1 Reyes
Faraónpa mashan Salomón yaykushqan
3 Tsaypitanami Salomónqa Egipto nacionpa mandaqnin rey Faraónpa tsurinta jorqurkur *Davidpa Markanman aparqan. Tsay witsanmi Salomón aruykätsirqan palaciunta, TAYTA DIOSPA wayinta y Jerusalén markapa murällanta. 2 TAYTA DIOSTA adorananpaq wayin manaraq kaptinmi *altarkunalacho sacrificiuta rupatsipäkuq.
Tantiyakuq kananpaq Tayta Diosta Salomón manakushqan
3 Salomónqa TAYTA DIOSTA *kuyashpanmi taytan David yätsishqankunata lapanta cumplirqan. Itsanqa juk lädu *altarkunachömi sacrificiukunata rupatsirqan y inciensuwan qoshtatsirqan. 4 Lapan tsay altarkunapitapis Gabaóncho kaykaq altarqa mas jatun y mas reqishqami karqan. Tsaymi rey Salomón tsayman aywaykur waranqa (1,000) uywakunata pishtarkur rupatsina sacrificiukunata rupatsirqan.
5 Gabaóncho kaykaptinmi sueñuynincho yuriparkur Salomónta TAYTA DIOS kayno nirqan: “Imatapis manakamashqaykitami kamaripäshayki”.
6 Tsayno niptin Salomón kayno nirqan: “Sirvishuqniki papänï David lapan shonqunwan munashqaykino kawaptinmi ali yanapashqanki. Kananpis payta kuyarmi trukan rey kanäpaq churamashqanki. 7 Tsaymi noqata churamaptiki papänïpa trukan rey kaykä. Mözularaq karmi imano mandanäpaqpis mana musyäraqtsu. 8 Kananqa yupaytapis mana atipaypaq akrashqayki runakunapa mandaqnin reymi kaykä. 9 Tsay runakunata shumaq mandanäpaq ali yarpayta y yachayta qoykalämay, Tayta. Shumaq tantiyaykatsilämay yarpaynïkuna ali kashqanta o mana ali kashqantapis musyanäpaq. Tantiyayta mana qomaptikiqa manami kuyashqayki tsaytsika runakunata mandayta kamäpakushaqtsu”.
10 Salomón manakushqan ali kaptinmi 11 Tayta Dios kayno nirqan: “Qamqa manami manakamashqankitsu atska wata kawanaykipaq, rïcu kanaykipaq ni contraykikunata ushakätsinäpaq. Tsaypa trukanqa manakamashqanki shumaq tantiyakur ali mandanaykipaqmi. 12 Tsaymi manakamashqaykino yanapashayki ali tantiyakuq y yachaq kanaykipaq. Qam yachaq kashqaykinöqa manami pipis yachaq kashqatsu ni kanqatsu. 13 Tsaynölami mana manakaykämaptikipis yanapashayki rïcu kanaykipaq y munayniyuq kanaykipaq. Tsaymi kawashqaykiyaqqa qampita mas munayniyuq reyqa mana kanqatsu. 14 Lapan leynïkunata y mandamientükunata papäniki Davidno cumpliptikiqa atska wata kawanaykipaqmi yanapashayki”.
15 Punushqanpita rikcharkamurmi Salomón tantiyakurqan sueñushqanta. Tsaymi Jerusalénman kutiykur jukla aywarqan TAYTA DIOSPA *Pactu Babulnin kaykashqan kaqman. Tsaychömi rupatsina sacrificiukunata y jawka kawakuy sacrificiukunata rupatsirqan. Nirkurmi lapan yanapaqninkunapaq mikuyta ruratsirqan.
Arreglananpaq Salomón ali tantiyakushqan
16 Tsay witsanmi ishkay *wayrapakuq warmikuna rey Salomón kaqman quejakuq aywapäkurqan. 17 Chayaykurmi jukaq warmi kayno nirqan: “Tayta rey, kay warmiwan ishkanï juk wayilacho taykarmi wachakushqä. 18 Wachashqäpita kimsa junaqlatami paypis wachashqa. Tsay höra manami pipis kashqatsu. Ishkalämi kashqä. 19 Tsaypitami punuykashqancho kay warmiqa wawanta nitiykushqa. 20 Nirkurmi wanushqa wawanta noqa punuykashqäman pulan paqas oqlaparkamashqa. Nirkurmi noqapa wawäta oqlayninman apakushqa. 21 Rikcharkamur chuchunäpaqqa wanushqa wamralana oqlanïcho kaykashqa. Patsa wararkuptin rikaykunäpaq manami wawätsu tsay wanushqa wamra kashqa, sinöqa kay warmipa wawanmi”.
22 Tsayno niptinpis jukaq warmi kayno nirqan: “Manami nishqaykinötsu. Kawaykaqmi noqapa wawäqa. Qampa wawaykimi wanushqaqa”.
Niptin jukaq warmina kayno nirqan: “Manami nishqaykinötsu. Qampa wawaykiqa wanushqa kaqmi. Noqapa wawäqa kawaykaqmi kaykan”.
Tsayno nirmi reypa nawpancho fiyupa rimanakurqan. 23 Tsawraqa rey kayno nirqan: “Jukniki kayno niykanki: ‘Noqapa wawäqa kawaykaqmi. Wanushqa kaykaqqa paypami’. Tsaynölami juknikipis kayno niykanki: ‘Paypami wanushqa kaqqa. Noqapaqa kawaykaqmi’ ”.
24 Tsayno nirmi yanapaqninta kayno nirqan: “¡Espädata apamuy!”
Espädata chayatsiptinnami 25 rey kayno nirqan: “Kawaykaq wamrata pulanpa kutsuriykuy. Pulanta qoykuy jukaq warmita y pulantana qoykuy jukaq warmita”.
26 Tsawraqa wamrapa maman fiyupa qapachakur reyta ruwakur kayno nirqan: “¡Ama wanutsiytsu, tayta! ¡Tsaypa trukanqa kawaykaqlata kay warmita qoykuy!”
Jukaq warminami kayno nirqan: “Wamrata ishkayman kutsuritsun. Tsaynöpami paypis ni noqapis mana qechunakuykäshaqnatsu”.
27 Tsawraqa rey kayno nirqan: “Amana kutsuytsu. Wanunanta mana munaq kaq warmita qoykuy. Paymi rasunpa kaq mamanqa”.
28 Tsay warmikuna quejakushqanta rey Salomón shumaq arreglashqanta mayarmi lapan runakuna tantiyakurqan yachaq kananpaq Tayta Dios yanapashqanta. Tsaymi lapan runakunapis rey Salomónta respitapäkurqan.