Pisi imasllawan kausakuspa kusisqa kanku

DANIELWAN MIRIAMWANQA, septiembre de 2000 watapi casarakorqanku. Españapi tiyakushajtinku, tukuy imayoj karqanku. Daniel nin: “Sumaj sueldoyoj karqayku, hotelespi mikhoj kayku, waj suyusman viajaj kayku, valesqa ropastataj churakoj kayku. Predicacionmantapis mana faltakojchu kayku”, nispa. Jinapis mana jinallatapunichu kausakorqanku.

Kay 2006 watapi uj jatun tantakuypi, uj hermano tapurimorqa: “¿Maytachu kallpachakushanchej ‘wañuy patapiña kashajkunata’ yanapanapaj, ajinamanta wiñay kausayta tarinankupaj?”, nispa (Pro. 24:11). Chantá sutʼinchamorqa, runas salvakunankupaj, Diosmanta yachachinanchejpuni kasqanta (Hech. 20:26, 27). Chay hermanoj parlamusqanqa Danielpa sonqonman chayarqa. Pay nin: “Jehová noqamanpunipis parlashanman jina karqa”, nispa. Chay hermano nillarqataj Diosta sirvinapaj astawan kallpachakojtinchej, astawan kusikunanchejta. Danieltaj chayqa jinapuni kasqanta yacharqa, imajtinchus señoranqa precursoraña karqa, may kusisqataj kasharqa.

Chay hermano parlarimusqanqa, Danielta mayta tʼukurparicherqa. Chayrayku pisillataña trabajarqa, precursor regular jinataj sirverqapacha. Chantataj piensarerqa pisi hermanoslla kanku chayman señoranwan yanapakoj ripojtinku, may kusisqa kanankupi.

UJ SUMAJ LLANKʼAYTA JAPʼERQANKU

Danielwan Miriamwanqa mayo de 2007 watapi, trabajonkuta saqeytawan, Panamá suyuman riporqanku, chaytataj rejserqankuña. Chaypeqa Bocas del Toro nisqa churuspi predicaj kanku. Chaytaj Caribe nisqa jatun qochapi kashan. Chay churuspi casi tukuyninku ngäbe parlayta parlanku. Danielwan Miriamwanqa, kapusqanku qolqewan pusaj killasta jina qhepakunankuta yuyarqanku.

Churusmanqa barcopi rej kanku, chantá bicicletapi. Paykunaqa yuyarikunkuraj ñaupaj kutirayku qʼoñi diapi 30 kilometrosta jina wichayta bicicletasninkupi risqankuta. Danielqa may saykʼusqa kasqanrayku casipuni choqarparikorqa. Ngäbeta parlaj runastaj, paykunawan kʼachas karqanku. Astawanraj ngäbe parlaypi wakin imitasta yachakusqankurayku. Pisi tiemponmanqa 23 runasmanña Bibliamanta yachachisharqanku.

¿Imatataj ruwarqanku qolqenku tukukapojtin? Daniel nin: “Españaman kutipunaykupi tʼukurerqayku, chayrayku waqay ñawilla kasharqayku. Diosmanta yachachisharqayku chay runasta saqepunaykumanta may llakisqa kasharqayku”, nispa. Killanman jinataj, uj sumaj llankʼayta japʼerqanku. Míriam nin: “Precursores especiales kanaykuta niwarqayku. Maytataj kusikorqayku niña ripunaykuta yachaspa”, nispa.

¿IMATAJ PAYKUNATA ASTAWAN KUSICHIN?

Kay 2015 watapi Diospa llajtanpi wakin imas cambiakusqanrayku, Danieltawan Miriamtawan niña precursores especiales kanankuta nerqanku. ¿Imatá paykuna ruwarqanku? Salmo 37:5 nisqanpi atienekorqanku, chaypi nin: “Diospa makisninman kawsayniykita churay. Paypi atienekuy, paytaj yanapasonqa”, nispa. Precursores regulares jina kanallankupajpuni uj trabajota tarerqanku. Kunantaj Panamallapipuni sirvishanku, Veraguaspi kaj congregacionpi.

Daniel nin: “Españamanta niraj jampushajtiyku, mana yuyarqaykuchu pisi imasllawan kausakuyta. Kunantaj kapuwasqallaykuwan kausakuyku nitaj imamantapis pisichikuykuchu”, nispa. Chantá iskayninkutaj ninku: “Sonqoyku mayta qhallallarin Jehová Diosta rejsinankupaj runasta yanapaspa”, nispa.