Hebreo parlaypi aswan juchʼuy letraqa yanapawanchej

¿Jehovaj tukuy ima nisqan juntʼakunanpi atienekusunmanchu? Jesusqa Diospa nisqan juntʼakunanta sumajta yacharqa, yachachiykunasnintaj payta uyarejkunaj creeyninkuta kallpacharqa. Orqopi yachachishaspa imatachus nisqanpi tʼukurina, chaytaj Mateo 5:18 versiculopi kashan. Chaypi nin: “Cheqatapuni niykichej: Cielopis jallpʼapis chinkarinman, Leymantarí mana uj juchʼuy letrallapis, chayri uj chʼiñi letrallapis chinkarenqachu manaraj juntʼakuspaqa”, nispa.

Hebreo parlaypi aswan juchʼuy letraqa י (yod), chaytaj hebreo parlaypi Diospa sutin Jehová qhelqakusqanmanta ñaupaj kaj letra.a Leymanta yachachejkuna, fariseos ima, Diospa Leyninmanta palabrasta, letrasta ima jatunpaj qhawaj kanku, jinallataj tukuy ima chʼiñi letritastapis.

Jesusqa nerqa cielo, Jallpʼa ima chinkayta atinanta, Leymanta uj juchʼuy letrallapis chinkananmanta nisqaqa. Bibliataj cielo, Jallpʼa ima wiñaypajpuni sayanankuta nin (Salmo 78:69). Ajinata nisqanwantaj Jesusqa sutʼincharqa Leymanta aswan juchʼuy letranpis juntʼakunantapuni.

Jehovaqa tukuy ima nisqanta juchʼuysitu kajtinpis juntʼanqapuni. Jehová Diosqa israelitasman pascua corderoj tullusninta mana pʼakinankuta nerqa (Éxodo 12:46). Ichapis chayta paykunaqa mana jatunpaj qhawayta atillarqankuchu. Ichapis nillataj entienderqankuchu imaraykuchus pascua corderoj tullusninta mana pʼakinankuchu kasqanta. Jinapis Jehovaqa yacharqa chay nisqan aswan qhepaman Mesiaspi juntʼakunanta, imaraykuchus Mesiasta rakhu kʼaspipi wañuchishajtinku ni uj tullullantapis pʼakerqankuchu (Salmo 34:20; Juan 19:31-33, 36).

Jesuspa nisqanqa Jehovaj tukuy ima nisqan juntʼakunanpi atienekunapaj yanapawanchej. Hebreo parlaypi juchʼuy letraqa, ¡maytapuni yanapawanchej!