Bedellpa Biblian Bibliata tijrachikun aswan allinta entiendekunanpaj

WILLIAM Bedell Inglaterra suyumanta karqa, 1627 watapitaj Irlanda suyuman chayarqa. Irlandapitaj mana allin imasta tarerqa. Chantapis chay suyupeqa casi tukuy católicos kajtinkupis, Gran Bretañaj atiyninpi kasharqanku, paykunaqa protestante religionniyoj karqanku. Protestante religionmanta kajkunaqa, casi tukuynin Europapi parlakusqan qallusman Bibliata tijrachisqankuña. Irlandés qallumantajrí nisina pipis tijrachiyta munarqachu.

Bedellqa Irlandamanta kajkuna Bibliamanta yachakunallankutataj munarqa, mana inglesta yachajtinkupis. Chayrayku irlandés parlayman Bibliata tijrachiyta munarqa. Jinapis ashkhas churanakorqanku, astawanqa protestante religionmanta kajkuna. ¿Imaraykú?

IRLANDÉS PARLAYTA QHESACHANKU

Bedellqa sapallanmanta irlandés qalluta yachakorqa. Dublín llajtapi Universidad Trinity College nisqapi director kaspataj, yachakojkunata irlandés qallupi parlanankuta nerqa. Kilmorepi obispota sutichajtinku kikillantataj nerqa. Chay Universidadtaqa Inglaterramanta reina Isabel I nisqa sayarichisqa, chaymanta llojsej curas runasman parlayninkupi Bibliata yachachinankupaj. Bedelltaj chayta ruwayta munarqa.

Bedell kasharqa chaypeqa casi tukuy irlandés qalluta yachaj kanku. Chayrayku Bedellqa nerqa iglesiaspi yachachejkuna irlandés qalluta yachanankuta. Chayta munasqantataj nerqa apóstol Pablo kayta nisqanman jina: “Iglesiapi astawan munayman phishqa palabrasllata entiendenankupaj jina parlayta, chunka waranqa palabrasta waj parlaykunapi parlanaymantaqa” (1 Corintios 14:19).

Wakin atiyniyoj runastaj tukuy imata ruwarqanku chayta mana ruwakunanpaj. Yachayniyoj runasqa qhelqarqanku, wakin runas, irlandés qalluta parlay suyupaj mana allinchu kasqanta nisqankuta, wakintaj mana gobiernoj munasqanman jinachu kasqanta nisqankuta. Wakin runasqa yuyarqanku Irlandamanta kajkuna ni imata yachananku, Inglaterrapaj may allin kasqanta. Chantapis Inglaterramanta kajkuna leyesta orqhorqanku Irlandamanta kajkuna inglesta yachakunankupaj, costumbresninkuta ruwanankupajtaj.

RUWAYTA QALLARERQA

Bedellqa churanakojtinkupis ñaupajllamanpuni rerqa. Kay 1630 watas chaynejta Bibliata irlandés qalluman tijracherqa. Chaytataj inglespi kaj Versión del Rey Jacobo (King James Version, 1611) nisqa mosoj Bibliamanta ruwarqa. Chay Bibliaqa tukuy runas entiendenankupaj jina kananta munarqa. Yuyarqataj llampʼu sonqo runas Bibliata mana entiendespaqa mana wiñay kausayta japʼinankuta (Juan 17:3).

Mana payllachu jinata yuyarqa. Kinsa chunka watas ñaupajta waj obispo Bedell jina yuyallarqataj. Payqa William Daniel karqa. Danielqa repararqa Biblia “mana rejsisqa parlaypi kajtenqa” mana entiendeyta atikusqanta. Payqa Nuevo Testamento nisqata irlandés qalluman tijrachisqaña, chayrayku Bedellqa Antiguo Testamento nisqata tijrachinanta nerqa. Bedellpa Biblianqa, paypa tijrachisqanwan Danielpa tijrachisqanwan ujchasqa kashan. Irlandés parlaypi chay Bibliallaraj karqa, 300 watastataj chay parlaypi chaylla karqa.

Bedellqa iskay runaswan yanapachikorqa, chay runaspa parlayninkutaj irlandés karqa. Bedellqa hebreo qalluta sumajta yachaj. Chayrayku ruwasqankuman jina pay, uj chayri iskay yanapajkunasnin ima sapa versiculota allinta qhawaykurej kanku. Chantapis yanapachikorqanku italiano parlaypi teólogo Giovanni Diodati tijrachisqan Bibliawan, Septuaginta griega nisqawan, hebreopi qhelqasqaspiwan.

Irlandés qalluman Bibliata tijrachejkunaqa, Versión del Rey Jacobo nisqa Bibliata inglesman tijrachejkuna jina ruwarqanku. Chantá Diospa sutintapis ashkha lugarespi churarqanku. Bedellqa inglesman tijrachejkunata casi tukuyninta rejserqa. Chayrayku Éxodo 6:3 versiculopipis Diospa sutinta “Iehovah” nispa churarqa. Bedell tijrachisqanqa Irlanda suyoj capitalnin Dublín llajtapi kashan, biblioteca Marsh nisqapi (“William Bedellpa ruwasqanmanta yuyarikuspa” nisqa recuadrota qhawariy).

BEDELLPA BIBLIAN ORQHOKORQA

Bedellqa 1640 wata chaynejta Bibliata tijrachiyta tukorqa. Jinapis mana orqhorqachu sinchʼi churanakuy kasqanrayku. Churanakojkunaqa Bedellpaj rimarqanku, ruwasqan qhasilla kasqanta yuyaspa. Japʼichispataj wisqʼacherqanku. Chantapis 1641 watapi Irlandamanta kajkuna Inglaterraj contranpi oqharikorqanku. Bedell Inglaterramanta kajtinpis Irlandamanta kajkuna jarkʼarqanku, paykunata munakusqanrayku. Jinapis sajra soldados japʼispa wisqʼaykorqanku, may llakiypitaj kasharqa. Chayraykutaj usqhayllata wañuporqa 1642 watapi. Tijrachisqan Biblia orqhokusqanta mana rikorqachu.

Bedellpa wasinman yaykuykuspa tukuy imata apakaporqanku, thuñirarqankutaj, chayrayku tijrachisqanqa casipuni chinkarqa. Chaywanpis uj amigon tijrachisqanmanta papelesta apakaporqa. Tiemponmantaj Bedellpa ruwasqanta japʼerqa Narcissus Marsh, pichus Armagh llajtapi arzobispo karqa, Irlanda suyupitaj Iglesiapi ñaupajman apaj karqa. Aswan qhepamantaj científico Robert Boyle qolqeta qorqa Narcissusman, paytaj chay qolqewan 1685 watapi irlandés parlaypi Bibliata orqhorqa.

BEDELLPA BIBLIANQA SUMAJPUNI KARQA

Bedellpa ruwasqan Bibliaqa mana Jallpʼantinpi rejsisqachu karqa. Jinapis may sumaj karqa Bibliata allinta entiendekunanpaj. Chaytaj karqa Irlandapi, Escociapi, waj lugarespi ima irlandés qalluta parlajkunapaj. Bibliata parlayninkupi leespataj Diosta rejsiyta aterqanku (Mateo 5:3, 6).

Kunankamapis Bedellpa ruwasqan Bibliaqa runasta yanapan Diosta rejsinankupaj. Irlanda suyumanta uj runa, pichus kunallanraj Bibliamanta yachaspa nerqa: “Bedellpa Biblianta leespaqa, repararqayku qalluykupipis Dios parlashawaykuman jina kasqanta. Mayta familiantinta yanapawarqayku Diospa Palabranmanta cheqa kajta yachakunaykupaj”.