Yachayniyojkunawan pureyqa yanapawarqa

UJ PAQARIN, Brookings (Dakota del Sur, Estados Unidos) llajtapi manchay chiripi kashasqaymanta yuyarikullanipuni. Qhasay tiempoqa chamusharqaña. Chay paqarenqa uj mashkha runaswan khuska techoyoj corralpi kasharqayku. Qhasa yakuyoj estanque kantupitaj kharkatisharqayku. Imaraykuchus chaypi kashasqayta yachanaykichejpaj, kausayniymanta uj chhikanta willarisqaykichej.

FAMILIAY

Kay 7 de marzo de 1936 watapi nacekorqani. Kinsa hermanosniyoj kani, noqataj tukuyniykumanta aswan sullkʼa kani. Familiaywan uj juchʼuy hacienditapi tiyakoj kayku, Dakota del Sur nisqamanta inti llojsimuy ladopi. Chaypi trabajaytaqa jatunpaj qhawaj kayku, jinapis mana chayllamanchu qokoj kayku. Tatasneyqa 1934 watapi Jehovaj testigosninman tukusqanku. Kausayninkuta Diosman qopusqankurayku, paypa munayninta ruwayta ñaupajman churaj kanku. Tataypa sutenqa Clarence karqa. Tatayqa congregacionpi yanapakoj, imaynatachus kunan ancianosta umachaj hermano ruwan, ajinata. Chaymantataj tiuy Alfredñataj ajinata yanapakorqa.

Familiaywan tantakuykunaman rej kayku, runasmanpis sumaj kausay kananmanta wasimanta wasi willaj kayku. Tatasneyqa ruwasqankuwan, yachachiwasqaykuwan ima, Jehovata astawan munakunaykupaj yanapawarqayku. Hermanay Dorothy, noqapis sojta watasniyoj kashaspa predicayta qallarerqayku. Kay 1943 watapitaj Diosmanta Parlayta Yachanapaj tantakuy qallarerqa, chaymantaj anotachikorqani.

Jatun tantakuykunataqa may jatunpaj qhawaj kayku. Sioux Falls (Dakota del Sur) nisqa llajtapi jatun tantakuy ruwakusqanmanta kunankama yuyarikullanipuni. Chay tantakoyqa 1949 watapi karqa, hermano Grant Suitertaj sumajta umalliricherqa. Paypa umallirichiynin karqa, “Tiempoqa tukukapushanña” nisqa. Tukuy hermanosmantaj Diospa Gobiernonmanta tukuy atisqankuta willamunankuta nerqa. Chayrayku noqapis qhepan jatun tantakuypi Diosman kausayniyta jaywaporqani. Chaytaj karqa Brookingspi, 1949 watamanta 12 de noviembrepi. Qallariypi willarerqaykichej jina, chay kutipi qhasa yakuyoj estanque kantupi sayasqa kasharqani. Arí, bautizakunaypaj suyakusharqani.

Precursor kanayta nerqani. Chantá 1952 watapi 1 de enerota precursor kayta qallarerqani, 15 watasniyoj kashaspa. Bibliaqa nin: “Yachayniyojkunawan purejqa yachayniyojllataj kanqa”, nispa (Pro. 13:20). Familiaypitaj ashkha yachayniyoj runas karqanku, paykunataj precursor kanaypaj mayta yanapawarqanku. Tiuy Juliuswan sapa kuti predicaj kani, payqa 60 watasniyojña karqa. Allin kurajniy kajtinpis may kusisqa iskayniyku predicaj kayku. Paymantaqa ashkhata yachakorqani. Hermanay Dorothypis, pisi tiemponman precursorallataj karqa.

WATUREJ HERMANOS YANAPAWANKU

Tatamamayqa congregacionesta waturej hermanosta, señorankuta ima wasiykuman wajyarejpuni kanku. Jesse Cantwellwan, señoran Lynwanqa mayta yanapawarqanku, kallpachawarqankutaj. Wasiy qayllapi kaj congregacionesta waturishaspaqa, paykunawan willaj rinaypaj wajyariwaj kanku. Kusisqa paykunawan purikoj kani. Paykuna jina tukuy atisqayta Jehovapaj llankʼayta munarqani, precursor kaytapis.

Chaymantaqa Bud Millerñataj, señoran Joanwan congrecionniykuta waturej jamorqanku. Chaypajqa 18 watasniyojña karqani. Chayrayku cuartelman presentakamunay karqa. Cuartelpeqa uj qotu runas qhawaj kanku, pikunachus cuartelman yaykunankuta, pikunatajchus mana. Paykunaqa kamachiwarqanku uj imata ruwanayta, jinapis chayta ruwaspaqa, Jesús politicaman ama chhapukunata kamachisqanta niña kasukuymanchu karqa (Juan 15:19). Noqaqa Diospa Gobiernonmanta sumaj willaykunata willayta munarqani. Chayrayku iglesiamanta pastoresta jina qhawanawankuta nerqani.

Hermano Millerqa presentakamunaypaj noqawan rinanta niwarqa, chaytaj mayta kusichiwarqa. Imajtinchus hermano Millerqa mana mayqen runatapis manchachikojchu. Chantapis Bibliaj nisqanta sumajta rejsej. Noqawan khuska risqanqa manchayta kallpachawarqa. Chantá 1954 watapi, qʼoñi tiempo tukukuyta cuartelmanta runasqa niña cuartelman rinaychu kasqanta niwarqanku. Chayrayku Jehovapaj tukuy atisqayta llankʼayta aterqaniña.

Pisi tiemponmantaj Betelman wajyariwarqanku, Watchtower nisqa haciendapitaj llankʼarqani. Chayqa Nueva York llajtapi kashan, Staten Island nisqapi. Chaypeqa kinsa watata yanapakorqani. Yachayniyoj hermanoswan llankʼaspaqa, paykunamanta mayta yachakorqani.

BETELPI YANAPAKUNI

Watchtower nisqa haciendapeqa Jehovaj testigosninpa WBBR nisqa radionku kasharqa. Chay radioqa 1924 watamanta 1957 watakama trabajarqa. Haciendapeqa 15 chayri 20 betelitas jina llankʼaj kayku. Casi tukuyniyku jovencitoslla karqayku, uj kuraj hermanitotaj noqaykuwan khuska llankʼaj. Payqa Eldon Woodworth sutikorqa, ajllasqa cristianotaj karqa. Chay hermanoqa tatayku jina karqa, ashkha imastataj yachachiwarqayku. Jóvenes kajkuna wakin kutis phiñanakojtiyku, hermano Woodworthqa niyta yachaj: “Jehovaqa juchasapa runaswanpis tʼukuna imasta ruwashan”, nispa.

Hermano Frederick Franzpis noqaykuwan llankʼaj, maytataj yanapawarqayku. Payqa yachayniyoj karqa, Bibliata sumajta rejsej, sapa ujniykumantataj llakikoj. Hermano Harry Petersonqa waykʼupuwaj kayku. Paypa apellidonpuneqa Papargyropoulos karqa. Chaytataj mana niyta atejchu kayku, chayrayku Peterson nej kayku. Chay hermanopis ajllasqa cristiano karqa, sonqo kʼajaywantaj predicaj. Betelpi sumajta llankʼaspapis, predicacionmanqa rejpuni. Sapa killa 100 revistasmanta astawan runasman jaywaj. Paypis Bibliata sumajta rejsej, chayrayku tukuy imata tapukoj kayku.

YUYAYNIYOJ HERMANAS YANAPAWANKU

Haciendapeqa frutasta, verdurasta ima chiri tiempopaj waqaychaj kayku. Sapa wata 45 mil frascosta jina Betelpaj wakichej kayku. Noqaqa hermana Etta Huthwan llankʼaj kani. Payqa yachayniyoj warmi karqa, yachachiwajtaj kayku imaynatachus frutasta, verdurasta ima frascospi waqaychanata. Hacienda qayllapi tiyakoj ashkha hermanas yanapaysikoj jamoj kanku. Hermana Ettataj paykunaman imatachus ruwanankuta nej. Payqa imaynatachus frutasta, verdurasta ima waqaychanamanta ashkhata yachaspapis, haciendamanta encargadosta jatunpaj qhawaj. Paymanta mayta yachakorqayku.

Yanapaysikoj jamoj hermanasmanta ujqa, Angela Romano karqa. Paytaqa hermana Etta Bibliamanta yachachisqa. Angelawanqa abril de 1958 watapi casarakorqayku, 58 watastañataj Jehovapaj khuska llankʼashayku. Señorayqa Jehovata tukuy sonqo sirvin, chaytaj qhariwarmi jina sumajta kausakunaykupaj yanapawayku. Payqa yuyayniyoj, chayrayku paymanqa imatapis willariyta atillani.

MISIONERO KANI, CONGREGACIONESTATAJ WATURINI

Hermanosqa WBBR nisqa radiota 1957 watapi vendeporqanku. Uj pisi tiempotataj Brooklyn Betelpi yanapakorqani. Chantá Angelawan casarakorqani, Betelmantataj llojsiporqani. Señoraywanqa kinsa watata Staten Islandpi precursores karqayku. Uj tiempitutaqa, WBBR radioj mosoj dueñosninpaj trabajarqani. Chay radiomanqa waj sutita churarqanku, chaytaj karqa WPOW.

Señoraywanqa pisi imasllawan kausakunaykupaj kallpachakorqayku. Ajinamanta maypipis yanapakamuna kajtenqa, chay rato rinaykupaj. Ajinataj karqa, 1961 watapi Falls City (Nebraska) llajtapi precursores especiales kanaykupaj wajyariwarqayku. Chayman chayasqaykumanta pisi tiemponman, South Lansing (Nueva York) llajtapi Ñaupajman Apajkunapaj Escuelaman wajyariwarqayku. Chaypi uj killata yachakuspaqa may kusisqa kasharqayku, yuyarqaykutaj Nebraskaman kutipunaykuta. Chayrayku Camboya suyuman misionerosta jina kachawajtiyku, mayta tʼukorqayku. Chay suyoqa Asiaj uranejninpi kashan, may kʼachitutaj. Chaypeqa mosoj imasta rikorqayku, uyarerqayku, llamirerqaykutaj. Tukuy sonqo Diospa Gobiernonmanta sumaj willaykunata chaypi willayta munarqayku.

Jinapis Camboyapi jatuchaj chʼampaykuna rikhurerqa. Chayraykutaj Vietnam del Sur nisqa suyuman riporqayku. Chaypi iskay watasta kaytawan sinchʼita onqoykorqani, chayrayku Estados Unidosman kutiporqayku. Unaysitupi allinyakorqani. Jinapis sanoyakusqaytawan, watejmanta precursores karqayku.

Kay 1965 wata marzo killapi congregacionesta waturiyta qallarerqayku. Señoraywan khuska 33 watasta ashkha congregacionesta waturerqayku, ashkha jatuchaj tantakuykunapitaj yanapakorqayku. Chayta ruwaspaqa kusikoj kani, imajtinchus jatun tantakuykunataqa jatunpaj qhawani. Chantá uj mashkha watasta Nueva Yorkpi, muyuyninpi kaj lugarespi ima congregacionesta waturerqayku. Chayrayku ashkha jatun tantakuykunata Estadio de los Yankees nisqapi ruwarqayku.

BETEL, DIOSPA LLAJTANPI ESCUELAS IMA

Señoraywanqa Diospa llajtanpi imaymana ruwanasniyoj karqayku. Kay 1995 watapi Escuela de Entrenamiento Ministerial nisqapi hermanosta yachachinaypaj wajyariwarqanku. Kinsa watanmantaj Betelman wajyariwarqayku. Betelmanqa 40 watasmanta kuterqani, manchay kusisqataj kasharqani. Imaraykuchus chaypi Diospa llajtanpaj astawan llankʼayta qallarerqani. Uj tiempotaqa Congregacionesta Yanapaj Oficinapi (Departamento de Servicio) yanapakorqani, Diospa llajtanpi escuelaspi yachachispa ima. Chantá 2007 watapi, Diospa Llajtanta Kamachejkunaqa, Betelpi escuelasta sumajta wakichinapaj, Diospa Llajtanpi Escuelasta Wakichej Oficinata kicharerqa. Ashkha watastataj chay oficinamanta encargado karqani.

Kay qhepa wataspi, Betelpi escuelasta waj jinasmanta ruwakushan. Congregacionmanta Ancianospaj Escuelaqa 2008 watapi qallarerqa Pattersonpi, Brooklynpi ima. Chaymanqa qhepan iskay wataspi 12.000 ancianosmanta astawan rerqanku. Kunantaj chay escuelaqa ashkha lugarespi ruwakushallanpuni. Escuela de Entrenamiento Ministerialqa, 2010 watapi Soltero Cristianospaj Escuelaman tukorqa. Chantapis Casarasqa Cristianospaj Escuela qallarerqa.

Septiembre de 2014 watapitaj, chay iskay escuelasqa ujllaman tukorqa, sutikorqataj Reinomanta Willajkunapaj Escuela. Chay escuelamanqa riyta atinku, casarasqas, soltero hermanos, soltera hermanaspis. Jallpʼantinpi ashkha hermanos mayta kusikorqanku, chay escuela suyunkupipis qallarisqanmanta. May sumajpuni ashkhas chay escuelaman riyta atisqankoqa. Ashkha hermanos chay escuelaman rinankupaj mayta kallpachakorqanku, paykunata rejsispataj mayta kusikuni.

Chay chiri diapi bautizakusqaymantapacha imaynachus kausayniy kasqanpi tʼukurispaqa, Jehovaman mayta agradecekuni. Ashkha yachayniyoj runasta rejsini. Paykunataj Diosta astawan rejsinaypaj, paypaj llankʼanaypaj ima mayta yanapawanku. Wakenqa sullkʼasniy karqanku, wakintaj kurajkunasniy, imaymana llajtasmantataj. Paykunaj kausayninkoqa, Jehovata mayta munakusqankuta rikuchiwan. Noqataj chay yachayniyoj amigosniymanta mayta yachakuyta atini. Jehovaj llajtanpi chay jina amigosniyoj kasqaymanta maytapuni kusikuni.