Portugalpi predicayta qallarikun

HERMANONCHEJ George Youngqa mayta yanapakorqa Brasilpi Diosmanta willakunanpaj.a Chantá Barcopi Europaman viajarqa, Españapi Portugalpiwan predicamunanpaj. Imajtinchus chay suyuspeqa pisillataraj predicakusqa. Viajashaspataj yuyaychakusqa Portugalman chayaytawan tukuy imata wakichinanta hermano Rutherfordpa discursonta runas uyarinankupaj, jinallataj 300.000 tratadosta runasman jaywananpajwan.

Hermano Georgeqa 1925 watapi Portugalman chayarqa. Chayashajtintaj chay suyupi manchay chʼajwas kasqa, 1910 watapi runas reypa contranpi oqharikusqankurayku. Chay watamantapachataj manaña reyeschu gobernarqanku, nitaj catolicospa munaynillankuchu ruwakorqa. Manaqa runas presidentenkuta churakorqanku. Chaywanpis chʼajwas kallarqapuni.

Ajina kajtinpis, hermano George tukuy imata sumajta wakicherqa Rutherford discursota qonanpaj. Jinallapitaj Portugalmanta wakin soldados gobiernota wijchʼuyta munarqanku. Chayrayku gobiernoqa kamacherqa soldados llajtasman yaykuykunankuta runas ni imata ruwanankupaj. Chaynejta Sociedad Bíblica Británica y Extranjera nisqa organizacionmanta secretario, Georgeman nisqa runas churanakunankuta. Ajinata nichikuspapis, Georgeqa, Rutherford discursota qonanpaj uj lugarta maskʼallasqapuni, uj colegioj gimnasiontataj tarisqa.

Rutherford discursota qonan diapi, ashkha runas chay discursomanta parlasharqanku. Imajtinchus chay discursota jatuchaj letrerospi, periodicospi ima willachikusqa. Chay discursotaj “¿Imaynatataj kay jallpʼapi wiñaypaj kausakusunman?” nisqa sutikorqa. Llulla religionmanta kajkunataj periodiconkupi chay rato willachisqanku, “llulla profetas chayamunku” nispa. Chantapis Rutherford discursota qonan karqa chay gimnasio wasi punkupi, runasman folletosta jaywasqanku runas Rutherfordpa discursonta mana uyarinankupaj.

Ajinata runas churanakojtinkupis, 2.000 jinapuni chay gimnasioman yaykorqanku discursota uyarej, 2.000 jinataj jawallamanta uyarikorqanku. May juntʼa kasqanrayku wakenqa ejerciciota ruwanapaj máquinas patamanta wicharispa uyarikorqanku.

Churanakoj runastaj sillasta pʼakirarqanku. Jinapis Rutherfordqa mana mancharikorqachu. Astawanpis mesa pataman wichariykorqa tukuy runas uyarinankupaj. Discursotaj casi chaupi tutata tukukorqa. 1.200 jinataj anotachikusqanku publicacionesta japʼinankupaj. Qʼayantintaj uj periodicopi Rutherfordpa discursonta churasqanku.

Septiembre de 1925 watapitaj, Portugalpi Torremanta Qhawaj revistata portugués parlaypi orqhoyta qallarisqanku. Chay tiempopaj chay revistaqa Brasilpi portugués parlaypi orqhokusharqaña. Chay watasllapitaj hermano Virgílio Ferguson señoranwan Portugalman ripunankuta nisqanku, predicacionpi yanapakamunankupaj. Virgilioqa Georgewan khuska Brasil sucursalpi sirvisqa. Georgeta rejsisqanraykutaj Virgilioqa señoranwan Portugalman riporqankupacha. Chaypitaj watejmanta Georgewan tinkukorqanku. Ripusqankutaj may allinpuni karqa, imajtinchus Georgeqa Unión Sovieticaman predicaj rinan karqa, waj lugaresmanpis.

Wakin militaresqa Portugalmanta gobiernota wijchʼurqanku. Chantá uj militar munasqanman jina gobernayta qallarerqa. Chayraykutaj manchay problemas rikhurerqa. Chaywanpis hermano Virgilioqa Diosta yupaychaypi sumajta sayarqa. Jinamantataj hermanosta kallpachallarqapuni reunionesta ruwaspa, predicacionman rinankupaj kallpachaspa ima. Reuniones wasinpi ruwakunanpajtaj autoridadesmanta permisota mañakusqa. Octubre de 1927 watapitaj autoridadesqa permisota qosqanku reunionesta ruwanankupaj.

Portugalmanta gobierno munayninman jina gobernayta qallarishajtin 450 runas jina Torremanta Qhawaj revistata sapa killa japʼej kanku. May chhika lugaresmantataj Diosmanta yachakorqanku tratadosta, folletosta ima leesqankurayku. Chay lugaresqa kaykuna kanku: Angola, Azores, Cabo Verde, Goa, Madeira, Mozambique, Timor Oriental ima.

1927 watas chaynejta Manuel da Silva Jordão Brasilmanta Portugalman ripusqa. Payqa jardinero kasqa. Brasilpi tiyakushaspaqa Georgej discursonta uyarisqa. Bibliaj nisqantapuni yachachisqanta reparaspa, Diospa llajtanman yaykunpusqa. Jinamantataj sonqon aysasqa predicacionpi hermano Virgiliota yanapakamunanpaj. Chayrayku Portugalman chayaspa precursor jina llankʼayta qallarisqa. Portugalpa capitalninpi congregacionqa wiñasharqa. Imajtinchus publicaciones imprimikunanpaj, runasman jaywakunanpaj ima sumaj organizasqa kasharqa.

Hermano Virgiliowan señoranwanqa, 1934 watapi Brasilman kutiporqanku. Jinapis Portugalpeqa Jehová Diosmanta willakorqaña. Portugalmanta hermanostaj creeypi sinchʼita sayarqanku Españapi guerra civil, Iskay kaj Guerra Mundial ima kajtinpis. Chay hermanosqa guerras kajtinpis ujchasqallapuni karqanku. 1947 watapitaj hermanonchej John Cooke Portugalman chayaspa hermanosta kallpacharqa. Payqa Galaad escuelaman risqa, Portugalpitaj primer misionero karqa. Chaymantapachataj hermanosqa astawan ashkhayarqanku. 1962 watapi gobierno hermanosta manaña predicajta saqejtinpis hermanosqa ashkhayallarqankupuni. Diciembre de 1974 watapitaj, autoridadesqa Jehovaj testigosninta religionta jina reconocerqa. Chay watapajqa Jehovaj testigosnin Portugalpi 13 mil hermanosmanta kurajña karqanku.

Kunantaj Portugalpeqa 50 mil hermanosmanta astawanña kanku. Paykunaqa Portugalpi, ashkha islaspipis predicashanku. Chay islasmanta wakenqa kanku Azores, Madeira ima. Chaypipis portuguesta parlallankutaj. Portugalmanta wakin hermanosqa Rutherfordpa discursonta uyarejkunaj allchhisninpa wawasnin kanku.

Jehová Diosman, Portugalpi predicayta qallarejkunamanwan may agradecesqas kashanchej. Chay hermanosqa tukuy sonqo, mana manchachikuspataj Cristo Jesuspa kamachisnin jina Diosmanta willarqanku (Rom. 15:15, 16). (Portugal sucursalpi waqaychakusqanmanta).