujllashasqanta, nitaj jinachu karqa, astawanpis Bibliata leeshasqa. Imatachus ruwashasqanta tapurejtiytaj niwarqa: ‘Betelita kani, uj watapitaj Bibliata leesaj’”, nispa. Cheqamanta nisunman Ricky, Kendra ima may kusisqa kashasqankuta. Mana Ricky Warwickpi yanapakushasqanraykullachu, manaqa wawanku wiñay tukusqa cristianoman tukushasqanrayku ima (Pro. 22:6).

JEHOVAPI ATIENEKULLANKUPUNI

Wallkillpi, Warwickpi ima ruwakushasqanqa tukukonqa, chaypi llankʼajkunataj yachanku chay llankʼay tukukusqantawan ripunankuta. ¿Chay hermanos chay llankʼay tukukusqantawan maymanchus ripunankumanta, imatachus ruwanankumanta ima llakikunkuchu? ¡Mana! Astawanpis Floridamanta iskay qhariwarmis jina yuyanku, chay qhariwarmisqa 50 watasniyojmanta astawanña kanku. Ujnin qhariwarmeqa Johnwan, Carmenwan kanku, Johnqa gerente karqa, iskayninkutaj kunan Warwickpi uj tiempota sirvishanku. Ninkutaj: “Kunankamaqa Jehová ni imamanta pisichiwasqaykuta rikuyku. Yachaykutaj manaña kaypi llankʼajtiykupis Jehová qhawanallawaykutapuni”, nispa (Sal. 119:116). Ujnin qhariwarmitaj Luiswan, Queniawan kanku, Luisqa sistemas de extinción de incendios nisqata ruwan, iskayninkutaj Wallkillpi sirvishanku. Ninkutaj: “Rikuyku Jehová may khuyakuywan tukuy necesitasqaykuta qowasqaykuta. Yachaykutaj paypaj mayllapipis llankʼajtiyku qhawanallawaykutapuni”, nispa (Sal. 34:10; 37:25).

“MAY CHHIKA BENDICIONESWAN JUNTʼACHIMUSQAYKICHEJ”

Nueva Yorkpi yanapakojkunamanta ashkhasqa, ichapis ruwanasniyoj kasqankurayku mana riyta atisqankuta ninkuman karqa. Chaywanpis Jehová yanapananpi atienekorqanku, imaraykuchus Jehová nin: “Allinta qhawariychej, chantá rikunkichej, imaynatachus noqa janaj pacha ventanasta kicharispa, may chhika bendicioneswan juntʼachimusqaykichej, chayta”, nispa (Mal. 3:10).

Qanrí, ¿Jehová yanapasunanpi atienekuwajchu? Chayta ruwanaykipaj Jehovamanta yanapata mañakunaykita munayku. Chantá Nueva Yorkpi, chayri Tantakuna Wasista ruwaypi yanapakuyta atisqaykipichus, manachus tʼukuriy. Chayta ruwanki chayqa, Jehová bendecisusqanta rikunki (Mar. 10:29, 30).

Alabama llajtamanta Dale sutiyoj hermano ingeniero civil, warmin Cathywantaj Wallkillpi yanapakushanku, munankutaj waj hermanospis ajinata yanapakunankuta. Paykuna ninku: “Chayta ruwanaykipaj kallpachakunki chayqa, Jehovaj yanapayninta rikunki”, nispa. Yanapakuyta munashanki chay, ¿imatá ruwawaj? Dale nin: “Kapuyniykita pisiyachiy, pisiyachinkiña chaytaj, astawan pisiyachillaypuni. Chayta ruwaspaqa, ¡ni jaykʼaj pesachikunkichu!”, nispa. Carolina del Nortemanta, Gary sutiyoj hermano 30 watasta wasista ruwakun chaypi supervisor jina llankʼarqa. Kunantaj warmin Maureenwan, Warwickpi yanapakushan. May kusisqastaj kashanku Betelpi ashkha watastaña Jehovapaj llankʼaj may chhika hermanoswan khuska llankʼaspa, khuska kaspa ima. Gary nin: “Betelpi llankʼanapajqa kapusqallanchejwan kausakuna tiyan, chaytaj aswan sumaj”, nispa. Jasonqa Illinoismanta, paytaj uj empresapi luzta churaspa llankʼaj. Kunantaj warmin Jenniferwan Wallkillpi yanapakushan. Paykuna ninku: “Wallkillpi yanapakoyqa mosoj pachapi tiyakuyman rijchʼakun”, nispa. Jennifer nin: “Mayta kusichiwanchej Jehová tukuy ima ruwasqanchejta qhawashasqanta, ni jaykʼaj chayta qonqananta ima yachay. Chantapis Jehovaqa mayta bendeciwanchej”, nispa.

a Anuario de los testigos de Jehová 2014 nisqapi, 12, 13 paginasta leey.

b Betelman yanapakoj rejkunamanta wakenqa, semanapi wakin diasllata yanapakunku, nitaj Betelpichu tiyakunku. Imatachus necesitasqankupajtaj llankʼananku tiyan.

¿YANAPAKUYTA ATIWAJCHU?

Rey Davidqa sonqonpi mayta munarqa Jehovapaj uj templota “oqhariyta” (1 Cró. 22:7). Payqa Jehová suti jatunchasqa kananpaj uj templota ruwaypi yuyaspa mayta kusikorqa. Kausakushallanmanpuni karqa chay, ¿manachu Jehovata jatunchanapaj manchayta llankʼakushasqanpi yanapaysikuyta munanman karqa?

Willajkuna astawan yapakushasqanrayku, kay pachaj tukukuynin astawan qayllitapiña kasqanrayku ima, ashkha suyuspi astawan necesitakun sucursales, Jatun Tantakuna Wasis, Tantakuna Wasis, Waj Parlayman Tijrachinapaj oficinas, Diospa llajtanpi escuelas ruwakunanpaj wasis ima (Isa. 60:22; Hab. 2:3). Chaykuna ruwakunanpajtaj, kaykunamanta yachaj hermanos necesitakun: Gestión de bienes inmuebles, arquitectura, delineación, ingeniería, elaboración de presupuestos, compras, supervisión de obras, agrimensura chayri topografía, albañilería, obras en hormigón, instalaciones mecánicas, plomería chayri fontanería, soldadura, instalaciones eléctricas, carpintería, mantenimiento y manejo de maquinaria pesada, paisajismo, acabados nisqamanta ima.

Qan tiyakunki chaypipis ichá Diospa llajtan imallatapis ruwachishan. Chantapis may wakichisqa, waj suyupi llankʼayta munaj hermanos necesitakun. Qanrí, ¿yanapakuyta munawajchu? Jina kajtenqa qotuchakuyniykimanta ancianoswan parlariy. Tapuriytaj imastachus chayman rinaykipaj juntʼanayki kasqanta.

Ashkha hermanos, waynas ima Jehovata jatunchanapaj manchayta llankʼakushasqanpi yanapakushanku. Qanpis yanapakuyta munanaykipaj kallpachakuy, imaraykuchus chayqa Jehová sutita jatunchan. Chaypaj, ¿manachu Diosmanta mañakuwaj? Chaykunapi yanapakusqaykimanta, ¡ni jaykʼaj pesachikunkichu!