Génesis
Egiptuman Benjamínta pushashqan
43 Intëru *Canaánchömi pasaypa muchuy karqan. 2 Tsaymi Egiptupita apamushqan trïgu ushakäkuptin tsurinkunata Jacob kayno nirqan: “Yapay kutipäkuy walkalatapis trïguta rantimunaykipaq”.
3 Tsaymi Judá kayno nirqan: “Egiptucho trïguta rantikuq runaqa kaynömi nipäkamashqa: ‘Shulka wawqikita mana pushamurqa ama yuripämankitsu’. 4 Wawqï Benjamín noqakunawan aywaptinqa trïgu rantiq aywapäkushaqmi. 5 Mana kachapämaptikiqa manakaqlapaqmi aywapäkushaq, papä. Näqa nishqänöpis tsay mandaq runaqa kayno nipäkamashqa: ‘Shulka wawqikita mana pushamurqa nawpämanpis ama yuripämankitsu’ ”.
6 Tsawraqa Israel* kayno nirqan: “Pasaypa lakikuyman churamashpayki ¿imapaqtaq tsay runata shulka wawqiki kashqanta wilaparqayki?”
7 Niptin paykuna kayno nirqan: “Tsay runaqa mayqan aylu kashqantsitapis musyayta munarmi tapupäkamashqa kayno nir: ‘¿Papäniki kawaykanraqku? ¿Maspis wawqiki kanraqku?’ Tsayno tapumaptinmi rasun kaqta wilapäkushqä. ¿Imanöpataq musyapäküman karqan ‘wawqikita pushamuy’ nipäkamänanpaq kashqanta?”
8 Tsaymi papäninta Judá kayno nirqan: “Yarqaypita mana wanunantsipaq Benjamín noqakunawan aywatsun, papä. Noqa payta manami kachashaqtsu. Aywananpaq awniptikiqa juklami aywapäkushaq. Tsaynöpami noqantsipis ni wamrantsikunapis yarqaypita mana wanushuntsu. 9 Wamraykita imapis pasaptinqa noqami jutsayuq kashaqpaq. Payta mana kutitsimuptïqa ama perdonamankitsu wanunäyaqpis. 10 Egiptupita chaykamular wilaykaptï wamraykita pushanäpaq awniptikiqa maynami ishkay kutipis aywapäküman karqan”.
11 Tsayno niptinmi papänin kayno nirqan: “Tsayno kaptinqa ¿imatanataq rurashunpis, hïju? Egiptucho mandaqta qaranaykipaq* alinnin kaqkunata walka walkalatapis apapäkuy: balsamuta, abëjapa mishkinta, perfümita, mïrrata, nueciskunata y almendraskunatapis. 12 Qellaytapis puntata kutitsimushushqaykita yapay apapäkuy. Kutitsimushushqayki qellaytaqa chayaykular kikinta entreganki. Capazchari pantaypapis costalnikikunaman winaparkamushushqanki. 13 Shulka wawqikita pushakurkur jukla aywapäkuy tsay mandaq runa kaqman. 14 Dios El-Shaddai* tsay mandaq runapa shonqunman kuyapäkuyta churaykutsun Simeónta y Benjamínta kachapämushunaykipaq. Lapan tsurïkunata oqranäpaq kaptinqa jina imanäshaqtaq”.
15 Jacob tsayno niptinmi mandaq runata qarananpaq kaqkunata kamarikurqan. Nirkurmi qellaytapis aparkur y wawqin Benjamíntapis pushakurkur Egiptuman aywapäkurqan. Chayaykurnami Josépa despächunman yaykapäkurqan. 16 Paykunata y Benjamínta rikaykurmi wayincho mayor ashmayninta José kayno nirqan: “Kay runakunata wayïman pushay. Nirkur wäkata pishtarkur mikuyta yanukamuy. Paykunawanmi kanan junaq mikupäkushaq”.
17 Tsayno niptinmi ashmayninqa Josépa wayinman pusharqan. 18 Tsayman pushaptinmi fiyupa mantsakushpan kikinpura kayno ninakurqan: “Niq tumpalami pushaykämantsi punta shamuptintsi qellaynintsita kutitsimashqantsipita. Kananqa maqa maqarkurchari ashmayninpaq uywantinta tsararämäshun”.
Josépa wayincho wawqinkuna mikushqan
19 Tsayno nirmi Josépa wayinman chayaykur ashmayninta ruwakurqan kayno nir: 20 “Tayta, musyashqaykinöpis nawpatami trïgu rantiq shapäkamurqä. 21 Kaypita kutirnami patsakushqächo cargäkunata paskapakur costalnïkunapa shimincho pägashqä qellayta taripäkushqä. Trïgupita pägapäkushqä qellay lapanmi kaykänaq. Tsay qellayta kutitsimushqämi entregaykunäpaq. 22 Tsay jananmanmi qellayta apamushqä trïguta yapay rantipäkunäpaq. Itsanqa manami musyapäkütsu punta kaq qellayta costalnïkunaman pï winarpushqantapis”.
23 Tsayno nipäkuptinmi ashmayqa kayno nirqan: “Tsaypita ama lakikäriytsu ni mantsakäriytsu. Taytayki yärakushqan y qamkuna yärakushqayki Diosmi tsay qellaytaqa costalnikiman churashqa kanqa. Qamkuna pägashqaykitaqa lapantami chaskirqä”.
Nirkurnami Simeóntapis carcilpita jorqarkamur tsay ashmayqa pusharqan wawqinkuna kaykashqan kaqman. 24 Josépa wayinman pushaykurnami yakuta apapämurqan chakinkunata maylakärinanpaq. Nirkurnami bürrunkunatapis qewata qarapakurqan. 25 Tsaypitanami Josépa wawqinkuna mayarqan paykunawan José merendananpaq kashqanta. Tsaymi apapäkushqan regälukunata kamarikushqala shuyarpaykarqan.
26 Wayinman chayaykuptinnami apashqan regälukunata Joséta entregarqan. Nirkurmi nawpanman qonqurpakärirqan urkunpis pampaman töpashqanyaq. 27 Tsawraqa imano kaykashqantapis tapurmi José kayno nirqan: “Nawpata shamur wilamarqayki papäniki awkinna kashqanta. ¿Imanötaq payqa kaykan? ¿Kawaykanraqku?”
28 Tsayno tapuptinmi lapan qonqurpakuykur kayno nirqan: “Aw tayta, papänï kawaykanraqmi. Tsaynöpis alilami kaykälan”.
29 Paykunata rikapaykashqanchömi Joséqa rikärirqan wawqin Benjamínta. Benjamínwan Joséqa tsay mamalapitami karqan. Wawqinkunatami kayno nir tapurqan: “¿Payku kaykan ‘shulka wawqï kanmi’ nipäkamashqayki?”
Tsayno tapurkurmi Benjamínta José kayno nirqan: “¡Tayta Dios yanapaykuläshunki, hïju!”
30 Wawqinta rikaykur Josépa shonqun pasaypa lakikurqan. Tsaymi cuartunman jukla aywaykur waqarqan. 31 Waqarkurnami qaqlanta maylakurir yarqamurqan. Nirkurnami ashmayninkunata kayno nirqan: “Mikuyta qarapäkamayna”.
32 Tsaymi juk mësaman Joséta qararqan. Jukaq mësamannami wawqinkunata qararqan. Juk mësamannami tsaycho mikuq Egipto runakunata qararqan. Paykunata tsayno qararqan Egipto runakuna hebreo runakunawan juntu mikur penqakuptinmi. 33 Mikunanpaqmi wawqinkunata José jamatsirqan mayorpita qalaykur hasta shulkayaq. Tsayno jamatsiptinmi paykunaqa jukninpis jukninpis mantsakashqa rikapänakur yarpachakuytapis mana atiparqantsu. 34 Joséqa kikinpaq qarashqan mikuytapis wawqinkunatami yapaparqan. Wakin kaq wawqinkunata qarashqanpita mastami Benjamínta qararqan. Tsay junaqqa kushishqami lapan wawqinkunawan José mikurqan y upurqan.