Leejkunaj tapuyninku

¿Imata ruwayta ‘munaytataj’ Jehová tumpamantawan nacionespa sonqonkuman churanqa?

Manchay ñakʼariy qallarinanmanta parlaspa, Apocalipsis 17:16, 17 versículos nin: “Chay rikusqayki chunka wajras, jinallataj chay millay phiña animalpis, chay khuchi warmita chejnispa tukuy imanta qhechonqanku, qʼalallatataj saqerpayanqanku. Aychanta mikhuykonqanku, ninawantaj qʼalata ruphaykuchenqanku. Diosmin sonqonkuman churarqa paypa munayninta ruwanankupaj. Ajinamanta paykunaqa uj yuyaylla kaspa, chay millay phiña animalman gobiernonkuta qonqanku”. Ñaupajtaqa publicacionesninchejpi sutʼinchakoj nacionesqa tukuynin llulla religionesta chinkachinankuta. Chay ‘munaytataj’ Diosninchej sonqonkuman churananta.

Jinapis kunanqa waj jinamanta entiendenchej. Kunanqa entiendenchej “chay millay phiña animalman” naciones ‘gobiernonkuta qonankuta’. Chay ‘munayta’ Diosqa sonqonkuman churanqa. ¿Imaynatá chay juntʼakonqa? Chayta entiendenapaj wakin tapuykunaman kutichisun.

Pikunamantachus chay profeciapi parlan chaykuna, ¿imawantaj ninakunku? ‘Khuchi warmeqa’ mundo enteromanta tukuynin llulla religioneswan ninakun. Ujnin sutintaj “Jatun Babilonia”. ‘Puka millay phiña animaltaj’ ninakun 1919 watapi jallpʼantinpi allin kausayta apamunanpaj rikhurerqa chay organizacionwan. Chaypachaqa sutikorqa Sociedad de Naciones, kunantaj sutikun Organización de las Naciones Unidas (Apo. 17:3-5). ‘Chunka wajrastaj’ chay millay phiña animalta apoyaj tukuynin gobiernos kanku.

¿Imaynatataj khuchi warmiwan puka millay phiña animalwan apanakunku? Khuchi warmeqa chay millay phiña animalpa ‘patanpi tiyasqa’ kashan. Chaytaj niyta munan chay millay phiña animalta apoyasqanta, munayninta ruwachiyta munasqanta, mandayta munasqanta ima.

¿Imataj kanqa khuchi warmiwan? Millay phiña animalwan, payta apoyaj chunka wajraswan ‘khuchi warmita chejnenqanku’, tukuy imanta qhechonqanku, millay ruwasqasnintataj sutʼiman orqhonqanku. Jehovaj castigonta payman chayachenqanku, nisunman chinkasqata chinkachenqanku (Apo. 17:1; 18:8). Ajinamanta tukuynin llulla religiones tukuchisqa kanqanku. Jinapis niraj chay kashajtin, Jehovaqa nacionesta ni jaykʼaj ruwasqankuta ruwachenqa.

¿Imatá Jehová gobiernosta ruwachenqa? Yachakunchej jina, chunka wajraspa sonqonkuman churanqa paypa “munayninta” ruwanankupaj. Chayqa niyta munan ‘kallpankuta, atiyninkutawan puka millay phiña animalman qonankuta’, nisunman Naciones Unidasman (Apo. 17:13). ¿Imaynataj chay kanqa? ¿Sapallankumantachu gobiernos chayta ruwayta munanqanku? Mana. Profecía nin chay yuyayta Jehová sonqonkuman churananta (Pro. 21:1; Isaías 44:28 versiculowan kikinchay). ¿Chay atiyninkuta pisimanta pisillachu naciones qonqanku? Manallataj. Kaymanta jina ujllata chayta ruwanqanku. Chay atiywantaj millay phiña animalqa Jehovaj castigonta llulla religionesman chayachenqa, wiñaypaj chinkachispa.

Chanta, ¿ima kanantataj suyashanchej? Mana suyananchejchu tiyan noticiaspi ninankuta gobiernos pisimanta pisi astawan Naciones Unidasta apoyashasqankuta. Astawanpis suyashanchej, Jehová nacionespa sonqonkuman churananta kaymanta jinalla atiyninkuta millay phiña animalman qonankupaj. Chay kajtin yachasun manchay ñakʼariy qallarinanpajña kashasqanta. Chaykamataj “rijchʼarisqa, yuyayninchejpitaj kana”, tukuy imapis ujllata cambianqa (1 Tes. 5:6).