Dios bendecinawanchejpaj mañakuna

Runaslla Dioswanqa parlayta atinchej, orakuspataj imaynachus kashasqanchejta willakuyta atinchej. Profeta David Diosmanta mañakorqa: “Qan uyarinki mañakususqankuta. Tukuy runas qanman jamunku”, nispa (Salmo 65:2). Jinapis, ¿imaynatá orakusunman Dios uyarinawanchejpaj, bendecinawanchejpajtaj?

LLAMPʼU SONQOWAN, TUKUY SONQOTAJ ORAKUNA

Salmo 62:8 nin: “Sonqoykichejpi kaj chhikata payman willakuychej”, nispa. Orakuspaqa, tukuy imata Diosman willakuyta atinchej. Tukuy Atiyniyoj Diosqa sonqomantapacha mañakusqanchejta allinpaj qhawan.

DIOSPA SUTINTA OQHARISPA MAÑAKUNA

Diosta tukuy imata sutichajtinkupis, sutenqa ujlla. Pay nin: “Ñoka Jehová cani, chayka sutiymin”, nispa (Isaías 42:8, Biblia Quechua de Cuzce [QC]). Bibliapi Diospa sutenqa 7.000 kutista jina rikhurin. Ashkha profetasqa Diospa sutinta oqharispa mañakoj kanku. Abrahán nerqa: ‘Jehová Diosníy, saqellaway ujtawan tapurisunayta’, nispa (Génesis 18:30, La Biblia. Traducción del Nuevo Mundo). Noqanchejpis Diosmanta mañakushaspaqa, sutinta oqharinanchej tiyan.

PARLAYNINCHEJPI DIOSMANTA MAÑAKUNA

Ima parlaypi mañakojtinchejpis Diosqa entiendewanchej, yachantaj imaynachus kashasqanchejta. Diosqa Palabranpi niwanchej: “Diosqa tukuy runasta uj rejllata qhawasqanta. Payqa allinpaj qhawan mayqen nacionllamantapis payta manchachikojta, cheqa kajtataj ruwajta”, nispa (Hechos 10:34, 35).

Chaywanpis Dios bendecinawanchejpajqa mana orakunallanchejchu tiyan. Qhepan yachaqanaspi yachakusun imastawanchus ruwananchej kasqanta.